Medisyne vir liggaam en gees

NAVORSING toon dat volgehoue gelag ontspannend en gesond vir liggaam en gees is. Dit “kan spanning verlig en kan ook ’n mens se kanse verbeter om ’n ernstige siekte te oorleef”, sê die tydskrif Your Better Health. Dit is soos ’n “interne oefensessie”. Toetse toon dat volgehoue gelag pyn kan verlig en ook goeie oefening vir die hart kan wees. Dit verbeter die sirkulasie, gee die diafragma oefening en verhoog die suurstofvlak in die bloed. Spiere in die bors, nek, gesig en kopvel word ook geoefen, asook die oogspiere wat die trane laat loop.

Die Journal of the American Medical Association het verslag gedoen van ’n studie wat “aandui dat ’n humorterapieprogram die gehalte van die lewe vir pasiënte met chroniese probleme kan verbeter en dat hierdie pasiënte se simptome onmiddellik verlig word wanneer hulle lag”. Die resultate van hierdie sielkundige benadering van herstel het daartoe gelei dat die Kankeragentskap van Brits-Columbië ’n “humorkamer” by hulle biblioteek gevoeg het.

Maar dit sal nie goeie gesondheid verseker as ons al laggende deur die lewe gaan nie. Ons moet eerder gebalanseerd wees. Die Bybel sê daar is ’n tyd om te lag en ’n tyd om stil te bly. ’n Sinlose gelag kan ander irriteer en word vergelyk met die geluid van knetterende dorings wat onder ’n pot brand, omdat dit waardeloos is en niemand opbou nie.—Prediker 3:4, 7; 7:6.