Dodelike water
NAVORSERS aan die Mayor de San Marcos National University in Peru het 30 watermonsters van openbare geriewe en huise in die stad Lima ondersoek. Volgens Visión, ’n Latyns-Amerikaanse tydskrif, was 29 van die monsters erg besmet met bakteriese middels en oorblyfsels van fekalieë. Net een watermonster was geskik vir menslike gebruik.
Peru se Departement van Gesondheid het vasgestel dat 50 persent van Lima se drinkwater “disenterie, ingewandskoors, hepatitis, cholera en ander gastroïntestinale kwale” kan oordra. Die cholera-epidemie wat in Peru uitgebreek het, was veral opspraakwekkend aangesien dit tot die besmetting van ongeveer 150 000 mense gelei het en 1100 sterfgevalle tussen Januarie en April 1991 alleen veroorsaak het.
’n Oplossing wat oor die algemeen vir die probleem aanbeveel word, is om die water lank genoeg te kook sodat organismes wat besmetting veroorsaak, vernietig kan word. Maar dit is nie altyd so maklik om te doen nie. Visión sê dat dit vir “baie gesinne feitlik ’n luukse is om water tien minute lank te kook omdat paraffien meer as [R2,75 per 3,8 liter] kos”, wat ’n groot deel uitmaak van die gemiddelde weeklikse loon.
Die probleem van besmette drinkwater is nie tot arm lande beperk nie. Volgens The New York Times word daar byvoorbeeld “geraam dat meer as 250000 kinders [in die Verenigde State] elke jaar blootgestel word aan hoeveelhede lood in hulle drinkwater wat genoeg is om hulle verstandelike en liggaamlike ontwikkeling te strem”. En in Europa is daar toenemende kommer oor besoedelde waterweë. Die tydskrif New Scientist berig dat “’n groot deel van Europa se watervoorraad van waterhoudende grondlae af kom, wat maklik met chemiese en metalliese stowwe besmet kan word”.
In Openbaring 14:7 praat die Bybel van Jehovah as die Een “wat die hemel en die aarde en die see en die waterfonteine gemaak het”. Hy het ook die vermoë om bitter en besoedelde water in soet en skoon water te verander (Exodus 15:22-25; 2 Konings 2:19-22). Hy sal dit op wêreldwye skaal doen nadat hy diegene verderf het wat nou die aarde verderf.—Openbaring 11:18.