“Kom ons stuur ’n kaartjie”

“WAT ’n aangename naweek was dit tog nie!” By jou tuiskoms het jy aangename herinneringe aan daardie ontspannende tyd wat jy by vriende deurgebring het. Hoe gasvry was jou gasheer tog! Om jou waardering te toon, sê jy vir jou gesin: “Kom ons stuur ’n kaartjie.”

Jy gaan dus na die plaaslike winkels toe om ’n kaartjie te koop. Daar tref jy ’n ontsaglike, maar verwarrende verskeidenheid aan. ‘Watter kaartjie moet ek kies?’ ‘Watter een het nét die regte woorde?’ Dit is geensins ’n maklike keuse nie! Waarom maak jy dan nie self ’n kaartjie nie?

Hoe om self kaartjies te maak

Dit is makliker as wat jy dalk aanvanklik dink. Al wat jy nodig het, is ’n vel gewone papier of ’n dun kaart, iets om mee te skryf en natuurlik ’n boodskap. Met jou eie ontwerp kan jy dit meer persoonlik maak. Hoe? Hier is twee wenke.

(1) Kies ’n prentjie waarvan jy hou. Dit kan ’n prentjie in ’n tydskrif wees wat jy kan uitsny en op jou kaartjie plak. Een vrou het haar man met ’n ongewone kaartjie verras om hulle 25ste huweliksherdenking te vier. Sy het twee foto’tjies van haar en haar man uitgesny en hulle op ’n eenvoudige kaartjie geplak om haar geluk te betuig vir die jare wat hulle saam deurgebring het.

(2) Gebruik blomme. Hulle is reeds goed ontwerp. Pers en droog hulle en plak hulle dan op jou kaartjie om jou kaartjie mooi en smaakvol te maak.—Sien venster.

Watter versiering jy ook al kies, dit is beslis die boodskap wat die kosbaarste is. As jy self kaartjies maak, bied dit jou die geleentheid om woorde te kies wat jou ware gevoelens weerspieël.

’n Gepaste boodskap

Koning Salomo van die ou tyd ‘het gesoek om welgevallige woorde te vind wat reg geskrywe is—woorde van waarheid’ (Prediker 12:10). So ’n woordkeuse sal jou geskrewe boodskap vir die ontvanger soos “goue appels op versierde silwerborde” maak.—Spreuke 25:11.

Kies woorde wat ’n aangename uitwerking sal hê. Jy kan van die Bybel se geïnspireerde woorde gebruik om jou opregte gevoelens oor te dra. Dit sal beslis verwelkom word.

Die manier waarop jy daardie woorde op die kaartjie skryf, dra ook ’n boodskap oor. As dit netjies en leesbaar is, sê dit iets van jou as die skrywer.

Geleenthede om kaartjies te stuur

Troues is vreugdevolle geleenthede waarheen paartjies dalk hulle vriende en familielede wil uitnooi. As hulle ’n onthaal gaan hê, kan hulle besorgdheid toon vir die welsyn van dié wat van ver af kom deur in die uitnodiging aan te dui hoe laat dit sal begin en eindig.

Die geboorte van ’n baba kan nog ’n geleentheid wees om ’n kaartjie te stuur. Dit toon vir die nuwe aankomeling se ouers dat jy in hulle vreugde deel.

Buiten sulke geleenthede is dit ook bedagsaam om waardering te toon vir die goedheid wat mense teenoor jou betoon het. Jy kan ook die siekes en dié wat in die hospitaal is, opbeur en hulle van jou liefde en besorgdheid verseker. Jou opgewekte woorde en die mooi prentjie op jou kaartjie kan terneergedruktheid en angs help verlig. Die eertydse spreuk sê tereg: “Hoe goed is ’n woord op sy tyd!”—Spreuke 15:23.

As jy ver weg of selfs naby is, kan jy jou simpatie aan diegene oordra wat ’n geliefde aan die dood afgestaan het. Dit sal dalk gepas wees om so ’n persoon te herinner aan die wonderlike opstandingshoop wat die Bybel bied.

Stuur dus gerus ’n kaartjie wanneer jy ook al voel dat jy jou gevoelens aan ander wil oordra. Dit neem natuurlik nie die plek daarvan in om self met die persoon te praat as dit moontlik is nie. Dit is eerder nóg ’n geleentheid om goedhartigheid te betoon.

[Venster op bladsy 26, 27]

’n Besonderse versiering

Jou kaartjies sal nóg mooier wees as jy dit met geperste blomme versier. Dit is ’n eenvoudige, goedkoop manier om jou kaartjies iets besonders te maak. Jy het baie min toerusting nodig.

Wanneer jy die blomme versamel

◻ Maak seker dat jy toestemming het om die blomme te pluk wat jy wil hê.

◻ Moenie in die reën pluk nie.

◻ Moenie ou blomme of blare pluk nie.

◻ Moenie blomme vermors nie.

Party blomme pers nie goed as hulle vlesig is (grasklokkies, lelies, orgideë) of ’n eienaardige vorm het (affodille, seringblomme, groot rose, distels) nie.

Wanneer jy die blomme pers

◻ Plaas die blomme tussen velle kladpapier wat tussen twee stukke laaghout vasgeklamp is. Dit sal die vogtigheid help absorbeer as jy ’n paar lae koerantpapier byvoeg. Draai die klampe elke dag stywer namate die blomme uitdroog.

◻ Wag minstens ’n week voor jy die pers oopmaak.

◻ Kyk vlugtig of die blomme behoorlik gepers is en herrangskik dit op droë papier indien nodig.

◻ Draai die pers weer styf vas en los dit nóg twee of drie weke in ’n warm, droë plek voor jy die blomme uithaal.

Wanneer jy die blomme monteer

◻ Gebruik so min kleefstof as moontlik.

◻ Hanteer die droë blomme versigtig, miskien met ’n haartangetjie.