’n Alkoholis in die gesin

“Alkoholisme sluit alkoholiste in . . . Hoewel daar dalk net een alkoholis in ’n gesin is, ly die hele gesin onder alkoholisme.”—Dr. Vernon E. Johnson.

DIE vyfjarige Alice was in die bed met ’n kloppende pyn in haar been. As gevolg van ’n besering wat sy twee dae vantevore opgedoen het, was haar hele been in gips. Maar die gips was te styf en haar been het onder die drukking begin swel. Alice het haar ouers gesmeek om haar dokter toe te neem, maar haar pa was in ’n drankbedwelming en haar ma se aandag was tussen hulle verdeel, omdat sy onseker was oor wie aandag die nodigste gehad het.

Binne ’n paar dae het Alice die gevoel in haar been verloor. Toe ’n donker vloeistof voor by haar toon begin uitdrup, het Alice se ouers uiteindelik met haar hospitaal toe gejaag. Toe die gips verwyder is, het ’n verpleegster flou geword toe sy die been sien. As gevolg van gangreen moes Alice se been afgesit word.

Alkoholisme en medeafhanklikheid

Die tragedie in hierdie geval is baie groter as die verlies van ’n ledemaat. Alice se pa was ’n alkoholis. Daarom was hy emosioneel en fisies nie in ’n toestand om sy dogter te help toe sy hom dringend nodig gehad het nie. “Die aard van alkoholisme eis dat die alkoholis sy gesin laaste stel—ná alkohol en al die eise wat dit stel”, sê raadgewer Toby Rice Drews.

Wat van Alice se ma? Sy het ook ’n afhanklikheid gehad, nie van alkohol nie, maar van haar alkoholisman. Dit is kenmerkend dat die huweliksmaat, wat nie ’n alkoholis is nie, heeltemal behep raak met pogings om die alkoholis te laat ophou drink of ten minste sy onvoorspelbare gedrag te hanteer.a Sy word so vasgevang in die alkoholis se probleem dat sy dieselfde afhanklikheidstrekke openbaar—maar sonder die alkohol. Daarom word mense soos Alice se ma dikwels medeafhanklikes genoem.

Die alkoholis sowel as die medeafhanklike word onwetend deur iets of iemand buite hulleself beheer. Albei word deur ontkenning verblind. Albei is emosioneel nie in staat om hulle kinders te help nie. Albei word vasgevang in ’n lewe van frustrasie, want net soos die alkoholis nie sy drinkery kan beheer nie, kan die medeafhanklike nie die alkoholis beheer nie, en nie een van die twee kan die uitwerking wat alkoholisme op hulle kinders sal hê, beheer nie.

Maar daar is hulp vir die alkoholis en sy gesin. Dit sal in die volgende artikels bespreek word.

[Voetnoot]