Jong mense vra . . .
Waarom is dit so moeilik om aan niks anders as die ander geslag te dink nie?
“Wanneer jy jonk is, is jy baie nuuskierig oor seks”, het jong Lorraine verduidelik. “Jy raak al hoe meer behep met seksuele sake.”
BESTEE jy baie—indien nie die meeste—van die tyd wat jy nie slaap nie daaraan om oor die ander geslag te dink, te praat of na hulle te kyk? Gaan sit jy om jou huiswerk te doen en voor jy jou kom kry, begin jy lugkastele bou oor die een of ander aantreklike seun of oulike meisie wat jy daardie middag gesien het? Loer jy kort-kort na aantreklike verbygangers terwyl jy met mense gesels? Is dit vir jou moeilik om te lees, te studeer of selfs by Christelike vergaderinge en byeenkomste aandag te skenk—bloot omdat jy aan niks anders as die ander geslag kan dink nie?
As dit wel die geval is, is jy dalk bang dat jy besig is om jou verstand te verloor! Een jong man het erken: “Ek dink ek is dalk seksbehep of iets. Ek bedoel, ek dink so baie aan meisies en fantaseer oor hulle . . . Dink jy ek is normaal?” Soos die skryfster Lynda Madaras sê, wanneer jy jonk is, “kan romantiese of seksuele gevoelens baie sterk wees. Soms lyk dit dalk selfs asof romanse en seks al is waaraan jy kan dink!”a
Seksuele gevoelens is nie op sigself verkeerd nie. God het die man en vrou geskep sodat hulle sterk tot mekaar aangetrokke voel. Dit was in ooreenstemming met sy voorneme dat hulle trou en ‘die aarde vul’ met regverdige nakomelinge (Genesis 1:28). Die Bybel is ook taamlik reguit waar dit toon dat geslagsomgang vir egpare groot genot kan verskaf.—Spreuke 5:19.
Die probleem is dat ons as onvolmaakte mense dit dikwels moeilik vind om ons gevoelens te beheers. (Vergelyk Genesis 6:5.) Dit voel moontlik of “die begeerlikheid van die vlees” oorweldigend is! (1 Johannes 2:16). En omdat jy jonk is, is dit dalk vir jou veral moeilik om nie heeltyd aan die ander geslag te dink nie. Waarom is dit so?
Die druk van puberteit
Een rede is dat jy “die bloei van die jeug” nader—die tyd wanneer seksuele begeertes op hulle sterkste is (1 Korinthiërs 7:36, NW). Dr. Bettie B. Youngs verduidelik: “Tydens puberteit styg hormoonvlakke drasties. Dit stel al die fisiese veranderinge in werking wat ’n kind se liggaam in ’n volwassene se liggaam laat verander. Die stygende hormoonvlakke wat met adolessensie gepaardgaan, bring talle emosionele en gedragsveranderinge te voorskyn.”
Watter soort veranderinge? Wel, die grootste veranderinge behels dikwels ’n mens se gevoelens teenoor die ander geslag. Die skryfster Ruth Bell sê: “Die liggaamsveranderinge wat tydens puberteit plaasvind, veroorsaak dikwels sterker seksuele gevoelens. Jy vind dalk dat jy meer oor seks dink, makliker seksueel gestimuleer word en by tye selfs behep raak met seks. Verskeie tieners [met wie ons ’n onderhoud gevoer het] het beskryf hoe hulle, terwyl hulle straat af geloop of in ’n bus gesit het, gevoel het asof hulle hele liggaam weens seksuele energie en opwinding getintel het.” So ’n beheptheid met die ander geslag is een van die talle “begeerlikhede van die jonkheid” waarmee jongmense te kampe het.—2 Timotheüs 2:22.
Die invloed van die media en vriende
Die vlam van hierdie begeerte word egter dikwels deur invloede van buite aangeblaas. Ons leef in ’n gemeenskap wat blykbaar daarop uit is om seksuele bedrywighede deur middel van televisieprogramme, advertensies, boeke, tydskrifte, musiek en rolprente aan te moedig. Een jong Christen wat hom aan seksuele wangedrag skuldig gemaak het, vertel: “Pornografie is iets redelik algemeens by die skool en dit skep ’n ware drang na seks. Ek het geweet wat is reg, maar my seksuele gevoelens was sterk.”
’n Boek wat vir ouers geskryf is, sê dus: “Die media [het] ’n diepgaande invloed. Ons tieners sien jong modelle van hulle eie ouderdom wat uitlokkend optree en prikkelende klere adverteer; hulle sien geslagsomgang onder adolessente in die rolprente en op televisie.” Trouens, kabeltelevisie en videokassetopnemers het talle jongmense maklike toegang tot eksplisiete pornografie gegee. “Die media maak ’n jong persoon se nuuskierigheid gaande en stimuleer sy begeertes”, erken een jong persoon.
’n Boek hoef egter nie op elke bladsy pornografies te wees om onheilsaam te wees nie. Beskou die voorbeeld van een Christenmeisie. Sy vertel: “Ek het ’n taamlike goeie boek gelees wat net een of twee paragrawe oor geslagsomgang gehad het. Ek het daardie paragrawe eers oorgeslaan, maar iets het my laat terugblaai en dit laat lees. Wat ’n fout was dit tog! Ek het vreeslike drome as gevolg daarvan gehad.”
Jou vriende en metgeselle kan ook ’n groot invloed op jou denke hê. ’n Boek oor die ontwikkeling van adolessente sê: “Om meisies en seuns dop te hou, is ’n algemene tydverdryf wat op straathoeke, in skoolsale, kafeterias en inkopiesentrums plaasvind.” En wanneer jongmense nie na lede van die ander geslag staar nie, is hulle dikwels besig om oor hulle te gesels. “Toe ek jonger was”, erken die 18-jarige Robert, “was die druk om geslagsomgang te hê baie groot . . . Dit was al waaroor die geselsery in die kleedkamer gegaan het.” ’n Ander tiener erken: “Seks was die hoofonderwerp van gesprekke onder skoolmaats, en daarom kon jy nie help om daaroor te dink nie.”
Dit is moeilik om anders te wees. Wanneer jou portuurs gedurig oor die ander geslag praat—moontlik op ’n slegte, onsedelike wyse—is dit dalk moeilik om nie saam te praat nie. Maar die Bybel waarsku: “Gaan met die wyse om, dan word jy wys; maar hy wat met dwase verkeer, versleg.”—Spreuke 13:20.
Die belangrikheid daarvan om gebalanseerd te wees
Beteken dit dat dit verkeerd is om na die ander geslag te kyk of oor hulle te wil gesels? Nee, selfs Bybelskrywers het opgemerk dat sekere mans en vroue fisies aantreklik was. (Vergelyk 1 Samuel 9:2; Ester 2:7.) Jesus het iemand dus nie veroordeel net omdat hy opgemerk het dat ’n vrou aantreklik is nie. Maar hy het Christene wel streng vermaan om nie ‘aan te hou om na ’n vrou te kyk om hartstog vir haar te hê’ nie (Mattheüs 5:28, NW). Op ’n soortgelyke manier kan jy nie toelaat dat jy deur blinde hartstog gelei word nie. In 1 Thessalonicense 4:4, 5 word ons vermaan: “Elkeen van julle moet leer om sy eie liggaam te beheers op ’n manier wat heilig en eerbaar is, nie in hartstogtelike wellus soos die heidene wat God nie ken nie.”—New International Version.
Hoewel erotiese gedagtes van tyd tot tyd by ’n mens kan opkom, kan dagdromery daaroor amper in ’n beheptheid daarmee verander en kan ernstige probleme dan ontstaan. Prediker 5:3 sê: “Want ’n droom kom beslis weens ’n oorvloed van werk.” Ja, iemand wat met persoonlike begeertes behep is, begin dikwels ongesonde fantasieë en dagdrome koester.b
Hoewel dit normaal is om van tyd tot tyd erotiese gedagtes te hê, is dit ’n ander saak om daaroor te fantaseer. Die skryfster Ruth Bell sê “’n persoon vind soms dat hy of sy byna die hele dag en nag fantaseer. Hierdie fantasieë kan selfs werkliker as die werklikheid self word.” Neem die voorbeeld van ’n jong meisie wat verlief geraak het. Sy sê: “Ek is 12 1/2 jaar oud en ek voel baie sterk aangetrokke tot ’n seun wat na dieselfde Koninkryksaal as ek gaan. Ek weet ek is nog nie oud genoeg om afsprake te maak nie, maar ek vind dit baie moeilik om my emosies oor hom te bedwing.” Party jongmense vind dit ook moeilik om te lees, te studeer, in die klas op te let of vir Christelike vergaderinge voor te berei wanneer hulle kop vol romantiese of seksueel stimulerende gedagtes is.
Ernstige probleme kan ook ontstaan wanneer ’n jong persoon sulke begeertes deur masturbasie probeer bevredig. Die Bybel spoor Christene aan: “Maak dood dan julle lede wat op die aarde is, naamlik hoerery, onreinheid, hartstog, slegte begeertes en gierigheid” (Kolossense 3:5). Masturbasie is ’n onrein gewoonte wat Christene moet vermy en is presies die teenoorgestelde as wanneer jy ‘hartstog doodmaak’. Trouens, dit stimuleer en voed eerder hartstog. Heel dikwels word so ’n begeerte ’n werklikheid. Die Bybelskrywer Jakobus verduidelik: “Elkeen word versoek as hy deur sy eie begeerlikheid weggesleep en verlok word. Daarna, as die begeerlikheid ontvang het, baar dit sonde.”—Jakobus 1:14, 15.
Wat kan jy dan doen sodat jy nie heeltyd aan die ander geslag dink nie? Lees asseblief die volgende artikel in hierdie reeks.
[Voetnote]
a Daarenteen herinner die skrywer Alvin Rosenbaum jongmense: “Seksuele gevoelens en denkwyses verskil baie. Party mense kan blykbaar nie ophou om aan seks te dink nie, terwyl ander glad nie seksuele gevoelens het nie. . . . Albei reaksies is normaal.” Hy sê verder: “Elke mens ontwikkel teen ’n ander tempo.”
b Sien die artikels oor dagdromery wat in die nommers van 8 Julie en 22 Julie 1993 van hierdie tydskrif verskyn het.
[Lokteks op bladsy 25]
‘Romantiese of seksuele gevoelens kan baie sterk wees’
[Prent op bladsy 26]
TV-programme en tydskrifadvertensies bevorder dikwels ’n ongesonde belangstelling in die ander geslag