Hoe moet ’n baba slaap?

REGOOR die wêreld het die Sindroom van Skielike Sterfte by Suigelinge (SSSS) al die lewens van baie babas geëis. In die Verenigde State is dit die grootste doodsoorsaak onder babas tussen die ouderdomme van 1 maand en 12 maande. Is daar ’n manier om die risiko te verminder? Volgens The Journal of the American Medical Association (JAMA) toon navorsing wat in onlangse jare gedoen is dat dit lyk of die risiko van SSSS aansienlik afneem wanneer babas op hulle rug slaap en nie op hulle maag nie. Verskeie lande het programme begin om ouers bewus te maak van die verband tussen slaapposisie en SSSS. In Australië, Engeland, Denemarke, Nieu-Seeland en Noorweë het SSSS met ten minste 50 persent afgeneem ná een of twee jaar van openbare veldtogte wat onder mense se aandag gebring het dat dit beter is om babas op hulle rug te laat slaap.

Presies wat die verband is tussen ’n baba se slaapposisie en SSSS is nie bekend nie, maar party navorsers beweer dat ’n baba wat op sy maag slaap weer die lug wat hy uitgeasem het, kan inasem en dat die koolstofdioksiedvlak in sy bloed sodoende verhoog word. Die baba se liggaam kan ook te warm word omdat dit nie hitte so goed vrystel wanneer hy op sy maag lê nie. Hoe dit ook al sy, babas wat op hulle rug of op hulle maag neergelê word, is geneig om in daardie posisie te bly. Studies dui ook daarop dat dit beter is om ’n normale, gesonde baba op sy rug neer te lê as om hom op sy sy neer te lê.

Waarom verkies ma’s een slaapposisie bo ’n ander? JAMA sê dat ma’s dikwels net die algemene gebruik volg—hulle lê hulle babas op dieselfde manier in die bed neer as wat hulle eie ma of ander in hulle gemeenskap dit sal doen. Of hulle doen dit dalk soos hulle gesien het dit in die hospitaal gedoen word. Party ma’s voel ook dat hulle baba ’n sekere posisie verkies of beter in daardie posisie slaap. Baie ma’s lê die baba gedurende die eerste maand getrou op sy rug neer, maar begin hom later op sy maag neerlê. “Hierdie neiging is kommerwekkend”, sê JAMA, “omdat die risiko van SSSS die hoogste is onder babas wat tussen 2 en 3 maande oud is.” Dokters probeer ouers van klein babatjies inlig oor wat hulle sê ’n eenvoudige, doeltreffende maatreël is om die risiko van SSSS te verminder—om gesonde babas op hulle rug neer te lê wanneer hulle gaan slaap.a

[Voetnoot]