’n Dokter se roeping
ONGEVEER sewe jaar gelede het Dai Soezoeki, ’n tienjarige seun, weens ’n verkeersongeluk gesterf. Die media het Dai se ouers van nalatigheid beskuldig omdat hulle, in gehoorsaamheid aan Bybelbeginsels, geweier het dat hulle seun bloedoortappings kry. Dai se ouers is Getuies van Jehovah. Ná ’n polisieondersoek is daar vasgestel dat die ouers nie nalatig was nie.
Jehovah se Getuies in Japan en elders waardeer die feit dat dokters mense se lewe probeer red en is bereid om met mediese personeel saam te werk. Hulle maak gebruik van die hedendaagse geneeskunde en aanvaar mediese behandeling, met die uitsondering van bloedoortappings. Maar wanneer ’n mediese besluit met hulle getrouheid aan Bybelbeginsels bots, luister hulle na God (Handelinge 4:19). Die Bybel gee die duidelike bevel: ‘Onthou julle van bloed.’—Handelinge 15:29.
Pleks dat hulle dus hulle geloof in God se gebooie prysgee, vra Jehovah se Getuies dat hulle sonder die gebruik van bloedoortappings behandel word. Die behoefte aan sulke alternatiewe behandeling is weliswaar vir diegene in die mediese beroep moontlik ’n uitdaging. Maar al hoe meer dokters en hospitaaladministrateurs vind maniere om in ooreenstemming met die keuse van Jehovah se Getuies op te tree. Een koerant in Japan, die Mainichi Sjimboen, het byvoorbeeld gesê dat “sommige hospitale [deesdae] bloeding so ver moontlik beperk en bereid is om bloedlose chirurgie uit te voer”.
Die artikel het gesê dat 14 operasies sonder bloedoortappings tussen 1989 en Januarie 1992 by die Ageo Kosei-hospitaal met welslae op Getuies van Jehovah uitgevoer is. Die hospitaal lê klem op oorwoë toestemming. Dit is die hospitaal se beleid om met Getuiepasiënte te bespreek hoeveel bloed hulle na verwagting sal verloor en watter gevare bloedlose chirurgie inhou. Wanneer die dokters ’n skriftelike vrywaring van die pasiënt ontvang, doen hulle die operasie sonder die gebruik van bloedoortappings.
Wat het hierdie hospitaal beweeg om Getuiepasiënte te aanvaar en hulle keuse van behandeling te respekteer, selfs al het ander hospitale hulle afgewys? Volgens die Mainichi Sjimboen verduidelik Tosjihiko Ogane, die direkteur van die hospitaal: “’n Dokter se roeping vereis dat hy die pasiënt se reg om die finale besluit te neem, respekteer en dat hy sy bes doen en al sy vaardigheid gebruik terwyl hy sy samewerking gee wat die behandeling van die siekte betref. Oorwoë toestemming is uit daardie oogpunt baie belangrik.”
Die koerant voeg by: “Jehovah se Getuies het self reeds in 53 stede oor die hele land vir hulle gelowiges hospitaalskakelkomitees opgerig. Die doel van hierdie komitees is om met hospitale oor die uitvoer van bloedlose chirurgie te onderhandel.” As gevolg daarvan is ’n hele aantal universiteitshospitale en mediese instellings nou bereid om die Getuies ’n keuse van behandeling te bied.
Daar is tans meer as 1800 dokters in Japan en meer as 24 000 wêreldwyd wat bereid is om met die Getuies saam te werk deur hulle alternatiewe behandelings vir bloedoortappings te gee. Meer as 800 hospitaalskakelkomitees het al met dokters in aanraking gekom wat dit as “’n dokter se roeping” beskou om ’n pasiënt se reg van besluit te respekteer.