Godsdiensvryheid in Bulgarye

Ses busse uit Bulgarye met meer as 300 passasiers op pad na die “Liefhebbers van Vryheid”-Streekbyeenkoms het Donderdagaand, 11 Julie 1991, by die byeenkomsterrein buite Thessalonika, Griekeland, aangekom. As gevolg van die burgeroorlog in aangrensende Joego-Slawië en die onrus wat dit in die gebied veroorsaak het, kon hulle hulle visums eers ter elfder ure kry.

Woensdagmiddag het personeellede van die ambassade in Sofia, Bulgarye, oortyd gewerk om die visums in orde te bring. Die busse kon die broers uit verskillende dele van Bulgarye dus net betyds oplaai om hulle die aand voor die byeenkoms wat op Vrydag, 12 Julie, begin het na die byeenkomsterrein te neem.

Op daardie tydstip was die werk van Jehovah se Getuies in Bulgarye verbied. Hoe opwindend was dit dus tog vir hulle om vryelik Christelike omgang in die aangrensende land Griekeland te geniet! ’n Saal op die byeenkomsterrein, met ’n pragtig versierde verhoog (wat op die foto gesien kan word), is vir die besoekers uit Bulgarye voorberei. Hoe verheug en dankbaar was die besoekers tog toe feitlik die hele program in hulle eie taal aangebied is! Die Bybeldrama was die uitsondering. ’n Toespraak van 15 minute waarin die drama opgesom is, is in Bulgaars gehou, en toe het die byeenkomsgangers hulle by hulle Griekse broers aangesluit om na die drama te kyk.

’n Glanspunt by die Bulgaarse byeenkoms was die dooptoespraak Saterdagoggend. ’n Hoogtepunt van 342 het dit bygewoon, en 39 is gedoop (’n paar van hulle kan hierbo gesien word). Die Bulgaarse broers was ook verheug oor die uitreiking van die brosjure Geeste van die dooies—Kan hulle jou help of jou skaad? Bestaan hulle werklik? en die publikasie My boek met Bybelverhale in hulle eie taal.

Maar die grootste verrassing nog het op hulle gewag kort nadat hulle na Bulgarye teruggekeer het. Op 17 Julie, minder as ’n week ná die byeenkoms, is die bedrywighede van Jehovah se Getuies in Bulgarye wettig verklaar! Dit is opmerkenswaardig dat die gemeentelike verkondigers in Bulgarye die daaropvolgende maand gemiddeld 21,2 uur aan hulle bediening bestee het. Hoe bly kan ons tog wees dat godsdiensvryheid in nog ’n Oos-Europese land geniet word!