Hoe die wêreld verenig sal word
MENSE se pogings om met welslae oor hulleself te heers het nog altyd misluk. Jy sal ongetwyfeld met die geïnspireerde verklaring saamstem: “Die een mens heers oor die ander tot sy ongeluk” (Prediker 8:9). Waarom was mense se selfbestuur so ’n volslae mislukking?
Die Bybel gee die rede waar dit sê: “Dit kom die aardse mens wat loop nie toe selfs om sy voetstappe te rig nie” (Jeremia 10:23, NW). Nee, dit is nie die mens se keuse, of reg, om oor homself of oor sy medemens te heers nie. Dit is die spesiale reg van Jehovah God, ons Skepper, van wie ons lees: “Jehovah is ons Regter, Jehovah is ons Wetgewer, Jehovah is ons Koning.”—Jesaja 33:22, NW.
Slegs wanneer alle mense Jehovah God as hulle Heerser aanvaar, sal die wêreld verenig wees. Maar sal dit ooit gebeur? Lank gelede het ’n profeet van God gepraat van “die einde van die dae” wanneer baie mense op Jehovah vir onderrigting sal begin staatmaak.
’n Voorspelde wêreldwye vrede
“Aan die einde van die dae”, het die profeet Jesaja geskryf, “sal die berg van die huis van [Jehovah] vasstaan op die top van die berge . . . en al die nasies sal daarheen toestroom. En baie volke sal heengaan en sê: Kom laat ons optrek na die berg van [Jehovah] na die huis van die God van Jakob, dat Hy ons sy weë kan leer.” Wanneer ons verder lees, sien ons wat die resultaat sal wees as mense vir onderrigting op Jehovah staatmaak. “Hulle sal van hul swaarde pikke smee en van hul spiese snoeimesse”, sê die profesie verder. “Nie meer sal nasie teen nasie die swaard ophef nie, en hulle sal nie meer leer om oorlog te voer nie.”—Jesaja 2:2-4.
Ja, omdat hulle op hierdie Goddelike onderrigting ag slaan, sal daar geen gevegte, geen etniese geweld en geen oorlog meer wees nie. Menseheersers het gedink dat hulle hierdie Bybelprofesie kon vervul en het selfs die laaste deel daarvan op die plazamuur van die Verenigde Nasies in die stad New York laat graveer. Tog het oorloë en haat tussen volks- en etniese groepe tot die einde van 1993 slegs toegeneem. Sou jy dus sê dat God se profesie onvervul gebly het?
Hoegenaamd nie—want mense uit alle nasies stroom nou na Jehovah se huis om Goddelike onderrigting te ontvang. Ja, wat ’n grootse getuienis was hierdie somer se “Goddelike Onderrigting”-Streekbyeenkomste van Jehovah se Getuies tog nie ter vervulling van hierdie profesie nie! Die wêreldwye broederskap van Jehovah se Getuies laat nie toe dat enigiets—nie ras, nasionaliteit of etniese agtergrond—veroorsaak dat hulle mekaar haat of doodmaak nie. Hulle het figuurlik gesproke van hulle swaarde pikke gesmee en van hulle spiese snoeimesse.
‘Maar’, maak iemand dalk beswaar, ‘’n mens kan tog nie verwag dat almal God se bevel om mekaar lief te hê, sal gehoorsaam nie.’ Dit is waar, maar God het die mag om van alle teenstanders van sy Goddelike wil ontslae te raak.
Wat God gaan doen
Bid jy soos Jesus sy navolgers geleer het, naamlik: “Onse Vader wat in die hemele is, laat u Naam geheilig word; laat u koninkryk kom; laat u wil geskied, soos in die hemel net so ook op die aarde”? (Mattheüs 6:9, 10). Indien wel, kan jy verseker wees dat ons liefdevolle hemelse Vader daardie gebed sal verhoor. Hoe gaan hy dit doen?
God het reeds sy Seun, die “Vredevors”, aangestel as die gekose heerser van sy “regering”, die Koninkryk waarvoor ons geleer word om te bid (Jesaja 9:6, King James Version). Ons het so ’n bomenslike geespersoon as heerser nodig, want net hy kan die mensdom van die bose invloed van Satan en sy demone bevry. Menseheersers kan dit nie doen nie, ongeag hoe welmenend hulle is.—1 Johannes 3:8; Openbaring 12:7-12.
Maar wat gaan met hedendaagse regerings gebeur wat hulle nie aan Goddelike heerskappy onderwerp nie? ’n Ander Bybelprofesie wat die Koninkryk beskryf waarvoor Jesus ons leer bid het, sê: “Die God van die hemel [sal] ’n koninkryk verwek wat in ewigheid nie vernietig sal word nie . . . [God se hemelse Koninkryk] sal al daardie koninkryke verbrysel en daar ’n einde aan maak, maar self sal dit vir ewig bestaan.” As ons dus bid dat God se Koninkryk moet kom, beteken dit dat ons vir een wêreldwye regering onder die heerskappy van die “Vredevors” bid.—Daniël 2:44; Jesaja 9:5.
Dan, wanneer die mensdom in vrede onder God se Koninkryk verenig is, sal almal mekaar liefhê ongeag van watter ras of etniese agtergrond hulle is. Wat ’n wonderlike tyd sal dit tog nie wees nie! (Openbaring 21:3, 4). Ons nooi jou om ’n voorsmaak te kry van daardie vreedsame toestand wat nou reeds onder Jehovah se Getuies heers, en om dan saam met hulle uit te sien na die tyd wanneer die hele wêreld in vrede verenig sal wees.
[Prent op bladsy 15]
God se Koninkryk sal alle mense in vrede verenig