Ons beskou die wêreld
’n Gevaarlike lewenswyse
Die AHA (Amerikaanse hartvereniging) het ’n lys opgestel van ’n aantal faktore wat tot kardiovaskulêre siekte aanleiding kan gee. Daar is ook ’n lys van risikofaktore wat ernstiger is. Tot onlangs is fisiese onaktiwiteit onder die minder gevaarlike “aanleidende faktore” genoem. Maar volgens die University of California at Berkeley Wellness Letter het die AHA “fisiese onaktiwiteit van sy lys van ‘aanleidende faktore’ vir kardiovaskulêre siekte afgehaal en dit by die ernstiger kategorie van ‘risikofaktore’ gevoeg”. Die Wellness Letter voeg by dat “’n lewenswyse waar ’n mens feitlik geen oefening kry nie, nou met hoë bloeddruk, rook en hoë cholesterol in die bloed gelykgestel word”.
Vuil hande
’n Onlangse studie het bekend gemaak dat die meeste gesondheidswerkers in die Verenigde State nie hulle hande was voordat hulle hulle pasiënte ondersoek nie. Volgens The Washington Post “het ander studies [ook] te kenne gegee dat dokters nie skoon handskoene aantrek wanneer hulle dit behoort te doen nie”. Hierdie probleem het ongetwyfeld tot die verspreiding van siektes bygedra. Die Post berig dat ongewaste hande onder dokters en verpleegsters volgens The New England Journal of Medicine “moontlik ’n rede is waarom hospitaalpasiënte infeksies kry wat tot [R28 miljard] per jaar kos om te genees”.
Hartkwaalsterftes
Kardiovaskulêre siektes (KVS) is die grootste oorsaak van sterftes onder die mens, en dit lei wêreldwyd tot ongeveer ’n kwart van alle sterftes. Dit is wat die 1991 World Health Statistics Annual sê wat in 1992 deur die WGO (Wêreldgesondheidsorganisasie) uitgegee is. In ontwikkelde lande, soos Australië, Kanada, Japan en die Verenigde State, veroorsaak KVS ongeveer die helfte van alle sterftes, hoewel daar ’n opvallende afname in die tagtigerjare was. In ontwikkelende lande is slegs 16 persent van alle sterftes te wyte aan KVS. Volgens die WGO is daar egter “tekens van ’n epidemie wat besig is om kop uit te steek . . . KVS neem oral in die ontwikkelende wêreld toe”.
Lekplekke in die pos
Laboratoriums oor die hele wêreld maak van die posdiens gebruik om lewende mikroörganismes oor en weer te stuur. Daar bestaan toenemende kommer oor hierdie gebruik omdat daar volgens die tydskrif New Scientist “gereeld potensieel gevaarlike bakterieë van een laboratorium na ’n ander gestuur word”. Hollandse navorsers waarsku dat organismes uit beskadigde pakkette in die omgewing losgelaat kan word. ’n Groep wetenskaplikes het onlangs verskeie pakkette ondersoek wat van laboratoriums in Australië, Nederland, Singapoer en die Verenigde State af gekom het. Hulle het gevind dat nie een van die pakkette aan die bepalings voldoen wat deur die VN se Komitee van Deskundiges oor die Vervoer van Gevaarlike Goedere uiteengesit is nie. Een Hollandse laboratorium wat jaarliks duisend monsters ontvang, tref spesiale voorsorg om sulke ongelukke te voorkom. Maar hulle “ontvang steeds elke jaar ongeveer vyf gebreekte buisies bakterieë deur die pos”, sê New Scientist.
Selfmoorde in Argentinië
Argentinië het die hoogste selfmoordsyfer in die Amerikas. Die koerant La Nación sê ‘volgens amptelike verslae kom bykans 10 persent van alle aangemelde selfmoorde in die land onder adolessente en jong volwassenes tussen 10 en 22 jaar voor, en die meeste daarvan is onder mans’. Die Gesondheidsdepartement sê dat daar elke 30 uur een adolessent in Argentinië selfmoord pleeg.
Arm kinders in Amerika
In die Verenigde State, een van die welvarendste lande in die wêreld, woon daar ook van die armste kinders. Volgens The New York Times het ’n studie wat deur die Kinderbeskermingsfonds gedoen is, bevind dat “die aantal Amerikaanse kinders wat in armoede leef gedurende die 1980’s met meer as 1 miljoen toegeneem het, met syfers wat in 33 Amerikaanse state gestyg het”. In 1989 het die gesinne van meer as 25 persent van die kinders in die state Arkansas, Louisiana, Nieu-Mexiko en Wes-Virginië ’n laer inkomste gehad as die bestaansminimum wat deur die Amerikaanse regering vasgestel is. Die staat Mississippi, waar 33,5 persent van alle kinders in armoede leef, het die hoogste syfer gehad.