Die opkoms en val van Satanisme

Sataniese rituele word uitgevoer deur swartgeklede priesters in donker kelders wat gebede opsê oor vasgebinde slagoffers op ’n altaar, met flikkerende kerse wat onheilspellende skaduwees op die mure gooi terwyl hulle hulle god, Satan, aanbid. Die jong deelnemers op hierdie reis tot in die okkulte word verenig deur die geheime kennis van die een of ander gedeelde verborgenheid waaraan daar ’n sweem van die bonatuurlike kleef, en hulle geniet die opwinding in die atmosfeer. Hulle staan nader met ’n misterieuse gevoel van eksklusiwiteit wat aan hulle alleen behoort.

’n Onskadelike, verbygaande gier? Of ’n demoniese boosheid wat algemeen in die hedendaagse gemeenskap voorkom?

DAAR is al bladsye vol geskryf in koerante, tydskrifte en boeke oor die grusame dade van sataniese kultusse. Besonderhede oor die wydverspreide bedrywighede van wrede sataniese groepe is landwyd op televisie en oor die radio uitgesaai. Dit het in die klein sowel as groot stede van Amerika, Kanada en Europa ’n baie ernstige probleem vir die polisie geword.

Satanisme het ’n spesiale lokkrag vir die jeug van vandag. Die stigter van die Kerk van Satan verduidelik in die tydskrif ’Teen vir Junie 1993 waarom dit die geval is: “Pleks van ons lede te beveel om hulle natuurlike drange te onderdruk, leer ons hulle dat hulle uiting moet gee daaraan. Dit sluit fisiese wellus, wraaksug en die drang na materiële besittings in.”

Hoeveel genot moet Satan tog nie uit hierdie duiwelgeïnspireerde ideologie put nie, aangesien dit loodreg teen Goddelik geïnspireerde Christelike beginsels indruis!

Satanisme beleef ’n opkoms. Dit is ’n toenemende bedreiging, maar sy einde is op hande. Daar hang ’n doodsvonnis oor sy god. Ook oor Satan se wêreld en die ondersteuners daarvan, omdat “die hele wêreld in die mag van die Bose lê” (1 Johannes 5:19; Romeine 6:16). Aan Satan se aanbidders en aan alle ander wat wetend of onwetend Satan se belange bevorder, is Jehovah se boodskap: “Die God van vrede sal die Satan spoedig onder julle voete verbrysel.”—Romeine 16:20.

Watter toekoms sal “die God van vrede” dan vir die lydende mensdom bring? Die volgende drie artikels sal die opkoms en val van Satanisme bespreek, asook die toestande op aarde wat dit gaan vervang.