Die Bybelse beskouing

Beloon God die mens?

JA, HY beloon die mens wel. Is dit dus selfsugtig om God met ’n beloning voor oë te dien? Nee, want hy self stel belonings vir sy getroue knegte in die vooruitsig. Trouens, as ’n God van geregtigheid en liefde verbind Jehovah hom daartoe om diegene wat hom dien te beloon. Sy Woord, in Hebreërs 11:6, sê gedeeltelik: “Die mens wat tot God nader moet geloof hê in twee dinge: eerstens, dat God bestaan en tweedens, dat God diegene beloon wat hom soek.”—Phillips.

As ’n mens ware geloof in God beoefen, verkry jy sy vriendskap, en hierdie vriendskap lei tot ’n beloning. God seën diegene wat sy guns ernstig soek.

Belonings is dade van liefde

Jehovah wil hê ons moet weet dat hy die soort God is wat diegene wat hom liefhet, beloon. Liefdevolle ouers soek byvoorbeeld na maniere om hulle kind te beloon wat huishoudelike takies gewillig en uit liefde vir die ouers doen. Die ouers voorsien dalk in meer as net die lewensbenodigdhede en beloon die kind met ’n spesiale geskenk. Soms kan die geskenk selfs geld wees wat gebank kan word sodat dit toekomstige sekuriteit aan die kind kan voorsien. Daarom is God nie soos mense wat geen waardering het of geen bedagsaamheid betoon teenoor diegene wat dinge uit liefde of lojaliteit doen nie. Jehovah is goedhartig en het ’n hegte verhouding met sy vriende. As jy vashou aan jou geloof in hom “sal [hy] jou nooit begewe en jou nooit verlaat nie”.—Hebreërs 13:5.

God waardeer en begunstig almal wat selfs die geringste diens aan hom verrig en bied hulle verdere geleenthede om hom te leer ken. Jesus se woorde in Mattheüs 10:40-42 lig dit toe: “Wie julle ontvang, ontvang My; en wie My ontvang, ontvang Hom wat My gestuur het. Wie ’n profeet ontvang omdat hy ’n profeet is, sal die loon van ’n profeet ontvang; en wie ’n regverdige ontvang omdat hy ’n regverdige is, sal die loon van ’n regverdige ontvang. En elkeen wat een van hierdie kleintjies net ’n beker kou water laat drink, omdat hy ’n dissipel is, voorwaar Ek sê vir julle, hy sal sy loon sekerlik nie verloor nie.”

Jesus is deur sy Vader, Jehovah, gestuur. Iemand wat dus Christus se dissipels gunstig ontvang—ongeag of hulle profete, regverdige manne of kleintjies is—ontvang Christus, sowel as God wat Christus gestuur het. Daardie persoon sal tog sekerlik geseën word; hy sal nie sonder beloning bly nie. Sy skatkis van geestelike besittings sal al hoe voller raak. Waarom? Omdat Jehovah selfs die geringste daad onthou wat ter ondersteuning van sy Koninkryk verrig word, en daardie daad sal beloon word.—Hebreërs 6:10.

Dit is interessant dat Petrus, ’n dissipel van Jesus, reguit vir Jesus gevra het of daar vir hom en sy medeapostels ’n beloning sou wees: “Kyk, ons het alles verlaat en U gevolg. Wat sal daar dan vir ons wees?” (Mattheüs 19:27). Jesus het nie die vraag as onvanpas beskou nie, maar het ’n duidelike antwoord gegee, deur te sê: “Elkeen wat huise of broers of susters of vader of moeder of vrou of kinders of grond ter wille van my Naam verlaat het, sal honderd maal soveel ontvang en die ewige lewe beerwe.”—Mattheüs 19:29.

Huidige en toekomstige belonings

Die antwoord wat Jesus gegee het, toon dat sy volgelinge nou sowel as in die toekoms beloon word. Een van die huidige belonings is dat hulle deel word van ’n groeiende, internasionale gesin van geestelike broers en susters. Terwyl die kerke van die Christendom weeklaag oor hulle kwynende lidmaatskap en gebrek aan steun, is die vergaderingsale van Jehovah se Getuies tot oorlopens toe vol. Honderdduisende nuwe Getuies word elke jaar gedoop.

Nog ’n beloning is die gemoedsrus sowel as die tevredenheid en geluk wat vriendskap met God en kennis van hom meebring. Ja, “godvrugtige toegewydheid tesame met vergenoegdheid” is ’n groot wins (1 Timotheüs 6:6, NW). Dit weerspieël waarlik ’n gelukkige geestestoestand wanneer ’n mens soos die apostel Paulus kan sê: ‘Ek het geleer om met die omstandighede waarin ek is, vergenoeg’, oftewel tevrede, te wees.—Filippense 4:11.

Kort voor sy dood het Paulus geskryf van ’n toekomstige beloning vir die “klein kuddetjie” van Jesus se gesalfde volgelinge—die beloning van ’n opstanding tot hemelse lewe: “Verder is vir my weggelê die kroon van die geregtigheid wat die Here, die regverdige Regter, my in dié dag sal gee; en nie aan my alleen nie, maar ook aan almal wat sy verskyning liefgehad het.”—Lukas 12:32; 2 Timotheüs 4:7, 8.

Die miljoene volgelinge van Jesus wat sy “ander skape” is, verwag die toekomstige beloning van die ewige lewe op ’n aarde wat in ’n paradys omgeskep gaan word (Johannes 10:16). En Jesus het die versekering gegee dat sy volgelinge wat sterf “in die opstanding van die regverdiges vergoed [sal] word”.—Lukas 14:14, NW.

Visualiseer die beloning

Dit is gepas om sulke seëninge te probeer visualiseer, hoewel niemand presies weet hoe dit sal wees nie. Kan jy die geluk voel wat beskryf word in Jesaja 25:8: “Hy sal die dood vir ewig vernietig, en die Here HERE sal die trane van alle aangesigte afvee”? Probeer jou die woorde van Jesaja 32:17 voor die gees roep: “Die werking van die geregtigheid sal vrede wees, en die voortbrengsel van die geregtigheid rus en veiligheid tot in ewigheid.” Ja, alle mense sal in ware vriendskap saamwerk (Jesaja 65:21-25). Selfs vandag lei vlytige werk tot gerieflike huise en produkte van uitstekende gehalte. In God se nuwe wêreld sal gesonde mense onder volmaakte toestande dus in staat wees om enigiets te skep wat nodig is om die lewe aangenaam te maak.—Psalm 37:4.

Die belonings wat God gee, word nie toegeskryf aan enige verdienstelike werk wat ons verrig nie, maar dit spruit voort uit sy liefde as ’n gawe ten spyte van ons oorgeërfde sondige toestand (Romeine 5:8-10). Daar is nietemin ’n verband tussen die verwagte beloning en ons gedrag. Ons moet Jehovah opreg soek met ’n sterk geloof en volharding (Hebreërs 10:35-39, vgl. NW). Met ander woorde, “wat julle ook al doen, doen dit met julle hele siel soos vir Jehovah en nie vir mense nie, omdat julle weet dat julle van Jehovah die erfenis as die gepaste beloning sal ontvang”. Ja, hy beloon die mens wel.—Kolossense 3:23, 24, NW.