Wanneer sal die tragedie eindig?

WANNEER sal kinders nie meer die slagoffers van ontvoering, mishandeling, uitbuiting en dikwels die slegte invloed van hulle portuurs wees nie? Sal strenger wetstoepassing en swaarder strawwe vir oortredings teen kinders hulle beskerm? Sal meer maatskaplike programme om voedsel, behuising en opvoeding te voorsien die mishandeling en weglopery stopsit? Sal dit ouers wat vir hulle kinders omgee, help as hulle beter kommunikasievaardighede geleer word om die illusie van opwinding teë te werk wat hulle kinders na vernietigende omgewings lok?

Hoewel sulke stappe van nut kan wees, sal kinders steeds aan baie lyding onderwerp word totdat die grondoorsaak van sulke tragedies uitgeskakel word. Volgens een jeugdige sal enige poging om die probleem van wegloopkinders die hoof te bied, maar wat nie die mishandeling of die verwaarlosing tuis voorkom nie, waarskynlik nie baie doeltreffend wees nie, aangesien die skade reeds aangerig is.

Die grondoorsaak

Wat is die grondoorsaak van al hierdie probleme? Hoe sal hulle uitgeskakel word? Die Bybel verduidelik dat die gesinseenheid aangeval word deur onsigbare, bose geesskepsele, Satan en sy demone, wat genot put uit wreedheid, seksuele uitbuiting en perversie (Genesis 6:1-6; Efesiërs 6:12). Toe Jesus op die aarde was, is kinders deur hierdie demone aangeval. Een jong seun het gely deurdat hy stuiptrekkings gekry en in ’n vuur gegooi is.—Markus 9:20-22.

Selfs eeue voordat Jesus op die aarde was, het demone hulle daarin verlustig dat jong kinders, wat aan gode soos Baäl, Kamos en Molog geoffer is, gefolter en doodgebrand is (1 Konings 11:7; 2 Konings 3:26, 27; Psalm 106:37, 38; Jeremia 19:5; 32:35). Daarom behoort dit ons vandag nie te verbaas nie dat, in hierdie wêreld wat al hoe meer verdorwe raak, demone kinders wil laat ly deur hulle deur middel van gewillige mense-agente te verneder, te pynig en dood te maak. Diegene wat sulke onmenslike misdade pleeg, voed dikwels hulle verstand met pornografie wat hulle perversies aanvuur.

Die druk wat die demone op die mensdom uitoefen, het in ons tyd toegeneem, want die Bybel noem hierdie tydperk in die geskiedenis “die laaste dae” van die huidige goddelose stelsel van dinge. Dit het voorspel dat dit “kritieke tye sal wees wat moeilik is om deur te kom”. Die invloed van die demone veroorsaak nou meer as ooit tevore dat mense die verdorwenheid van hierdie bose geesskepsele weerspieël. Die Bybel het voorspel dat mense in ons dag wreedaardig, sonder selfbeheersing, sonder natuurlike geneentheid en sonder liefde vir goedheid sou wees.—2 Timotheüs 3:1-5, 13, NW.

Dit is ’n goeie beskrywing van die gierige mense wat rolprente, musiek, tydskrifte en boeke vervaardig wat egbreuk, dwelms, selfmoord, moord, verkragting, bloedskande, perverse seks en foltering verheerlik. Deur hierdie asook ander maniere het die demone ’n kultuur bevorder wat, soos vuil lug, die verstande en harte van jonk sowel as oud besoedel het en gesinswaardes en godvrugtige sedelikheid vernietig het.

Die toename in die ontvoering, molestering en moord op kinders is ’n deel van die teken van die laaste dae. Boonop het die Bybel gesê dat ‘mense liefhebbers van hulleself, nie bereid tot enige ooreenkoms nie, dislojaal en verraaiers sal wees’. Deesdae word huweliksbande dus kort ná hulle gesluit is, verbreek. Namate egskeidings toeneem, neem die gevalle van ouers wat kinders ontvoer toe. Die mishandeling en moord op huidige of voormalige huweliksmaats neem ook toe, waarvan die oorgrote meerderheid van die slagoffers vrouens is. Ons sien dus ’n geslag van kinders wie se ouers hulle aanmoedig om weg te loop deur hulle te verwaarloos en te mishandel. Ons tyd word verder gekenmerk deur kinders wat “ongehoorsaam aan ouers” is, wat “eiesinnig” is en wat eerder verkies om saam met hulle portuurs om te gaan as om Goddelike waardes te respekteer.—2 Timotheüs 3:2-4, NW.

Die tragedie sal binnekort eindig

Die invloed van Satan en sy demone gaan egter binnekort eindig (Openbaring 12:12). Die profesie in Openbaring 20:1-3 sê dat God Satan en sy demone uit die weg gaan laat ruim. Daarna gaan God se hemelse Koninkryk, in die hande van Jesus Christus, in regverdigheid oor hierdie aarde regeer, reg laat geskied en die veiligheid van almal waarborg (Psalm 72:7, 8; Daniël 2:44; Mattheüs 6:9, 10). Die gierige kommersiële stelsels wat die armes onderdruk en menslike swakheid vir eie gewin uitbuit, sal tot die verlede behoort, want “die wêreld gaan verby en sy begeerlikheid” (1 Johannes 2:17). Almal wat goddeloosheid beoefen, sal uit die weg geruim word, soos Spreuke 2:22 voorspel: “Die goddelose sal uit die land uitgeroei . . . word.”

Miga 4:4 verduidelik dat almal veiligheid en vrede in God se nuwe wêreld sal geniet: “Daar sal niemand wees wat hulle laat bewe nie” (NW). Hoe is dit moontlik? Deur middel van die koninklike wet van liefde. Hierdie verhewe wet sal alle denke en dade rig. Diegene wat dan lewe, sal geleer het om Jesus en sy Vader, Jehovah God, se persoonlikheid te weerspieël, aangesien hulle nie toegelaat sal word om aan te hou lewe as hulle dit nie doen nie. Deur hulle met ‘innerlike ontferming, goedertierenheid, nederigheid en sagmoedigheid’ te beklee, sal selfsug geheel en al uit die menslike samestelling uitgeroei word (Kolossense 3:12). Die lewe sal oorloop van geluk; oor die hele aarde sal daar gesinne wees wat hartlikheid en liefde uitstraal.

Jesaja 65:21-23 belowe ’n oorvloed van voedsel en goeie huise vir almal: “Hulle sal huise bou en bewoon, en wingerde plant en die vrug daarvan eet. . . . Hulle sal hul nie tevergeefs vermoei of baar vir skielike ondergang nie.” Geen mishandeling meer nie. Geen lyding meer vir kinders of vir ouers nie.

Geniet nou die voordele

Kennis van Jehovah en van sy voorneme om hierdie aarde weer ’n paradys te maak, bevoordeel mense selfs nou, in die laaste ure van hierdie bose stelsel. Dit het talle jongmense en ouers hoop en ’n rede vir geluk gegee, selfs as hulle slagoffers van ons tyd was. Tamara, wat in ons vorige artikel genoem is, verduidelik byvoorbeeld wat in haar lewe gebeur het.

“Toe ek 18 was, het ek getrou en my ‘vriendekring’ min of meer verlaat, waarvan party in die tronk, in die kloue van dwelms of in prostitusie beland het. Ek het egter steeds dieselfde persoonlikheid gehad, en die argumente het dus met my man begin. Maar kort ná die geboorte van ons seuntjie het daar iets gebeur wat my lewe heeltemal verander het. Ek het ’n Bybel gevind en dit begin lees. Ek het een aand die hoofstuk in Spreuke gelees wat sê, ‘om wysheid te verkry, is soos om verborge skatte te vind’ (Spreuke 2:1-6). Voordat ek daardie aand gaan slaap het, het ek om daardie wysheid gebid. Die volgende oggend het Jehovah se Getuies my deurklokkie gelui. Ek het die Bybel saam met hulle begin studeer, maar dit het my ’n rukkie geneem om die dinge wat ek in die Bybel geleer het toe te pas. Ek het uiteindelik vasbeslote geraak om die Christelike leefwyse te volg en is gedoop. Nou help ek en my man ander om die verligting te ontvang wat God voorsien.”

Ja, Tamara het die Bron van alle verligting, Jehovah God, gevind. Hy is ’n hemelse Vader wat nooit diegene sal verlaat wat hom aanhang nie. Psalm 27:10 sê vir ons: “Want my vader en my moeder het my verlaat, maar die HERE sal my aanneem.”

Domingos, wat vroeër genoem is, het ook ’n ware familie gevind wat vertroosting, bemoediging en ondersteuning gebied het. Hy vertel: “Ek het eendag ’n eksemplaar van die boek Luister na die Groot Onderwyser ontvang, en ek was verbaas om uit te vind dat God ’n naam, Jehovah, het.a Ek het een van die vergaderinge van Jehovah se Getuies bygewoon en was verstom om te sien dat daar geen klasseonderskeid is nie. Die Getuies het die Bybel met my begin studeer ondanks my verslete klere, ongepoetstheid en die feit dat ek almal gewantrou het. Hulle het my geleidelik gehelp om van my vorige lewenswyse af te sien. Hulle het my selfs gehelp om werk te kry. Ek is uiteindelik gehelp om my vir doop te bekwaam.”

Die gemeentes van Jehovah se Getuies is soos ’n veiligheidsnet vir jongmense. Die Getuies help graag enigiemand wat van die wonderlike toekomshoop wil leer. Dit bring groot vertroosting vir diegene wat ’n verhouding met hulle hemelse Vader soek, aangesien die Getuies opgelei word om raad en leiding uit God se Woord die Bybel te voorsien. Een Getuie verduidelik dat jongmense gewys moet word dat die weersinwekkende situasie waarin hulle hulle moontlik bevind ook vir Jehovah weersinwekkend is. Die Getuie sê: “Jehovah wil nie hê dat kinders mishandel word nie. Hy wil nie hê dat hulle ongelukkig moet wees nie. Maar hy wil ook nie hê dat hulle een vorm van mishandeling vir ’n ander vorm van mishandeling verruil nie—mishandeling wat hulle op die straat kry nie. Hulle kan hulle tot volwasse persone in Jehovah se organisasie wend en met hulle oor hulle probleme praat en gehelp word om dit op te los.”

Vir kinders wie se harte ontvanklik is, bied God se Woord ’n kragtige aansporing om die strik van portuurdwang te vermy. Frances, ’n 17-jarige meisie, is deur ’n skoolmaat aangehits om ’n paar keer stokkies te draai sonder om haar ouers daarvan te vertel. Sy het uiteindelik van die huis af weggeloop. Ná sy haar ouers ure se kommer besorg het, het sy teruggekeer. Twee Getuies van haar gemeente het later besoek afgelê. Hulle het uitgevind dat die gesinsatmosfeer nie die oorsaak van die probleem was nie, en hulle het haar liefdevol raad gegee. Hulle het verduidelik dat jongmense die Christelike verpligting het om hulle ouers te respekteer (Efesiërs 6:1, 2); om oneerlikheid te vermy, aangesien sy stokkies gedraai het sonder om haar ouers te vertel (Efesiërs 4:25); en die belangrikheid daarvan om slegte assosiasie te vermy (1 Korinthiërs 15:33). Sy het positief gereageer.

Hulp van bo

Cheryl het ook hulp van Jehovah ontvang om die ontvoering van haar kinders deur haar voormalige huweliksmaat die hoof te bied.b Toe sy gevra is wat haar gehelp het om hierdie nagmerrie baas te raak, het sy gesê: “Ek het heel eerste die Psalms gelees, veral Psalm 35. Dit was bemoedigend om te weet dat Jehovah die onregverdigheid wat ek verduur het, gesien het.” Psalm 35:22, 23 sê: “HERE, U het dit gesien, swyg nie. Here, wees nie ver van my af nie! Ontwaak en word wakker vir my reg; . . . vir my regsaak.”

Ná twee jaar, met Jehovah se ondersteuning en hulp van die Getuies, het Cheryl haar gewese man gekonfronteer, en sy het haar kinders besoek. Sy kon bemoedigende antwoorde verskaf oor waarom dit met hulle gebeur het en het hulle verseker dat sy hulle nie verlaat het nie. Omdat Cheryl haar kinders geleer het om Jehovah te eer, kon sy vir hulle sê dat sy vertroue in hulle het. Sy het verduidelik: “Ek weet dat my kinders Jehovah liefhet, en hy sal nie toelaat dat hulle blywende leed aangedoen word nie.”

Dit is toe ook hoe dinge uitgewerk het. Omdat Cheryl aanhoudend na die buitelandse immigrasieamptenare teruggegaan het en deur ernstige gebed op Jehovah vertrou het, is haar kinders aan haar terugbesorg. Cheryl het gesê: “Ek moet werklik sê dat dit slegs deur Jehovah se hulp was dat ek hulle teruggekry het.”

Hoe belangrik is dit tog om ons kinders nou te leer wie Jehovah is en om hom te aanbid! Die Bybel sê in 1 Petrus 3:12 dat Jehovah se oë ‘op die regverdiges is en sy ore tot hulle gebed’. Jehovah is inderdaad ’n toevlug vir ons kinders. Sy naam is “’n sterk toring; die regverdige hardloop daarin en word beskut”.—Spreuke 18:10.

Hoewel ons in baie gevaarlike tye lewe en nie altyd weet wat met ons kinders gaan gebeur nie, weet ouers wat Jehovah aanbid dat hulle kinders wat getrou is geen blywende leed aangedoen sal word nie. Hy het selfs belowe om diegene wat as slagoffers van ons tye gely het uit die dood op te wek en om die pyn en lyding wat hulle ondergaan het uit te wis.—Jesaja 65:17, 18; Johannes 5:28, 29.

Die hoop van God se nuwe wêreld is iets wonderliks. So ook die wete dat God binnekort die aarde van Satan en sy bose stelsel gaan verlos. Daar sal geen bedreiging meer vir ons kinders wees nie. Een van die liedere wat Jehovah se Getuies by hulle gemeentelike vergaderinge sing, beskryf daardie nuwe stelsel so: “As kindersang ons hart verbly,/as vreug en vrede hier gedy,/sal jy selfs dooies sien verrys,/hou nou net jou oog op die prys”!

Wanneer jy weer van Jehovah se Getuies teëkom, kan jy hulle vra om jou te wys hoe jy ook meer kan leer van die vreugdes wat ons binnekort in God se inkomende nuwe wêreld van geregtigheid gaan geniet. Hulle sal jou graag help om te sien hoe God se Woord jou nou baie bemoediging en later die ewige lewe kan bied.—Psalm 37:29; Openbaring 21:4, 5.

[Voetnote]

[Lokteks op bladsy 12]

“Jehovah wil nie hê dat kinders mishandel word nie”