Jongmense vra . . .

Hoe kan ek ophou drink?

“Ek het die volgende dag altyd verskriklik gevoel, emosioneel sowel as geestelik!”—Bob.

“Ek was alewig in die moeilikheid—by die huis, by die skool, by vriende en by die gereg!”—Jerome.

BOB en Jerome het albei geboet omdat hulle te veel en te dikwels gedrink het. Al twee het aan drank verslaaf geraak. En hoewel Bob dit uiteindelik reggekry het om drank heeltemal op te gee, probeer Jerome steeds om alkoholisme te oorkom.

Alkoholverslaafdheid is ’n toenemende probleem onder jongmense in baie dele van die wêreld. Party skat dat daar in die Verenigde State alleen omtrent vyfmiljoen jongmense met ’n ernstige drankprobleem is. Maar as jy ’n jong Christen is, het jy ongetwyfeld eksperimentering met drank vermy, veral as dit in jou gemeenskap vir ’n tiener onwettig is om te drink. Die volgende inligting kan jou nietemin versterk in jou voorneme om hoegenaamd nie te drink nie—ten minste totdat jy ouer en beter in staat is om dit te hanteer. Maar as jy reeds aan alkohol verslaaf geraak het, hoop ons dat hierdie inligting jou sal help om teen hierdie probleem te stry. Met daadwerklike inspanning van jou kant en die hulp van Jehovah God is herstel moontlik.

Hou op om jou probleem te ontken

Die eerste en moeilikste stap wat jy moet doen, is om op te hou om jou probleem te ontken. Dit is tipies dat alkoholiste weier om te glo dat hulle enigsins ’n drankprobleem het. ‘Ek kan dit hanteer’, is die patetiese bravade van die alkoholis. Beskou byvoorbeeld die geval van die 15-jarige wat gesê het: “Ek is nie ’n probleemdrinker nie. Ek drink maar net ses biere op ’n aand.” Dit laat ’n mens dink aan die Bybel se beskrywing van die man wat “te vleiend teenoor homself opgetree [het] in sy eie oë om sy dwaling te ontdek ten einde dit te haat”.—Psalm 36:2, NW.

Ja, ontkenning is dodelik. As jy derhalwe ’n probleem met drank het, moet jy daardie pynlike waarheid teenoor jouself erken.a Moenie vriende, broers en susters of ouers ignoreer wat vir jou sê dat jy te veel drink nie. Hulle is nie jou vyande omdat hulle jou die waarheid vertel nie. (Vergelyk Galasiërs 4:16.) Bob (wat aan die begin genoem is) het gewoonlik elke naweek straf gedrink. Toe ’n vriend hom daaroor genader het, het Bob die gedagte dat hy ’n drankprobleem het onmiddellik verwerp en die gesprek beëindig. Maar hoe het drank Bob se lewe beïnvloed? “Ek was ’n senuweewrak as ek nie gedrink het nie, en ás ek gedrink het, kon ek myself nie beheers nie”, erken Bob. “My gesinslewe het in skerwe gespat—en ook my verhouding met God.”

By ’n ander geleentheid het Bob uiteindelik sy selfverontskuldiging gestaak en teenoor sy vriend erken dat hy inderdaad na drank smag. Toe hy eers deur hierdie muur van ontkenning gebreek het, kon Bob begin herstel.

Kweek die vasbeslotenheid aan om op te hou

Professor George Vaillant skryf dat “alkoholisme . . . ongetwyfeld behandel kan word, maar . . . dat ’n groot verantwoordelikheid op die pasiënt rus”. Dít behels dat jy vasbeslote moet wees dat jy gaan ophou drank drink. ’n Gebrek aan vasbeslotenheid kan beteken dat jy as ’n alkoholis sal lewe—en sal sterwe. Wat kan jou help? As jy voortdurend die verwoestende uitwerking van alkoholisme in gedagte hou, kan dit jou help om ‘die kwaad te haat’ en kan dit jou voorneme versterk om drank eens en vir altyd op te gee.—Psalm 97:10.

Jy kan byvoorbeeld dikwels nadink oor die groot skade wat alkoholisme fisies, emosioneel en geestelik aanrig. Dit kan weliswaar lyk of ’n drankie jou innerlike pyn en gevoelens van waardeloosheid ’n rukkie verlig. Maar as ’n mens op drank staatmaak, veroorsaak dit op die lange duur net meer probleme; vriendskappe verbrokkel en gesinsverhoudinge word gespanne. Omdat alkohol boonop jou inhibisies verlaag, kan dit maklik “goeie beweegredes wegneem” en jou in ernstige wangedrag laat verval.—Hosea 4:11, NW.

Dink ook aan wat groot hoeveelhede alkohol aan jou liggaam kan doen deurdat dit jou lewensorgane geleidelik vergiftig. Die Bybel sê gevolglik dat drankmisbruik bloot uitloop op ‘ellende, selfverwyt, rusies, kommer en kneusplekke’ (Spreuke 23:29, 30, The New English Bible). Is enige tydelike genot wat jy daaruit put al dié dinge werd?

Dit kan ook help as jy jouself daaraan herinner dat jy nie drank nodig het om gelukkig te wees nie. Jy het ook nie ’n kunsmatige euforie nodig om selfrespek, goeie gesondheid, lojale vriende en ’n liefdevolle gesin te hê nie. Sukses op hierdie lewensterreine kom as jy God se Woord toepas (Psalm 1:1-3). Daardie Woord gee jou ook ’n hoop op ’n rooskleuriger toekoms—ewige lewe sonder emosionele of fisiese pyn! (Openbaring 21:3, 4). So ’n hoop gee jou nog ’n rede om jou van drank te onthou.—Vergelyk 1 Korinthiërs 6:9, 10.

Kry hulp

Maar net die begeerte om te herstel, is gewoonlik nie genoeg nie. Jy sal ook ander se ondersteuning en hulp nodig hê. “Twee vaar beter as een”, het koning Salomo gesê. “As die een val, kan die ander hom ophelp” (Prediker 4:9, 10, NAV). Dit sal nie maklik wees om iemand wat jou met jou probleme kan help in jou vertroue te neem nie. Maar ’n herstellende alkoholis, Katy, gee die volgende raad: “Leer om mense te vertrou, veral jou gesin.” Ja, in die meeste gevalle is jou gesin die beste daartoe in staat om jou die liefde en ondersteuning te gee wat jy nodig het.

Jou gesinsituasie kon weliswaar bygedra het tot die feit dat jy begin drink het. Maar sal jou ouers nie dalk beweeg word om dinge by die huis te verbeter as hulle van jou probleem bewus gemaak word nie? Waarom probeer jy dan nie om jou ouers te nader en hulle te vertel dat jy ’n ernstige probleem het nie? Pleks van al die skuld op hulle te pak, kan jy eerder hulle hulp en ondersteuning vra. As jy openhartig en eerlik met jou ouers is, sal dit julle gesin help om, net soos God se huisgesin, ‘harmonies saamgevoeg te wees’ (Efesiërs 4:16, NW). Só kan julle almal begin saamwerk om ’n suksesvolle herstel moontlik te maak.

As gesinsondersteuning ontbreek, kan ander helpb (Spreuke 17:17). ’n Christen- ouere man het met Bob bevriend geraak en hom etlike maande lank elke week besoek om sy vordering te monitor. Bob sê: “Sy belangstelling en besorgdheid het my die selfrespek gegee wat ek nodig gehad het om my slegte gewoonte te staak.”—Jakobus 5:13, 14.

Bowenal moet jy besef dat jy die hulp van Jehovah God nodig het. Steun op hom vir krag. Ja, met God se hulp kan “die wat gebroke is van hart” ervaar hoe Jehovah ‘hulle wonde genees en verbind’.—Psalm 147:3; sien ook Psalm 145:14.

Kry nuwe vriende

’n Opname in Nieu-Seeland het getoon dat vriende ’n groot invloed op jongmense het wat drank misbruik. Jy sal dit derhalwe moeilik vind om op te hou drink as jy met drinkers assosieer. Juis daarom waarsku die Bybel: “Wees nie onder die wynsuipers nie” (Spreuke 23:20). Bou nuwe, gesonde vriendskappe op. Net soos ‘slegte gesprekke goeie sedes bederf’, is goeie vriende ’n positiewe invloed.—1 Korinthiërs 15:33.

Kim het ontdek dat dit waar is. “Dit was ’n ongemaklike situasie”, erken sy, “maar ek moes van my vriende ontslae raak . . . Ek wou nie drank en dwelms om my hê nie.” Dit lyk weliswaar moeilik om vriende te kry wat nie drink nie. Maar jy sal vind dat voorbeeldige jongmense onder Jehovah se Getuies hulle nie met onwettige drinkery ophou nie. Hulle steun ook nie op drank as ’n bron van vermaak of ontvlugting nie. Daarom kan hulle jou help—pleks van verhinder—in jou pogings om ‘die oue mens met sy werke af te lê’.—Kolossense 3:9.

Jy kan herstel!

Dit sal vir jou ’n voortdurende stryd wees om sonder drank te lewe. Met tye sal onthouding moontlik baie moeilik wees. “Ek het steeds ’n verskriklike sterk drang [om te drink]”, het Ana erken, “veral as ek ontsteld, gefrustreerd, neerslagtig of seergemaak voel.” Dit is gevolglik nie buitengewoon dat ’n herstellende alkoholis by geleentheid in sy ou gewoonte terugval nie, wat tot oorweldigende skuldgevoelens lei. As dit sou gebeur, moet jy in gedagte hou dat ‘ons almal dikwels struikel’ (Jakobus 3:2). Onthou ook dat Jehovah ’n God van genade is wat jou swakhede verstaan.—Psalm 103:14.

Jy moet nogtans versigtig wees om nie God se goedhartigheid te misbruik nie. Leer uit jou fout, en wees meer vasbeslote as ooit tevore om nie weer ’n enkele keer in die gewoonte terug te val nie. Dit was deur sulke vasbeslotenheid dat Bob drinkery kon opgee. Sedertdien kan hy ’n vreedsame verhouding met sy gesin en met God geniet. Tans sluit sy gelukkige lewe diens as ’n voltydse bedienaar in. Ook jy sal geluk en gemoedsrus hê as jy die stryd teen drank wen.

[Voetnote]

[Prent op bladsy 16]

Jong alkoholiste is geneig om te ontken dat hulle ’n probleem het