Die jeug van vandag—’n Maklike prooi vir Satanisme?
“SATANAANBIDDING neem toe onder die jeug”, het ’n Finse koerant van 27 Februarie 1993 berig. Volgens inligting wat die polisie van Tampere, Finland, ingewin het, bring kriminele wat by die dwelmhandel betrokke is jongmense, en veral meisies, met Satanisme in aanraking. In baie gevalle is hierdie slagoffers en nuwe rekrute kinders tussen 10 en 15 jaar. “Satanaanbidding het vrugbare grond onder vandag se jong tieners gevind”, het die koerant berig.
“Die oplewing van Satanaanbidding is nie net ’n plaaslike (Finse) tendens nie”, het die koerant gewaarsku. “Die Suid-Afrikaanse koerant die Johannesburg Star het byvoorbeeld onlangs gewaarsku dat Satanaanbidding die blanke welgestelde jongmense van die land beïnvloed.” Satanaanbidding is gewis internasionaal ’n nagmerrie vir sowel ouers as kinders.
Satanisme belowe op ’n bedrieglike wyse hoofsaaklik dat jy baie in ruil vir bitter min sal kry. “Aanbid die duiwel; doen sy vuil werk, en in ruil daarvoor sal hy vir jou gee wat jy wil hê. En dit is waarom sommige kinders Satanisme so aantreklik vind”, het die tydskrif ’Teen verduidelik.
“Ek glo daarin om my lewe uit te leef”, het ’n jong tiener gesê wat erken dat hy lid van ’n sataniese groep is. “Ek sien twee magte in die natuur: die goeie en die bose. Al die dinge wat volgens mense boos is, is die dinge wat jou gelukkig maak. Sonde lei tot emosionele, fisiese en verstandelike bevrediging”, het hy gesê.
Toe ’n speurder in Denver, Colorado, VSA, wat ’n deskundige op die gebied van sataniese kultusse is, gevra is waarom hy dink dat tieners so ontvanklik vir Satanisme is, het hy geantwoord: “Ek sal nooit vergeet wat een tienderjarige Satanis vir my gesê het nie. Hy het gesê: ‘Wat is daar om voor te lewe? Ons gaan vir vandag lewe en doen wat ons wil. Daar’s geen toekoms nie.’”
Dr. Khalil Ahmad, die direkteur van die adolessentedienste by die Nova Scotia-hospitaal in Dartmouth, Kanada, het sy mening uitgespreek oor Satanisme se lokkrag. “Tieners soek opwinding. Diegene met min wilskrag, dikwels die verloorders, word deur [satanisme] aangetrek. Dit gee hulle ’n valse magsgevoel.”
Nog ’n welbekende polisie-gesaghebbende oor Satanisme, ’n speurder van San Francisco, wys op die probleem: “Ons wêreld is ’n onverskillige plek. Ons is meer oor onsself bekommerd as oor mekaar. Ons lewe in ’n gewelddadige, negatiewe gemeenskap. Kinders beskou dit as normaal en word gevolglik by Satanisme betrek.”
Hoe diep is die jeug van vandag by Satanisme betrokke? “Kinders maak hulleself en hulle vriende dood. Ons het ’n probleem”, het Larry Jones, president van die Cult Crime Impact Network en luitenant in die polisiemag van Boise, Idaho, VSA, gesê. Nog ’n polisiebeampte, van die staat Illinois, wat die gang van Satanisme noukeurig volg in sy rol as ’n hoërskool-polisievoorligter, het gesê dat 90 persent van die jongmense wat met Satanisme eksperimenteer, betrokke raak omdat dit ’n gier is, maar dat 10 persent “meegevoer word en dieper en dieper verstrik raak”.
Die “Godsdiens”-rubriek van ’n skoolkoerant in Brooklyn, New York, School News Nationwide, vir Januarie-Februarie-Maart 1994 het ’n artikel gepubliseer met die titel “Waarom Satanisme tieners aantrek”. Die artikel het berig: “Nadat twee seuns in die hoërskool se kafeteria baklei het, het die wenner opgespring en ’n vreemde handsein gemaak, ’n gebalde vuis met sy wysvinger en pinkie in die lug. Die kunsonderwyser kon nie verstaan waarom soveel kinders prente teken van demoonagtige manne met bokkoppe nie. En boeke oor die okkulte het voortdurend uit die skoolbiblioteek verdwyn.
“Die kinders het in werklikheid met die mag, die magiese krag, die geheimsinnigheid van Satanisme gespeel. Vir die meeste was dit pret en opwindend. Vir party was dit ’n ernstige saak—dodelik ernstig vir die 17-jarige Lloyd Gamble—wat sy lewe in ’n sataniese offerande verloor het.
“Ná Lloyd se dood en ná sy 15-jarige broer vir die moord in hegtenis geneem is, het die volwassenes van die Monroe-distrik die tekens begin verstaan wat voorheen so geheimsinnig was: die ‘duiwelsteken’-handsein, die bokkop-prente en die boeke wat die tieners se verbeelding, rituele en towerspreuke gevoed het.”
Dit lyk asof daar geen einde is aan die berigte oor kinders en tieners wat hulle ouers en ander familielede as gevolg van Satanaanbidding doodmaak nie. Kinders is al deur ander kinders in sulke rituele doodgemaak. Soos sataniese volwassenes, het kinders diere vermink en doodgemaak. Troeteldiere is op ’n altaar van sataniese rituele geoffer. Die ruimte ontbreek om selfs ’n gedeeltelike dekking te gee van die onmenslike optrede deur kinders wat Duiwelaanbidding as godsdiens aangeneem het.
Is hierdie gevalle voorbeelde van kinders wat net eksperimenteer met Satanisme? Tref ’n mens net hier en daar iemand aan wat diep by Duiwelaanbidding betrokke is, en is hulle die uitsondering? Glad nie, is die antwoord van diegene wat die bedrywighede van hierdie okkultiste ondersoek het. David Toma, ’n voormalige speurder in die polisie se sede-afdeling wat ’n motiveringspreker geword het, het gesê dat hy dieselfde vraag in elke skool waar hy leerlinge toespreek, vra: “Hoeveel van julle ken iemand of het al van iemand gehoor wat by Sataniese gebruike betrokke is?” Hy skat dat “ten minste een derde van die leerlinge hulle hand opsteek”.
Volgens Shane Westhoelter, die president van die Nasionale Inligtingsnetwerk, is van 30 tot 40 persent van die hoërskoolleerlinge by die een of ander vorm van die okkulte betrokke. Daarbenewens beweer mnr. Westhoelter dat tot 70 persent van alle misdade wat deur tieners jonger as 17 jaar gepleeg word die gevolg van betrokkenheid by die okkulte is.
[Lokteks op bladsy 5]
Satanaanbidding het vrugbare grond onder vandag se jongmense gevind