Jong mense vra . . .

Hoe kan ek ophou om heeltyd aan die ander geslag te dink?

‘DAG na dag val die media tienderjariges se sedelike karakter aan deur seks op te hemel; rockliedjies oor seksuele verhoudings weerklink in hulle ore; ’n stortvloed van trefferliefdesverhale verander seksuele werklikhede in fantasieë wat maklik vir soetkoek opgeëet kan word.’ Dit is die woorde van die skryfster Lesley Jane Nonkin. Ja, die media bombardeer jou as tienderjarige met aanmoediging om oor die ander geslag te dink.

Dit is natuurlik normaal om ’n mate van belangstelling in die ander geslag te hê.a Maar wanneer romantiese gedagtes, dagdromery en fantasieë jou denke só oorheers dat dit jou slaap, gebede, huiswerk, Bybellees of huishoudelike take belemmer, dui dit daarop dat die situasie al ’n tyd lank gevaarlik is. So ’n ongesonde beheptheid kan tot verkeerde gedrag lei.—Jakobus 1:14, 15.

Dit wil nie sê jy moet nou glad nie in die rigting van meisies—of seuns—kyk nie. Maar soos Spreuke 23:12 sê, moet jy ‘jou hart na die tug bring’. Nee, daar is geen maklike oplossing, geen towerpil wat jou dit kan help doen nie. Maar met inspanning kan jy sorg dat jou gedagtes meer gebalanseerd raak. Kom ons kyk na ’n paar praktiese maniere waarop jy dit kan doen.

Let op met wie jy assosieer

Let noukeurig op met wie jy assosieer. Een jong man erken: “Almal om jou praat oor geslagsonsedelikheid asof dit so normaal is soos om te gaan uiteet.” Kan gedurige blootstelling aan sulke praatjies ’n uitwerking op jou hê? Ongetwyfeld. Volgens een opname onder jeugdiges het drie kwart van hulle erken “dat die mate waarin hulle ’n deel van (of nie ’n deel van) die groep is hulle gesindheid ten opsigte van seks bepaal”.

Wat van jou vriende? Dwaal elke gesprek af na ’n vurige bespreking oor iemand van die ander geslag? Het sulke gesprekke die neiging om handuit te ruk en onkuis of suggestief te raak? As dit die geval is en jy saam gesels—of net luister—sal dit vir jou moeilik wees om jou denke op rein dinge gerig te hou. Die Bybel maan: “Nou moet julle ook dit alles aflê, naamlik toorn, woede, boosheid, laster, skandelike taal uit julle mond.”—Kolossense 3:8.

Maar dit sal moeilik wees om hierdie raad toe te pas as jou vriende min waardering vir Bybelbeginsels het; hulle gesindheid sal jou mettertyd beslis beïnvloed (Spreuke 13:20). Beskou die ondervinding van een Christenmeisie, wat gesê het: “Ek wou nie die kinders op skool vertel dat ek een van Jehovah se Getuies is nie. Hulle het dus die hele tyd vryelik met my oor seks gepraat.” Dit was nie lank nie of sy het haar aan geslagsonsedelikheid skuldig gemaak en het swanger geraak. Spreuke 9:6 gee die wyse vermaning: “Verlaat die geselskap van onkundige mense, en lewe. Volg die weg van kennis” (Today’s English Version). Ja, soek die geselskap op van vriende wat jou Christelike sedes en standaarde deel, vriende wat jou geestelik kan opbou—nie afbreek nie.

Selfs jong Christene wat oor die algemeen ’n godvrugtige gesindheid toon, kan eweneens van tyd tot tyd ‘in woorde struikel’ (Jakobus 3:2). Wat kan jy doen as dit gebeur en die gesprek in ’n verkeerde rigting begin beweeg? Die Bybel sê vir ons dat koning Salomo verlief geraak het op ’n jong herdersmeisie. Maar sy was nie op hom verlief nie. Toe sommige van haar jong metgeselle haar gevoelens vir Salomo probeer opwek het, het sy nie toegelaat dat hulle haar met romantiese praatjies bestook nie. Sy het gesê: “Ek smeek julle . . . moenie die liefde wakker maak en aanvuur voor die tyd daarvoor ryp is nie” (Hooglied 2:7, NAV). Jy moet eweneens dalk op ’n ferm manier sê hoe jy voel wanneer ’n gesprek handuit ruk. Nee, dit beteken nie jy moet vir jou vriende preek nie. Maar jy kan net die onderwerp probeer verander en oor iets opbouenders begin gesels.

Vermaak—Die belangrikheid daarvan om selektief te wees

Nog iets wat van belang is, is vermaak. Die jongste rolprent, video of laserplaat lyk of klink miskien só aanloklik. Maar die Bybel herinner ons: “Alles wat in die wêreld is—die begeerlikheid van die vlees en die begeerlikheid van die oë en die grootsheid van die lewe—is nie uit die Vader nie, maar is uit die wêreld” (1 Johannes 2:16). Soos vroeër gemeld is, is die meeste hedendaagse vermaak daarop gerig om seksuele gevoelens op te wek. Gewilde liedjies en rolprente het byvoorbeeld al hoe meer eksplisiet—dikwels pornografies—geraak.

Watter uitwerking kan dit op jou hê as jy jou aan sulke vermaak blootstel? Die skrywer John Langone sê: “Etlike studies het getoon . . . dat ons meer geneig is om oor seks te praat wanneer ons aan erotiese materiaal blootgestel word. Soms is die gevolg van hierdie blootstelling dat ons dinge probeer doen wat ons normaalweg nie sal probeer het nie.” Ja, om jou ‘met vleeslike dinge besig te hou’, sal jou net kwaad doen (Romeine 8:5). Dit sal jou ’n verwronge beskouing van liefde en seks gee en jou verstand met onrein fantasieë vul. Wat is die Bybel se raad? “Laat ons ons van alle besoedeling van die vlees en die gees reinig, en laat ons die heiligmaking in die vrees van God volbring” (2 Korinthiërs 7:1). Bly dus weg van rolprente, video’s en laserplate wat romantiese begeertes opwek.

’n Ongetroude Christenman het eenkeer hierdie praktiese raad gegee: “Moenie jou gedagtes met onheilsame dinge vul net voor jy gaan slaap nie. Baie TV-programme wat laat in die aand vertoon word, is taamlik suggestief.” Dieselfde geld vir talle boeke. ’n Jong Christen met die naam Sherry erken: “Ek het altyd liefdesverhale gelees. Ek het dan oor seks gefantaseer en oor die opwindende lewe en rondslapery van die karakters gedroom.” Met haar gedagtes vol romantiese fantasieë was dit vir haar maklik om by liefkosery met ’n jong man betrokke te raak. Jy kan sulke probleme vermy deur slegs opbouende leesstof—soos hierdie tydskrif en sy medetydskrif, Die Wagtoring—te lees. Sulke leesstof het baie jongmense gehelp om ‘hulle besig te hou met die geestelike dinge’, pleks van die sondige vlees.—Romeine 8:5.

Raak ontslae van daardie fantasieë!

Soms kom gedagtes oor die ander geslag miskien skielik, sonder enige waarskuwing, in jou verstand op. Die 17-jarige Scott erken: “Daar is tye dat ek dit baie moeilik vind om nie aan seks te dink nie.” Of dalk sien jy bloot ’n aantreklike seun of meisie. Voor jy dit besef, dink jy aan hom of haar. Maar dit is een ding om op te merk dat iemand aantreklik is en iets heeltemal anders om te doen waarteen Jesus ons gewaarsku het, naamlik dat jy “aanhou om na ’n vrou te kyk om hartstog vir haar te hê”. (Mattheüs 5:28, NW; vergelyk Spreuke 6:25.) As jy te jonk is om te trou, kan dit jou net ontmoedig en neerslagtig maak as jy jou aan verloklike, romantiese fantasieë oorgee.—Vergelyk Spreuke 13:12.

Scott sê dus: “Wat my help, is om die onderwerp te verander—om aan iets te dink wat nie my gevoelens prikkel nie. Ek herinner my daaraan dat die gevoelens of drange naderhand sal weggaan.” (Vergelyk Filippense 4:8.) Die apostel Paulus het gesê: “Ek kasty my liggaam en maak dit diensbaar” (1 Korinthiërs 9:27). Jy moet dalk ook streng met jouself wees wanneer gedagtes oor die ander geslag by jou begin posvat. As die gedagtes voortduur, kan jy ’n bietjie liggaamlike oefening probeer doen. Liggaamlike oefening het nou wel “min voordeel”, maar om ’n paar minute lank vinnig te gaan stap of ligte oefeninge te doen, is dalk al wat jy nodig het om jou denke in die regte rigting te stuur.—1 Timotheüs 4:8, NW.

Baie jongmense het ook gevind dat dit veral help om ‘altyd oorvloedig in die werk van die Here te wees’ (1 Korinthiërs 15:58). Jong Debra het dit so gestel: “Ek vind die geheim is om besig te bly tot jy doodmoeg is.” As jy ten volle by die Christengemeente en al sy bedrywighede betrokke raak, kan dit jou baie help om jou denke gebalanseerd te hou.

Maar al probeer jy hoe hard, dit is dalk soms steeds moeilik om aan iets anders as die ander geslag te dink. As dit die geval is, kan jy gerus by ’n volwassene om hulp aanklop. Miskien kan jy die probleem met een van jou ouers bespreek. Let op wat jong Carl gesê het: “Dit het my gehelp om die probleem met iemand te bespreek wat ouer en ervare is. Hoe openhartiger die gesprek is, des te beter.” Bowenal moet jy nie die hulp wat jy van jou hemelse Vader kan kry oor die hoof sien nie. “Wanneer ek seksuele drange voel opwel”, sê een ongetroude Christenman, “dwing ek myself om te bid.” Die Bybel sê: “Laat ons dan met vrymoedigheid na die troon van die genade gaan, sodat ons barmhartigheid kan verkry en genade vind om op die regte tyd gehelp te word” (Hebreërs 4:16). Nee, God sal nie jou belangstelling in die ander geslag wegneem nie. Maar met sy hulp kan jy ontdek dat daar baie ander dinge is om oor te dink.

[Voetnoot]

[Prent op bladsy 17]

As praatjies oor die ander geslag handuit ruk, moet jy die moed hê om die onderwerp te verander