Ons beskou die wêreld
Inflasie van eenmiljoen persent
Volgens die Federale Statistiekburo het die inflasiekoers in die Federale Republiek van Joego-Slawië in Desember 1993 tot ’n miljoen persent gestyg. Die lewenskoste was 2839 keer hoër as die vorige maand en 6 biljoen keer hoër as aan die begin van die jaar. Papiergeld is gevolglik waardeloos binne ’n paar dae nadat dit uitgereik is. Om by te bly, het die sentrale bank nulle van die dinar begin weglaat. Binne net drie maande het 5 biljoen dinar ’n blote 5 dinar geword.
Godsdiensbetrokkenheid
In ’n opname het meer as 90 persent van die Amerikaners wat ondervra is, gesê dat hulle in God glo, en meer as 40 persent het beweer dat hulle elke week kerkdienste bywoon. Volgens ’n Gallup-opname wat in 1992 gedoen is, woon 45 persent van die Protestante in die Verenigde State en 51 persent van die Katolieke in enige gegewe week kerkdienste by. Onlangse studies toon egter dat baie meer mense sê dat hulle godsdienstig is en gereeld kerk toe gaan as wat werklik die geval is. Volgens een navorsingspan woon slegs 20 persent van die Protestante en 28 persent van die Katolieke in werklikheid kerkdienste weekliks by. ’n Ander navorsingspan het gevind dat slegs 36 miljoen volwasse Amerikaners—19 persent—hulle godsdiens gereeld beoefen en dat byna ’n derde van die Amerikaners oor 18 se uitkyk heeltemal sekulêr is. “Hoewel godsdiens ’n deel van die Amerikaanse kultuur is, neem slegs ’n minderheid dit ernstig op”, sê Newsweek. “Die helfte van die Amerikaanse bevolking beweer dat hulle aan ’n godsdiens behoort wat nie die gehalte of die wese van hulle gesindhede of gedrag beïnvloed nie.”
Dreigende waterskaarstes
“Aangesien sneeu en reënval betreklik konstant is, is hernieubare water hoofsaaklik beperk”, sê die tydskrif Science. “Teen die jaar 2025 sal bykans driemiljard mense wat in lande woon waar daar ’n waterskaarste is daardeur geraak word”, en reeds “teen die jaar 2000 sal lande in Afrika en die Midde-Ooste veral swaar getref wees”. Volgens ’n verslag van die Population Action International is baie lande reeds besig om hulle grondwaterbronne uit te put, en ’n aantal lande onderskei nie in hulle langtermynbeplanning tussen nie-hernieubare en hernieubare water nie. Hoewel daar pogings aangewend is om watervoorrade te verbeter, is dit tot dusver deur die bevolkingsaanwas verydel.
Die deure word vir vlugtelinge gesluit
Daar is nou meer as agt keer soveel vlugtelinge as twee dekades gelede, sê Sadako Ogata, die VN se Hoë Kommissaris vir Vlugtelinge, en dit het aanleiding gegee tot “’n onrusbarende toename van vyandige en xenofobiese gesindhede”. Teen die einde van verlede jaar het 19,7 miljoen vlugtelinge buite hulle tuislande gewoon, en nog 24 miljoen is binne hulle eie grensgebiede ontwortel. Wêreldwyd word 1 uit elke 125 mense as gevolg van geweld, burgeroorlog of vervolging ’n normale huislike lewe ontneem. Dit het “die wêreld se vermoë om te help” en die “mensetradisie om heenkome te bied”, oorweldig, sê The Washington Post, waar dit oor hierdie eerste wêreldstudie van vlugtelinge kommentaar gelewer het. ’n Hele paar lande wat reeds gebuk gaan onder resessie en moeg is vir die skynbaar onoplosbare konflikte het stappe gedoen om hulle deure vir vlugtelinge te sluit. “Feitlik al die konflikte ter wêreld wat gedurende . . . 1993 daartoe gelei het dat mense vlugtelinge geword het, het binne die grense van lande en nie tussen lande nie plaasgevind”, het die studie gesê, en het vir ’n internasionale beleid gevra om burgeroorloë te beëindig. Intussen staar ’n “minder gasvrye
klimaat” vlugtelinge in die gesig.
Pous steun deur-tot-deur-werk
Voorstanders van die Katolieke Neo-Kategumene-beweging het aan Johannes Paulus II se oproepe gehoor gegee toe hulle ingestem het om van deur tot deur en in die strate van Rome en sy voorstede te preek. Die nuusblad La Repubblica sê hierdie “spraaksame mededingers van Jehovah se Getuies” sal “Jesus se lewensverhaal vertel”. Die eerste groep bestaan uit slegs 15 gesinne, maar die pous hoop dat die projek “oral goeie vrugte sal afwerp”. Waarom is hierdie nuwe projek aangepak? Die Katolieke hiërargie besef dat hy “sy vermoë om te bekoor, sy godsdiensaantreklikheid, verloor het”, sê die sosioloog Maria Macioti, en die pous moedig sulke bewegings aan “om bekeerlinge deur middel van ’n sterk emosionele aantrekkingskrag te win”. Die Katolieke skrywer Sergio Quinzio voeg by: “Dit is asof hy geen geleentheid deur die vingers wil laat glip nie, in die hoop, of die illusie, dat enigiets nuttig kan wees.”
Ekologiese ramp in Rusland
“Viktor Danilow-Daniljan, Rusland se Minister van Omgewingsake, het 15 persent van Rusland se landoppervlak as ’n ekologiese rampgebied verklaar”, sê die Duitse nuusblad Frankfurter Allgemeine Zeitung. Volgens die berig is die helfte van Rusland se landbougrond ongeskik vir boerdery en woon meer as 100-000 mense op plekke waar die radioaktiwiteit te hoog is. Verder word daar berig dat tienduisende mense gesterf het weens vergiftiging in fabrieke waar chemiese wapens vroeër vervaardig is. Lew Fjodorow, die president van die Unie vir Chemiese Veiligheid, het gesê: “Uit ’n mediese oogpunt gesien, het ons voorbereiding vir ’n chemiese oorlog rampspoedige gevolge gehad.”
Gewelddadige kinders
Kinders wat mense vermoor, beroof, verkrag en martel, word in baie lande aangetref en
gevalle van geweld en wreedheid is aan die orde van die dag. Die aantal moorde wat in die Verenigde State deur jeugdiges onder 18 gepleeg is, het in die laaste vyf jaar met 85 persent toegeneem. Net so ontstellend is die astrante gesindheid van baie van die oortreders. Wat is vir hierdie veranderinge verantwoordelik? “Ons aggressiewe samelewing, met sy verwaterde standaarde, het geweld aanvaarbaar gemaak”, sê die Duitse nuusblad Der Spiegel. “Duidelike standaarde van reg en verkeerd, goed en sleg, . . . is vandag skaars herkenbaar.” Dit voeg by: “Jong misdadigers is ook slagoffers. Hulle is ’n weerspieëling van die grootmenswêreld waarin hulle opgroei. . . . Elke gewelddadige kind het ongelooflike hoeveelhede geweld waargeneem en geassimileer.” Deur middel van die TV sien kinders “die hele planeet se geweld”. Hulle word beïnvloed deur gewelddadige video’s, rekenaarspeletjies en liedjies wat moord en ander gewelddadighede verheerlik. TV-programme bevorder geweld as ’n redelike manier om probleme op te los en geskille te besleg. “Ons samelewing het onmenslik geword”, sê die sielkundeprofessor Stefan Schmidtchen van Hamburg, “en ons kinders is ook besig om so te word.”
Laat jou baba by jou slaap
“Ons sal nie net SSSS (Sindroom van Skielike Sterfte by Suigelinge) laat afneem nie, maar ons sal ook gesonder en gelukkiger babas grootmaak as moeders net een ding sou doen: Hulle babas die eerste jaar saam met hulle bed toe neem, pleks van hulle in hulle eie bedjies af te sonder”, sê James McKenna, ’n professor aan die Pomona-kollege in Kalifornië. Wanneer ’n baba by ’n ouer slaap, “help dit om die baba se liggaamsfunksies dwarsdeur die nag te reguleer”, berig The Dallas Morning News. Toetse het bevestig dat babas se “asemhalingspatrone, hartklop en slaapfases met dié van hulle moeder ooreenstem”, wanneer ’n baba langs sy moeder slaap. En omdat die moeder en kind gewoonlik met hulle gesig na mekaar toe lê, kan die baba maklik aan die moeder drink wanneer hy ook al wil. “Babas wat alleen in hulle bedjies slaap, ondervind sensoriese deprivasie”, sê mnr. McKenna. “Ons dink dit kan tot ’n gebrek aan uiters belangrike intellektuele ontwikkeling lei en tot toestande wat moontlik die SSSS-risiko verhoog.” Statistiek toon dat SSSS baie laer is in lande waar dit gebruiklik is dat babas by hulle moeder slaap.
Israel en die Vatikaan sluit ’n ooreenkoms
Ná jare van weiering en ná 17 maande van onderhandelinge het die Vatikaan ’n diplomatiese ooreenkoms met Israel gesluit. Afgevaardigdes van albei kante het kalotte gedra terwyl die Adjunkminister van Buitelandse Sake, Yossi Beilin, namens Israel en die Adjunkminister van Buitelandse Sake, monsignor Claudio Celli, namens die Vatikaan geteken het. Monsignor Celli het gesê: “Die Heilige Stoel is daarvan oortuig dat gesprekvoering en eerbiedige samewerking tussen Katolieke en Jode nou opnuut momentum en krag in Israel asook regoor die wêreld gegee sal word.” Die ooreenkoms verbind die Vatikaan daartoe om anti-Semitisme te beveg, en Israel onderneem om die kerk vrye meningsuiting te gee sowel as die reg om maatskaplike programme in Israel te organiseer. Sekere sake moet nog afgehandel word, soos die belastings op kerkeiendomme in Israel en die toegang tot heilige plekke. Hoewel die kwessie oor Jerusalem nie in die ooreenkoms genoem is nie, hoop die Vatikaan om nou seggenskap in die uiteindelike status van die stad te hê.
Biologiese verdrag word wet
’n Verdrag wat in Junie 1992 deur 167 lande in Brasilië onderteken is, het aan die begin van hierdie jaar internasionale privaatreg geword. Dit word die Konvensie oor Biologiese Diversiteit genoem en dit verbind die lande wat die ooreenkoms onderteken het daartoe om maniere te vind waarop die diere, plante en mikro-organismes sowel as die nodige habitats binne hulle grense beskerm kan word. Daar word van hierdie lande vereis om wette uit te vaardig wat bedreigde spesies beskerm en om openbare bewustheid oor die oordeelkundige gebruik van biologiese bronne en die noodsaaklikheid van bewaring te bevorder. Die wete dat dier- en plantsoorte teen ’n ontstellende tempo uitsterf en die vrees dat die helfte van alle oorblywende spesies teen die jaar 2050 kan verdwyn, het tot die verdrag aanleiding gegee. Die ondertekenaars sal later vanjaar vergader om te besluit hoe die verdrag sal funksioneer.