Genesing is moontlik
“Ons staan voor ’n keuse: Hou op drink en word genees of hou aan drink en sterf.”—’n Geneesde alkoholis.
STEL jou voor dat jy een nag skielik wakker word en vind dat jou huis aan die brand is. Oomblikke later daag hulp op en uiteindelik word die vuur geblus. Kan jy net in die huis instap en maak asof niks gebeur het nie? Natuurlik nie. Die huis is verwoes, en herbouing sal nodig wees voordat jy jou normale lewe kan hervat.
Die alkoholis staan voor ’n soortgelyke uitdaging wanneer hy begin herstel. Sy lewe is verwoes deur alkohol, dalk baie jare lank. Nou onthou hy hom daarvan. Die “vuur” is geblus, maar groot herbouing van gesindhede, lewenstyl en gedrag sal noodsaaklik wees as die alkoholis ’n onthouer wil bly. Die volgende voorstelle kan die alkoholis help om permanent nugter te bly.
1. Ken die vyand
Die Bybel sê dat vleeslike begeertes “stryd voer teen die siel” (1 Petrus 2:11). Die Griekse woord wat vertaal word met “’n stryd voer”, beteken letterlik “om militêre diens te verrig”, en dit dra die gedagte oor van vernietigende oorlogvoering.—Vergelyk Romeine 7:23-26.
Net soos enige goeie soldaat tyd opsysit om sy vyand se taktiek te bestudeer, moet ’n alkoholis kennis opdoen van die aard van alkoholisme en hoe dit die alkoholis en diegene na aan hom vernietig.a—Hebreërs 5:14.
2. Verander jou drinkery en jou denke
“Nugterheid beteken dat jy van die bottel en die baba ontslae raak”, sê ’n geneesheer. Met ander woorde, baie meer as die drinkery moet verander; die innerlike man moet ook verander.
Die Bybel spoor ons aan met die wyse woorde: “Word verander deur die vernuwing van julle gemoed” (Romeine 12:2). ‘Lê die oue mens met sy werke af’ (Kolossense 3:9). As die alkoholis se optrede verander, maar sy persoonlikheid dieselfde bly, sal hy hom eenvoudig tot ’n ander skadelike afhanklikheid wend—of na die ou een teruggaan.
3. Kry ’n simpatieke vertroueling
’n Bybelspreuk sê: “Hy wat hom afskei, soek sy eie begeerte; hy bestry alles wat waarlik tot voordeel strek” (Spreuke 18:1). Selfs as hy nugter is, rasionaliseer die alkoholis maklik. Daarom het hy ’n simpatieke maar ferm vertroueling (dikwels ’n ondersteuner genoem) nodig. Dit is voordelig wanneer die vertroueling self ’n geneesde alkoholis is wat die uitdagings om nugter te bly die hoof gebied het. (Vergelyk Spreuke 27:17.) So ’n vertroueling moet die alkoholis se godsdiensoortuiging respekteer en moet selfopofferend en beskikbaar wees om voortdurende ondersteuning te gee.—Spreuke 17:17.
4. Wees geduldig
Herstel is geleidelik. Die alkoholis het tyd nodig om sy lewe te herbou. Daar is dalk finansiële druk, spanning by die werk en chaos tuis. Om vry van alkohol te word, beteken nie om vry van probleme te word nie. Die alkoholis wat herstel, ervaar dalk in die begin angs wanneer hy die lewe sonder ’n chemiese ‘probleemoplosser’ aanpak. Wanneer sulke angs vir die alkoholis wat herstel onoorkomelik lyk, moet hy die psalmis se vertroostende woorde onthou: “Werp jou sorg op die HERE, en Hy sal jou onderhou; Hy sal nooit die regverdige laat wankel nie.”—Psalm 55:23.
5.Kry heilsame vriende
Die alkoholis moet hom eerlik afvra: ‘Steun my vriende my nugterheid of praat hulle gedurig oor die “goeie ou dae” en laat hulle my voel dat ek iets mis?’ Spreuke 18:24 sê: “Maats kan jou breek, maar daar kan ook ’n vriend wees wat nader is as ’n broer.” Dit verg onderskeidingsvermoë om te sien wie ware vriende is en wie potensieel gevaarlike vriende is.
6. Vermy te veel selfvertroue
“Ek voel fantasties—ek het nie eers meer die begeerte om te drink nie!” Die alkoholis wat sulke dinge sê, oorskat sy vordering en onderskat sy alkoholisme. Die opwinding van die aanvanklike herstel, wat ’n pienk wolk genoem word, is tydelik. “Streef na ’n gebalanseerde perspektief”, stel die boek Willpower’s Not Enough voor. “Daarsonder maak jy jou gereed vir ’n val, en van ’n wolk af val jy ver.”—Vergelyk Spreuke 16:18.
7. Pasop vir plaasvervangende verslawings
Baie alkoholiste hou op drink maar ontwikkel dan eetversteurings of word werkslawe, kompulsiewe dobbelaars, ensovoorts. ‘Wat is daarmee verkeerd? Ek drink ten minste nie’, redeneer ’n alkoholis wat herstel miskien. Party fisiese uitlaatkleppe is weliswaar dalk heilsaam. Maar wanneer enige middel of aktiwiteit gebruik word om jou gevoelens te verdoof, lei dit net tot ’n valse, tydelike gevoel van sekuriteit.
8. Pas aan by die gesin se nuwe rolle
Baie alkoholiste saboteer hulle herstel wanneer dit begin goed gaan! Waarom? Net omdat nugterheid ’n nuwe terrein is. Die bekende lewenstyl het dalk nog ’n aantrekkingskrag vir die alkoholis. Daarbenewens veroorsaak die alkoholis ’n ontwrigting in die gesin wanneer hy nugter word. Daarom moet elke lid van die gesin sy of haar rol verander. “Die hele draaiboek vir die gesin se spel moet weggegooi word en ’n nuwe een moet in sy plek geskryf word”, sê die boekie Recovery for the Whole Family. Herstel is tereg al ’n gesinsaak genoem.—Vergelyk 1 Korinthiërs 12:26.
9. Waak teen ’n terugval
Te veel selfvertroue, onheilsame vriende, plaasvervangende verslawings en al hoe meer afsondering kan tot ’n terugval lei. Behou openhartige kommunikasie met ’n vertroueling oor enige sulke neigings.
’n Alkoholis wat herstel het, sê: “Alle alkoholiste hou op drink. Party van ons is gelukkig om op te hou terwyl ons nog lewe.”
[Voetnoot]
a Daar is baie behandelingsentrums, hospitale en programme vir herstel wat sulke inligting kan voorsien. Die Ontwaak! staan geen spesifieke behandeling voor nie. Diegene wat volgens Bybelbeginsels wil lewe, moet versigtig wees om nie betrokke te raak by aktiwiteite wat strydig met skriftuurlike beginsels is nie. Iemand wat een van Jehovah se Getuies is, sal nuttige riglyne vind in Die Wagtoring van 15 Julie 1983, bladsye 8-11.
[Venster op bladsy 7]
As medikasie absoluut noodsaaklik is
Enige medisyne wat alkohol bevat, kan die drang weer wakker maak en tot ’n terugval lei.
Dr. James W. Smith skryf: “Dit is nie ongewoon nie dat ’n alkoholispasiënt na jare van nugterheid ’n terugval kry omdat hy homself gedokter het met ’n hoesstroop wat alkohol bevat.” Die alkoholis is vatbaar vir alle kalmeermiddels. As kalmeermiddels absoluut noodsaaklik is, moet die alkoholis . . .
1. ’n apteker raadpleeg om die moontlike gevare te bepaal.
2. ’n vertroueling laat weet en hom, indien moontlik, bel voor elke dosis geneem word.
3. verslag hou van elke dosis wat geneem word.
4. die medikasie so gou as moontlik staak.
5. ongebruikte medikasie weggooi wanneer hy dit nie meer hoef te gebruik nie.