Radiale keratotomie—Wat is dit?

Die Ontwaak! verskaf hier inligting oor die chirurgiese prosedure wat as radiale keratotomie bekend staan, oor wat dit vir ’n mens kan doen en oor die gevare wat moontlik daarby betrokke is. Die Ontwaak! beveel nie hiermee die gebruik daarvan aan nie. Dit is elkeen se verantwoordelikheid om, nadat hy persoonlik ondersoek ingestel het, te besluit of hy dit moet laat doen of nie.

RADIALE KERATOTOMIE (RK) het onlangs in party lande groter publisiteit deur middel van die televisie, tydskrifte, koerantartikels en die radio gekry. Dit was oor die afgelope twee jaar die hoofonderwerp van bespreking by internasionale oogheelkundige kongresse. Hoewel hierdie operasie al meer as 20 jaar lank verrig word en etlike jare vroeër deur mediese navorsers beskryf is, word dit nou eers gewild. Al hoe meer oogchirurge woon seminare by en leer om die operasie te doen.

Miljoene mense word bysiende gebore of word bysiende. Wat beteken “bysiende”? Dit beteken dat jy voorwerpe wat ver is nie duidelik kan sien sonder die hulp van ’n bril of kontaklense nie. Gewoonlik kan bysiende mense sonder ’n bril lees, maar hulle hou die materiaal dikwels naby om die regte fokus te kry.

Radiale keratotomie is ’n chirurgiese prosedure wat, as dit op bysiende mense uitgevoer word, die behoefte aan ’n bril om ver te kan sien, probeer verminder of uitskakel. Die operasie verander die vorm van die horingvlies sodat die beeldbrandpunt op in plaas van voor die retina val, soos in bysiendheid. Die insnydings word gedoen deur radiale snitte op die buitenste lae van die horingvlies na die rand van die visuele gedeelte te maak om die middelpunt van die visie helder te maak. Die insnydings wissel in diepte, lengte en getal.

Nie ’n nuwe operasie nie

Die eertydse Chinese het die probleem van bysiendheid probeer oplos deur met sandsakke op hulle oë te slaap. Die resultate was slegs tydelik. Reeds in 1894 het mediese tydskrifte melding gemaak van chirurgiese metodes om die horingvlies te korrigeer of te wysig. Sedertdien het chirurge in Suid-Amerika, en later in Japan, tegnieke beskryf om die vorm van die horingvlies chirurgies te verander om helder visie teweeg te bring. Die Japannese se ondervinding het ’n Russiese chirurg aangespoor om die metode te wysig en dit suksesvoller te maak.

Toe die resultate betroubaar geblyk het, het verskeie chirurge uit ander lande die operasie waargeneem. Hulle het by etlike geleenthede teruggekeer om die resultate waar te neem en het daarna die chirurgie in hulle eie land ingevoer. Teen 1979 is verhandelings geskryf met beskrywings van die tegniek, die resultate en die wysigings wat nodig is om al hoe groter sukses te behaal. Al is hierdie prosedure dalk vir jou iets nuuts, is dit vir die chirurgiese professie niks nuuts nie.

Om die publiek te beskerm, is ’n studie in die Verenigde State by verskeie navorsingsentrums gedoen om die doeltreffendheid van hierdie chirurgiese metode te bewys of te weerlê, en die uitslae is gedurende die tagtigerjare gepubliseer in die sogenaamde PERK-studie. Die Amerikaanse Akademie vir Oftalmologie het hierdie tegniek toe erken as ’n doeltreffende metode om miopie (bysiendheid) te verminder.

Moet jy RK laat doen?

Hoe kan jy, noudat ons iets omtrent RK se ontwikkeling te wete gekom het, weet of dit ’n tegniek is wat jy moet oorweeg? ’n Volledige oogondersoek is die eerste stap. Nadat ’n geneesheer beslis het dat jou oë vir hierdie operasie geskik is, kan die kanse op sukses vir jou mate van miopie aangedui word. Hoe ernstiger die miopie is, hoe kleiner is die kanse op sukses.

As jy deur die oogondersoek vir RK goedgekeur word, sal jy ’n baie ervare refraktiewe chirurg of RK-chirurg wil vind. In die meeste groot stede is daar ten minste een deskundige met etlike jare ondervinding. Deur seminare by te woon, die verslae van ondervindinge na te gaan en met voormalige pasiënte en ander oftalmoloë te gesels, kan jy waarskynlik ’n oftalmoloog vind wat deurgaans goeie resultate behaal.

Tussen 1991 en 1992 het die aantal oftalmoloë in die Verenigde State wat hierdie operasie doen van 13 persent tot 25 persent toegeneem. Dit beteken dat sommige nog onervare op hierdie gebied is, maar dit bewys ook dat die prosedure al hoe meer aanvaar word. Deskundiges op dié gebied doen nou ’n dringende versoek dat nuwe chirurge opleiding moet ontvang sodat hulle die talryke komplikasies kan vermy wat die vroeë chirurge ondervind het.

Voordat jy op die operasie besluit, is dit goed dat jy jou eie huiswerk oor die operasie doen sodat jy die vrae kan stel waarop jy die antwoord moet weet. Suksesvolle chirurge kan die toestand van elke pasiënt noukeurig ontleed en die operasie aanpas om die uitslag te beheer. Hulle benader elke geval op ’n individuele grondslag en pas die operasie by die individu aan. Navorsing het bewys dat die aantal insnydings sowel as die diepte en lengte daarvan die uitslag bepaal. Die pasiënt se ouderdom, geslag, oogdruk en oogvorm is ander oorwegings. Jou chirurg kan ander faktore in ag neem om die allerbeste resultaat te verseker.

As jy weet hoeveel jaar die chirurg hierdie operasie al doen en hoeveel gevalle hy of sy gehad het, gee dit jou ’n aanduiding van sy of haar ondervinding. Onlangse artikels in mediese tydskrifte het voorgestel dat ’n gerekenariseerde videobeeldmasjien, wat ’n topograaf genoem word, standaardtoerusting vir ’n refraktiewe chirurg moet wees. Hoe beter die toerusting, hoe beter die kanse dat jou operasie geslaagd sal wees.

Die operasie

Wat kan jy verwag as jy besluit om hierdie operasie op jou te laat doen? Daar word intensiewe voorbereiding voor die operasie gedoen, en dit sluit ’n oogondersoek, ultraklankmetings van die oog en sy dikte, krommingsmetings, oogdrukmetings en moontlik gerekenariseerde videotopografie in. Met al hierdie gegewens word jou operasie beplan. Wanneer jy die toestemmingsvorm verstaan en dit onderteken het, kry jy gewoonlik ’n kalmeermiddel.

Wat die toestemmingsvorm betref, kom ons bespreek party van die gevare wat op die vorm gemeld word. Hierdie operasie word op die buitenste lae van die oog gedoen. Die algemene newe-effekte is probleme met skerp lig, ligte wat strale soos sterre het, wisselende visie, ’n gevoel dat daar iets in jou oog is, droë oë en algemene bewustheid van die oog, wat ure, dae, weke of maande kan duur. Die oog word deur die insnydings verswak. Die tydperk waartydens die oog swakker is, wissel van persoon tot persoon. Baie komplikasies kan uitgeskakel word deur na-operatiewe oogdruppels te gebruik en die instruksies met betrekking tot die beperking van bedrywighede te volg. ’n Gehoorsame pasiënt verhoog sy kanse op sukses.

Wat is die volgende stap noudat jy gereed is vir die operasie? Binne 30 minute nadat jy ’n ligte kalmeermiddel geneem het, stap jy na die RK-operasiekamer. Jou ooglede word skoongemaak en ’n doek word oor jou gesig geplaas. Die laaste metings word dalk op hierdie tydstip geneem en die chirurgiese instrumente word vir noukeurigheid onder ’n mikroskoop ondersoek. Plaaslike verdowingsdruppels word in jou oog gesit. Sodra die oog verdoof is, word ’n spekulum daarin geplaas om te voorkom dat jy dit knip. Jy kyk stip na ’n lig en die middelpunt van jou visie word gemerk as ’n punt waarvandaan die chirurg kan werk. ’n Templaat word dan op die oog geplaas om die snypatroon af te merk, en dan begin die operasie.

In minder as 20 minute is die operasie verby. Die oog word gewoonlik ’n ruk lank bedek, maar binne 24 uur kan jy ’n verbetering in jou bysiendheid begin opmerk. Die groot veranderinge in visie vind oor die volgende 7 tot 30 dae plaas. Slegs klein veranderinge vind ná drie maande plaas, en ná ’n jaar is daar redelike stabiliteit. Oor die volgende 20 jaar sal omtrent 1 uit 4 pasiënte verdere veranderinge in hulle visie opmerk.

Nie almal moet dit laat doen nie

Ons het iets oor komplikasies gesê. Laat ons nou ’n bietjie meer gesels oor die newe-effekte—die verwagte en die onverwagte. RK korrigeer nie alle gevalle van miopie nie. Dit help in feitlik elke geval, maar daar is party mense met miopie vir wie dit nie help nie. Party ondervind wisselende miopie. Dit beteken dat hulle visie in die oggend verskil van dié in die aand. Dit is veral opmerklik in mense wat heeldag voor ’n rekenaarskerm sit. Die oorgrote meerderheid van RK-pasiënte ondervind dit nie permanent nie, maar ’n klein persentasie ondervind dit wel. Talle kla ná ’n RK-operasie dat ligte in die aand te skerp is, maar dit is weer eens nie die meerderheid wat hieroor kla as ’n permanente toestand nie. Mense met droë oë wat dalk as gevolg daarvan nie meer kontaklense gedra het nie, sal tot ses maande lank verdere droogheid ondervind. Party het oorkorreksie, wat veroorsaak dat hulle nie juis naby kan sien nie en sonder kontaklense of ’n bril nie goed ver kan sien nie. Dit is nie baie algemeen nie, maar gebeur wel met party RK-pasiënte.

Die visie kan in die eerste drie maande ná die operasie aangetas word deur algemene gesondheidsprobleme, ontsteltenis, swangerskap, geneesmiddels, werkveranderinge, oefenroetines, dieetveranderinge en veral ’n gebrek aan rus. Een RK-chirurg het gesê dat mense wat gereeld met gewigte oefen gewoonlik nog operasies nodig het om hulle verwagte visiedoelwit te bereik. Daar is baie dinge wat ’n uitwerking op die daaglikse visie het, veral gedurende die eerste drie maande. Die pasiënt moet gedurende die genesingstydperk veranderinge in visie verwag.

RK is nie so noukeurig dat dit altyd ’n bril of kontaklense kan vervang nie, aangesien hulle by jou spesifieke behoeftes aangepas kan word. RK-chirurgie is ’n algemene benadering, en dit is selde dat RK-pasiënte ná die operasie ’n bril verkies. Dit is ook moontlik om net een oog te laat korrigeer sodat jy een oog het om ver te sien en een om naby te sien. Verfynings kan wel ná ’n RK-operasie gedoen word as die visiedoelwit nie bereik is nie en as daar meer gedoen kan word. Dit vereis ’n baie ervare chirurg om presies te weet hoeveel chirurgie nog gedoen kan word.

Stel ondersoek in en besluit dan

As jy hierdie operasie oorweeg, is die beste raad om soveel inligting moontlik oor die onderwerp in te win, aangesien jy die regte vrae moet stel om reguit antwoorde te kry. Gaan dan na verskeie RK-chirurge voordat jy besluit watter benadering jy verkies (Spreuke 15:22). Jy vind moontlik uit dat die prosedure jou kan help en dat jou visie aansienlik kan verbeter.

’n Verslag is onlangs by ’n vergadering in Salt Lake City, Utah, VSA, ingedien oor ’n studie van RK-pasiënte wat ook oftalmoloë was. Hierdie pasiënte het feitlik eenparig gesê dat hulle gelukkig was met die resultate van die operasie—slegs 2 persent was neutraal, maar 98 persent van hulle was gelukkig.

Dit is beslis ’n aangename ondervinding om elke oggend met helder visie wakker te word en nie ’n bril hoef op te sit nie! Dit gaan in die nabye toekoms geskied, nie deur chirurgie nie, maar deur Goddelike krag. God se nuwe stelsel sal vir almal daar wat eens ’n bril gedra het helder visie meebring, maar nuwe visie sal veral opwindend wees vir diegene wat nog nooit voorheen kon sien nie! “Dan sal die oë van die blindes geopen . . . word.”—Jesaja 35:5.

[Diagramme/Prente op bladsy 25]

(Sien publikasie vir oorspronklike teksuitleg)

Die algemene resultate van ’n RK-operasie

Met ’n normale oog val die beeldbrandpunt duidelik op die retina

Retina

Helder visie

Die bysiende oog is te lank vir beelde om die retina te bereik

Retina

Dowwe visie

’n Patroon van agt radiale snitte maak die horingvlies effens platter

Ná RK laat die oog die brandpunt toe om die retina te bereik, en dit het helder visie tot gevolg

Retina

Helder visie

[Foto-erkenning op bladsy 22]

The Complete Encyclopedia of Illustration/J. G. Heck