Jong mense vra . . .

Hoe kan ongehude moeders hulle omstandighede ten beste benut?

LINDA het gevoelens van skok, ontkenning, vrees, woede, radeloosheid en wanhoop ervaar.a Toetse het haar grootste vrees bevestig—sy was drie maande swanger. Linda, ongetroud en net 15 jaar oud, is net een van ’n miljoen tieners wat elke jaar in die Verenigde State swanger word. Tienerswangerskappe is egter ’n wêreldwye probleem wat alle etniese en sosio-ekonomiese groepe raak.

Sommige tienermeisies dink dat swangerskap hulle van ’n ongelukkige huislewe sal bevry of ’n verhouding met ’n kêrel hegter sal maak. Ander beskou ’n baba as ’n statussimbool of as iets wat hulle eie is en wat hulle kan koester en liefhê. Maar die wrede werklikheid van enkelouerskap verdryf gou sulke lugkastele. ’n Ongehude moeder moet noodgedwonge moeilike, dikwels pynlike, besluite neem. Sy moet dalk ook worstel met ekonomiese probleme, emosionele wanhoop, eensaamheid en die druk om ’n kind sonder ’n eggenoot groot te maak. Ons Skepper waarsku Christene dus met goeie rede om te “vlug vir die hoerery”, wat

voorhuwelikse omgang insluit.—1 Korinthiërs 6:18; Jesaja 48:17.

Geslagsonsedelikheid word nie onder Jehovah se Getuies geduld nie (1 Korinthiërs 5:11-13). Daar is nietemin jong ongehude moeders onder hulle. Sommige het swanger geword voordat hulle van God se standaarde geleer het. Ander is as Christene grootgemaak, maar het voor onsedelikheid geswig. Sommige toon berou oor hulle verkeerde dade ná hulle deur die gemeente gedissiplineer is. Watter hulp en leiding bied God se Woord aan sulke jongmense?b

Moet ek met die pa trou?

Die Bybel maak dit duidelik dat aborsie in stryd is met God se wet. (Exodus 20:13; vergelyk Exodus 21:22, 23, NW; Psalm 139:14-16.) Dit leer ook dat ’n ongehude moeder, ten spyte van die ongewenste omstandighede van die swangerskap, die verantwoordelikheid het om voorsiening te maak vir haar kind (1 Timotheüs 5:8). Dit is in die meeste gevalle beter dat die meisie die kind eerder self grootmaak as om die kind te laat aanneem.c

Weens die probleme wat dit meebring om ’n kind alleen groot te maak, dink sommige moeders miskien dat dit verstandig sal wees om met die kind se pa te trou. Maar baie tienervaders voel so te sê geen verpligting teenoor die kind of die moeder nie. Die meeste jong vaders is buitendien nog van skoolgaande ouderdom en werkloos. Een navorser noem so ’n huwelik “’n potensieel onstabiele huwelik wat net aangegaan word om ’n buite-egtelike geboorte te voorkom”, en dit kan ’n slegte situasie net vererger. Onthou ook dat die Bybel Christene beveel om “net in die Here” te trou (1 Korinthiërs 7:39). Omdat sy dit besef het, het Linda (wat aan die begin genoem is) besluit om nie met die 18-jarige pa van haar kind te trou nie. Sy verduidelik: “Hy het glad nie in God of die Bybel belanggestel nie.”

Dit beteken nie noodwendig dat jy die jong vader glad nie in ag moet neem nie. Wanneer die kindjie ouer word, sal hy dalk sy biologiese vader wil leer ken. Of miskien voel die jong vader of sy ouers ’n morele verpligting om ’n verhouding met die kind te hê of om finansiële bystand te verleen. Maar dalk verkies ’n meisie se ouers dat sy niks met die jong man te doen het nie (1 Thessalonicense 4:3). In party lande het die howe egter ongetroude biologiese vaders regte toegestaan wat soortgelyk is aan dié van getroude vaders. Om vriendelike betrekkinge met die ongetroude vader en sy familie te handhaaf, kan dus ’n onaangename stryd om toesig oor die kind verhoed.d Hoewel ’n mate van kontak met die jong vader dalk nodig is, moet dit nie in ’n romantiese of andersins gevaarlike atmosfeer wees nie. Volwasse toesig is gewoonlik raadsaam.

Waar om hulp te kry

Die boek Surviving Teen Pregnancy sê: “As jy besluit om jou baba te hou en groot te maak, kies jy om onmiddellik die grootmenswêreld te betree. . . . Jy kies om ’n deel van jouself agter te laat wat meer kommervry was, wat minder verpligtinge of verantwoordelikhede gehad het.” ’n Tienerouer het dus hulp en ondersteuning nodig. Dit kan ’n senuweeagtige jong moeder baie help om vertroue in haar kindersorgvermoëns te ontwikkel as sy geskikte mediese lektuur (wat maklik in ’n openbare biblioteek gevind kan word) lees.

Ouers se ondersteuning is veral waardevol. Jou moeder kan ’n ware skatkis van ondervinding wees wat die grootmaak van kinders betref. Dit sal weliswaar miskien moeilik wees om hulp te vra. ’n Meisie se ouers kan nog steeds seergemaak en verbitterd wees. Hulle kan ook vrees dat die swangerskap ’n negatiewe uitwerking op hulle eie lewenstyl sal hê. “My ouers was ontsteld omdat daar soveel dinge was wat hulle wou doen”, sê die 17-jarige Donna. “Nou sê hulle hulle kan dit nie meer doen nie omdat ek hierdie baba het.” Mettertyd verwerk die meeste ouers hulle pynlike emosies en is hulle bereid om op die een of ander manier te help. ’n Berouvolle jeugdige kan baie doen om die spanning te verlig deur te erken dat sy pyn veroorsaak het en opreg om verskoning te vra.—Vergelyk Lukas 15:21.

Sê nou die meisie se ouers weier om te help, of kan eenvoudig nie bekostig dat sy voortgaan om by hulle te woon nie? In lande waar staatshulp voorsien word, kan ’n ongehude moeder moontlik nie anders as om daarvan gebruik te maak nie—ten minste in die begin. Die Bybel laat Christene toe om van sulke voorsienings gebruik te maak. Maar dit sal beteken dat jy volgens ’n baie streng begroting moet lewe. “Dit lyk asof geld my grootste probleem is”, sê die 17-jarige Sharon. “Ek kan kos en doeke koop, maar dis al.” Mettertyd sal dit dalk moontlik wees om te gaan werk. Dit sal nie maklik wees om ’n balans tussen moederskap, werk en geestelike aktiwiteite te vind nie, maar ander het dit al met welslae gedoen.

Lewe saam met wysheid en onderskeidingsvermoë

As jou ouers tegemoetkomend is, kan dit werklik voordelig wees om by die huis te bly pleks van op jou eie te woon. Dit is gewoonlik goedkoper om by die huis te woon. Verder kan die bekende omgewing van jou huis jou ’n gevoel van veiligheid en sekuriteit gee. Dit is dalk ook vir ’n meisie makliker om met haar skoolopleiding voort te gaan as sy by die huis bly. Deur haar hoërskoolopleiding te voltooi, verbeter ’n meisie haar kanse aansienlik om ’n lewe van armoede vry te spring.e

Dit kan natuurlik vir al die betrokkenes stres en druk veroorsaak as drie geslagte een huis deel. Die ongehude moeder het moontlik ’n probleem met beknopte woonkwartiere. Ouers en ander kinders in die huis sal moontlik daaraan gewoond moet raak dat hulle slaap deur ’n baba se gehuil versteur word. Die gesinsroetine kan ontwrig word. Maar Spreuke 24:3 sê: “Deur wysheid word ’n huis gebou, en deur verstand word dit bevestig.” Ja, as al die betrokkenes onselfsugtige liefde en bedagsaamheid toon, kan wrywing in die gesin tot ’n minimum beperk word.

Probleme sal ook ontstaan as die jong moeder haar verantwoordelikheid probeer afskuiwe en verwag dat die ouma al die werk moet doen. (Vergelyk Galasiërs 6:5.) Die welmenende ouma kan andersins die sorg van haar kleinkind feitlik oorneem. Die boek Facing Teenage Pregnancy sê: “Grootouers wat die kind van ’n ongehude dogter grootmaak asof dit hulle eie is, kan tot die konflik binne die gesin en tot rolverwarring bydra.” Hoewel ’n grootouer se hulp en ondersteuning van onskatbare waarde is, dra die Skrif die verantwoordelikheid om kinders groot te maak aan die ouers op (Efesiërs 6:1, 4). Openhartige kommunikasie en samewerking kan dus baie daartoe bydra om misverstande te voorkom.—Spreuke 15:22.

Jy is nie alleen nie

Hoewel dit moeilik is om ’n buite-egtelike kind te hê, is dit nie die einde van ’n mens se lewe nie. God “vergeef menigvuldiglik” diegene wat berou oor hulle verkeerde dade het (Jesaja 55:7). ’n Ongehude moeder, wat soms deur gevoelens van selfverafskuwing oorval kan word, kan sulke gevoelens oorkom deur hieroor te peins. Wanneer sy ontmoedig voel, kan sy op Jehovah steun en hom in gebed nader. Sy kan ook God se hulp vra terwyl sy haar kind grootmaak.—Vergelyk Rigters 13:8.

Jehovah voorsien ook ondersteuning deur middel van die Christengemeente. Hoewel Jehovah se Getuies onsedelikheid nie vergoelik nie, neem hulle diegene in ag wat berouvol veranderinge in hulle lewe maak om God te behaag (Romeine 15:7; Kolossense 1:10). Sommige in die gemeente wil dalk graag op ’n bedagsame wyse praktiese hulp aan ’n enkelouer verleen. (Vergelyk Deuteronomium 24:17-20; Jakobus 1:27.) Op sy allerminste kan hulle vriendskap en ’n luisterende oor aanbied wanneer dit nodig is (Spreuke 17:17). Hoewel die ouers ’n ernstige sonde gepleeg het, is die kind onskuldig. Die gemeente kan dus help as die moeder die regte gesindheid toon.

Hoeveel beter is dit tog om God se wette in die eerste plek nie te oortree nie! Maar oortreders van God se wette wat berou gehad het oor hulle verkeerde weg en die nodige stappe gedoen het, kan seker wees van Jehovah se hulp om hulle omstandighede ten beste te benut.

[Voetnote]

[Prent op bladsy 23]

’n Ongehude moeder het hulp en ondersteuning nodig