Van ons lesers
Gesin trotseer die Nazi’s Ek is 90 jaar oud en studeer saam met Jehovah se Getuies. Ek het die artikel “O Jehovah, laat my dogtertjie tog getrou bly!” (22 September 1993) gelees. Dit het vertel van Getuie-ouers en hulle dogter wat ’n heldhaftige stryd gevoer het om Jehovah se leringe te gehoorsaam al is hulle wreed deur Hitler onderdruk. Ek het gehuil terwyl ek dit gelees het. Ek is vasbeslote om met ’n selfs ernstiger gesindheid kennis van Jehovah se leringe op te doen.
S. T., Japan
Hierdie ondervinding het my diep geraak. Simone Arnold Liebster was maar net ’n dogtertjie, was sonder haar ouers en is vanweë haar gehoorsaamheid aan Jehovah in ’n verbeteringskool gevange gehou. Wat ’n wonderlike voorbeeld van geloof!
M. C. L. S., Brasilië
Die vertroue op Jehovah asook die liefde, waardigheid en krag wat sy sowel as haar ouers uitgeleef het, het my beweeg om my verhouding met Jehovah opnuut te ondersoek. Dit het my nietig laat voel en het my gehelp om die geestelike aanwinste van volharding en geloof te waardeer.
V. B., Australië
Eensaamheid Ek het die artikels oor eensaamheid (22 September 1993) drie of vier keer gelees. Julle stel voor dat ’n mens moet ronddans, sing en vrolik optree. Maar julle het nie gemeld hoe ’n chemiese wanbalans selfmoordgevoelens in iemand kan veroorsaak nie.
P. C., Verenigde State
Die artikels was nie op diegene gemik wat aan ernstige depressie ly of selfmoordneigings het nie, wat oor die algemeen spesiale sorg vereis. Dit was eerder aan diegene gerig wat vanweë neerdrukkende omstandighede, soos die dood van ’n geliefde, tye van eensaamheid deurmaak. Materiaal oor depressie is gepubliseer in ons nommer van 22 Oktober 1987 en ook in die artikel “Jongmense vra . . .” in hierdie nommer.—RED.
Noorderligte Ek het julle artikel “Geheimsinnige ruiters van die hemelse winde” (22 September 1993) oor die aurora borealis geniet. Maar julle het nagelaat om te noem dat die ligte ook vanuit die noordelike en oostelike dele van Skotland gesien kan word. Daar is selfs ’n lied oor ‘die noorderligte van ou Aberdeen’!
G. S., Skotland
Dankie vir die bykomende inligting.—RED.
Natuurlewebeskerming Ek is die voorsitter van ’n plaaslike omgewingstigting. Dit is goed om akkurate artikels oor die omgewing te sien (“Wie sal ons wild beskerm?”, 8 November 1993). Dit is al jare lank my mening dat ons reeds sou vergaan het as dit nie vir God was nie.
M. S., Verenigde State
God het die aarde beslis met die vermoë gemaak om te kan herstel, wat ongetwyfeld die rede is waarom dit behoue gebly het ten spyte van die mens se pogings om dit te verderf. Maar dit is sy voorneme om uiteindelik “die verderwers van die aarde te verderf” (Openbaring 11:18).—RED.
Vigs Ek het die artikels oor vigs in die reeks “Jongmense vra . . .” (22 Augustus 1993, 8 September 1993) baie geniet. Ek is 20 jaar oud en was vroeër verleë oor die feit dat ek ’n maagd is. Maar nadat ek daardie artikels gelees het, het ek besef dat my maagdelikheid ’n gawe van Jehovah is.
L. K., Verenigde State
Om te kenne te gee dat heteroseksuele kontak dieselfde risiko as homoseksuele kontak inhou, is verkeerd. Alle navorsing dui daarop dat homoseksuele die grootste risiko loop om HIV op te doen.
J. S., Verenigde State
Navorsing toon dat homoseksuele inderdaad ’n groter risiko loop om met HIV besmet te word. Deskundiges sê nietemin dat besmetting wat deur heteroseksuele kontak plaasvind teen ’n angswekkende tempo toeneem. En volgens ’n woordvoerder van die Amerikaanse Administrasie vir Voedsel en Medisyne is vroue “dié deel van hierdie land se bevolking wat die vinnigste toename van HIV-besmetting ondervind”. Nie dat die vroue altyd die skuldiges is nie; baie word deur hulle losbandige mans besmet.—RED.