Die Bybelse beskouing

Moet jy weer gedoop word?

LUCILA was bekommerd. Hoewel sy as ’n Katoliek grootgemaak is, het sy onlangs ’n ernstige studie van die Bybel met die hulp van ’n vriendin begin wat nie ’n Katoliek is nie. Sy kon sien dat die doop wat die Bybel beskryf anders is as die doop wat sy as ’n baba ondergaan het. “Beteken dit dat ek weer gedoop sal moet word?” het sy opreg gevra. “Ek is bang dat dit God sal mishaag as ek dit doen.”

Honderdmiljoene mense, Katolieke sowel as Protestante, is as babas tydens ’n doopplegtigheid met water besprinkel of water is oor hulle gegiet. Miljoene ander is gedoop toe hulle ouer was deur op die een of ander manier heeltemal in water ondergedompel te word. Dit laat die vraag ontstaan: Wat presies is die Christelike doop? Is daar enige omstandighede wat ’n tweede doop sal regverdig?

Die Pocket Catholic Dictionary definieer doop as “die sakrament waardeur iemand, deur water en die woord van God, van alle sonde gereinig word en in Christus wedergebore en geheilig word tot die ewige lewe”. Dieselfde bron sê aangaande herdoping dat “doop ’n onuitwisbare merk op die siel maak, wat beteken dat dit nie herhaal kan word nie omdat dit nie nodig is nie”. Is dit wat die Bybel sê?

Maak dissipels, doop hulle

In Mattheüs 28:19 lees ons die opdrag wat die verrese Christus voor sy hemelvaart aan sy dissipels in verband met doop gegee het. “Gaan dan heen, maak dissipels van al die nasies, en doop hulle in die Naam van die Vader en die Seun en die Heilige Gees; en leer hulle om alles te onderhou wat Ek julle beveel het.” Dit is duidelik dat Christendissipels—diegene wat geleer is om Christus se bevele te onderhou—gedoop moes word en nie babas nie.a Dit stem ooreen met die feit dat daar by al die gevalle waar doop in die Skrif beskryf word dissipels betrokke was wat klaarblyklik heeltemal in water ondergedompel is. Dit blyk duidelik dat dit die geval was toe Christus Jesus self deur Johannes die Doper gedoop is. Die Bybelverslag sê dat Jesus, nadat hy gedoop is, “uit die water [van die Jordaanrivier] opgeklim” het (Mattheüs 3:16). Trouens, die Skrif toon dat Johannes die plekke waar hy mense gedoop het sorgvuldig gekies het sodat daar baie water beskikbaar sou wees.—Johannes 3:23.

Waar die Bybel later die doop van die Ethiopiese hofdienaar beskryf, sê dit “hulle het altwee in die water afgeklim, Filippus en die hofdienaar; en hy het hom gedoop”, en daarna het hulle “uit die water opgeklim” (Handelinge 8:38, 39). Hierdie voorbeelde van doop deur onderdompeling strook met die algemene betekenis van die Griekse woord ba·ptiʹzo, “om te doop”, wat afgelei word van die woord baʹpto, wat “in- of onderdompel” beteken.

’n Skriftuurlike verslag van herdoping

Maar wat van die baie miljoene wat as babas gedoop is of wat nie heeltemal ondergedompel is nie? Sal dit ooit gepas wees dat hulle weer gedoop word? ’n Gebeurtenis wat in Handelinge 19:1-7 opgeteken is, help ons om hierdie vrae te beantwoord. Dit was waarskynlik gedurende die winter van 52/53 G.J. dat die apostel Paulus die welvarende stad Efese in Klein-Asië besoek het. Daar het hy ’n groep dissipels aangetref wat weer gedoop moes word. Nadat Paulus uitgevind het dat hierdie manne met die doop van Johannes gedoop is, het hy hulle weer gedoop “in die Naam van die Here Jesus”. Hy het nie gemeen dat dit God sou mishaag as hulle dit doen nie. God het ongetwyfeld met Paulus se redenasie saamgestem, en in plaas daarvan dat dit God mishaag het, het hy dit met die gawe van die heilige gees bekragtig.

As die 12 manne Paulus se lering aangaande die soort doop en die belangrikheid van die Messias, Christus Jesus, verwerp het, sou Paulus hulle gewis nie gedoop het nie. Die manne moes eers aan die vereistes vir doop voldoen het. Eers dan kon hulle met God se goedkeuring weer gedoop word.

Hoe ’n mens aan die vereistes vir doop voldoen

Hoe voldoen ons aan die vereistes vir doop? Neem die voorbeeld van die menigte mense wat op Pinksterdag 33 G.J. gedoop is. Hoe het hulle aan die vereistes voldoen? Eerstens het hulle as Jode en Joodse proseliete ’n goeie agtergrondkennis van Jehovah God, sy handelinge met sy volk en Bybelprofesieë oor sy beloofde Messias gehad. Tweedens het hulle meer juiste kennis ingeneem deur middel van ’n geïnspireerde getuienis wat die apostel Petrus daardie dag gegee het. Met watter resultaat?

“Toe hulle dit hoor, is hulle diep in die hart getref en het vir Petrus en die ander apostels gesê: Wat moet ons doen, broeders? En Petrus sê vir hulle: Bekeer julle, en laat elkeen van julle gedoop word in die Naam van Jesus Christus tot vergewing van sondes, en julle sal die gawe van die Heilige Gees ontvang” (Handelinge 2:37, 38). Let op dat Petrus se getuienis nie oppervlakkig was nie. “Hy het lank met hulle gepraat terwyl hy baie redenasies gebruik het.” Hulle is deur sy redenering oortuig en hulle het wat hy gesê het, aangeneem en is gedoop. “Op daardie selfde dag is omtrent drieduisend by hulle getal gevoeg.”—Handelinge 2:40, 41, The Jerusalem Bible.

Dieselfde vereistes is vandag nodig vir doop wat skriftuurlik geldig is: (1) juiste kennis, (2) opregte berou en (3) bekering, of om jou tot God te wend en jou van “hierdie verkeerde geslag” af te wend. Daarbenewens moet die doop wat skriftuurlik geldig is “in die naam van Jesus Christus” wees, dit wil sê gegrond op die aanneming van sy losprysoffer vir die vergifnis van sondes en onderwerping aan hom as God se gekroonde koning.—Handelinge 2:40; Romeine 5:12-19; 7:14-25.

Regskapenes wat aan die skriftuurlike vereistes vir doop voldoen, hoef nie te vrees dat dit God sal mishaag as hulle weer gedoop word nie. Inteendeel, wanneer mense wat aan die vereistes voldoen hulle op ’n skriftuurlik korrekte wyse laat doop, verskaf dit God vreugde.

[Voetnoot]