Voorkom molestering by die huis

Monique was nege jaar oud toe hy haar begin molesteer het. Hy het haar begin afloer terwyl sy uitgetrek het; daarna het hy snags na haar kamer toe gegaan en aan haar geslagsdele gevat. Toe sy haar verset het, was hy woedend. Een keer het hy haar selfs met ’n hamer aangeval en haar by die trap afgegooi. “Niemand het my geglo nie”, sê Monique—nie eers haar ma nie. Die molesteerder was Monique se stiefpa.

DIT IS NIE die geheimsinnige vreemdeling, die alleenloper wat in die bosse wegkruip, wat die grootste bedreiging vir kinders inhou nie. Dit is ’n gesinslid. Die meeste gevalle van seksuele misbruik vind by die huis plaas. Watter stappe kan ’n mens doen om te verseker dat molestering nie in jou huishouding plaasvind nie?

In sy boek Slaughter of the Innocents ondersoek dr. Sander J. Breiner die aanduidings van kindermolestering in vyf antieke gemeenskappe—Egipte, China, Griekeland, Rome en Israel. Hy kom tot die gevolgtrekking dat hoewel molestering in Israel voorgekom het, dit in vergelyking met die ander vier beskawings iets seldsaams was. Waarom? Anders as hulle bure is die mense in Israel geleer om vroue en kinders te respekteer—’n verligte siening wat aan die Heilige Skrif te danke was. Wanneer die Israeliete die Goddelike wet in hulle gesinslewe toegepas het, het hulle kindermolestering voorkom. Hedendaagse gesinne het hierdie rein, praktiese standaarde meer as ooit tevore nodig.

Sedewette

Het die Bybel se wet ’n uitwerking op jou gesin? Levitikus 18:6 sê byvoorbeeld: “Niemand van julle mag naby sy naaste bloedverwant kom om die skaamte te ontbloot nie. Ek is [Jehovah].” Die hedendaagse Christengemeente handhaaf eweneens streng wette teen alle vorme van seksuele misbruik. Enigeen wat ’n kind seksueel misbruik, loop gevaar om uitgesit, uit die gemeente geban, te word.a—1 Korinthiërs 6:9, 10.

Alle gesinne moet sulke wette ken en dit saam hersien. Deuteronomium 6:6, 7 spoor ons aan: “En hierdie woorde wat ek jou vandag beveel, moet in jou hart wees; en jy moet dit jou kinders inskerp en daaroor spreek as jy in jou huis sit en as jy op pad is en as jy gaan lê en as jy opstaan.” Om hierdie wette in te skerp, beteken meer as om jou kinders van tyd tot tyd ’n lesing daaroor te gee. Dit behels ’n gereelde wedersydse bespreking. Van tyd tot tyd moet die ma sowel as die pa herbevestig dat hulle God se wette oor bloedskande en die liefdevolle redes vir hierdie wette ondersteun.

Jy kan ook verhale soos dié van Tamar en Amnon, Dawid se kinders, gebruik om jou kinders daarop te wys dat daar in geslagsake perke is wat niemand—met inbegrip van naverwante—ooit mag oorskry nie.—Genesis 9:20-29; 2 Samuel 13:10-16.

Respek vir hierdie beginsels kan selfs in praktiese woonreëlings getoon word. In een Oosterse land het navorsing getoon dat bloedskande baie voorkom in gesinne waar kinders by ouers slaap selfs al is dit nie om ekonomiese redes noodsaaklik nie. Dit is ook oor die algemeen onverstandig om ’n broer en suster ’n bed of ’n kamer te laat deel wanneer hulle ouer word, as dit enigsins vermy kan word. Selfs wanneer beknopte woonruimte ’n lewensfeit is, moet ouers goeie oordeel gebruik om te besluit waar elke gesinslid moet slaap.

Die Bybel se wet verbied dronkenskap, en wys op die moontlikheid dat dit tot perversiteit kan lei (Spreuke 23:29-33). Volgens een studie het sowat 60 tot 70 persent van die bloedskandeslagoffers gesê dat hulle molesterende ouer gedrink het toe die molestering begin het.

’n Liefdevolle gesinshoof

Navorsers vind dat molestering algemener voorkom onder gesinne waar die man baasspelerig is. Die algemene siening dat vroue bloot bestaan om die man se behoeftes te bevredig, is skriftuurlik verkeerd. Sommige mans gebruik hierdie onchristelike beskouing as regverdiging daarvoor om ’n dogter te gebruik vir enigiets wat hulle nie van hulle vrou kan kry nie. Hierdie soort onderdrukking kan vroue in hierdie omstandighede hulle emosionele ewewig laat verloor. Baie verloor selfs die natuurlike drang om hulle eie kinders te beskerm. (Vergelyk Prediker 7:7, NW.) Een studie het daarenteen bevind dat wanneer vaders wat werkslawe is die meeste van die tyd nie tuis is nie, seksuele misbruik tussen moeder en seun soms kop uitgesteek het.

Wat van jou gesin? Neem jy as man jou rol as hoof ernstig op, of skuif jy dit op jou vrou af? (1 Korinthiërs 11:3). Behandel jy jou vrou met liefde, eerbied en respek? (Efesiërs 5:25; 1 Petrus 3:7). Is haar opinies vir jou belangrik? (Genesis 21:12; Spreuke 31:26, 28). En wat van jou kinders? Beskou jy hulle as kosbaar? (Psalm 127:3). Of beskou jy hulle bloot as ’n las wat geredelik misbruik kan word? (Vergelyk 2 Korinthiërs 12:14.) As jy verdraaide, onskriftuurlike beskouings van gesinsrolle in jou huishouding verwerp, sal daar minder kans wees dat molestering in jou gesin plaasvind.

’n Emosioneel veilige plek

’n Jong vrou wat ons Sandi sal noem, sê: “My hele gesin was ’n vrugbare teelaarde vir molestering. Ons was as gesin onsosiaal, en elke gesinslid was van die ander afgesonder.” Afsondering, onbuigsaamheid en obsessionele geheimhouding—hierdie ongesonde, onskriftuurlike gesindhede is kenmerkend van die huishouding waar molestering plaasvind. (Vergelyk 2 Samuel 12:12; Spreuke 18:1; Filippense 4:5, NW.) Skep ’n huislike atmosfeer wat vir die kinders emosioneel veilig is. Die huis moet ’n plek wees waar hulle opgebou voel, waar hulle vry voel om hulle hart te open en vryelik te praat.

Kinders het ook ’n groot behoefte aan fisiese liefdeblyke—dat jy hulle omhels en streel, hulle hand vashou, en met hulle baljaar. Moenie oorreageer wat die gevare van seksuele misbruik betref deur hierdie liefdeblyke te weerhou nie. Leer die kinders deur oop, hartlike toegeneentheid en lof dat hulle kosbaar is. Sandi sê: “My ma se siening was dat dit verkeerd is om enigiemand vir enigiets te prys. Dit sal jou ’n groot kop gee.” Sandi het seksuele misbruik minstens tien jaar lank in stilte verduur. Kinders wat nie sekerheid het dat hulle geliefde, waardevolle individue is nie, kan baie meer ontvanklik wees vir ’n molesteerder se lof, sy “toegeneentheid”, of sy dreigemente om dit te weerhou.

’n Pedofiel wat honderde seuns oor ’n tydperk van 40 jaar seksueel misbruik het, het erken dat die seuns wat ’n emosionele behoefte aan ’n vriend soos hy gehad het die “maklikste” slagoffers was. Moenie so ’n behoefte in jou kind laat ontstaan nie.

Verbreek die kringloop van molestering

Onder uiterste beproewing het Job gesê: “Ek walg van my lewe; ek wil my geklaag die vrye loop gee; ek wil spreek in die bitterheid van my siel” (Job 10:1). Baie ouers het eweneens gevind dat hulle hulle kinders kan help deur hulleself te help. The Harvard Mental Health Letter het onlangs gesê: “Die sterk sosiale gevoel dat mans nie uiting aan hulle pyn moet gee nie, laat die kringloop van molestering blykbaar voortduur.” Dit lyk of mans wat nooit uiting kon gee aan hulle pyn omdat hulle seksueel misbruik is nie, in alle waarskynlikheid self molesteerders sal word. The Safe Child Book sê dat die meeste kindermolesteerders self as kinders seksueel misbruik is, maar nooit hulp ontvang het om te herstel nie. Hulle gee uiting aan hulle pyn en woede deur ander kinders te molesteer.b—Sien ook Job 7:11; 32:20, NW.

Wanneer hulle ma self as kind gemolesteer is, en dit nie verwerk het nie, kan dit ook ’n groter gevaar vir kinders inhou. Navorsers sê byvoorbeeld dat vroue wat as meisies seksueel misbruik is dikwels met mans trou wat kindermolesteerders is. As ’n vrou daarbenewens nog nie die molestering waaraan sy in die verlede onderwerp is, verwerk het nie, is dit verstaanbaar dat sy dit dalk moeilik sal vind om molestering met haar kinders te bespreek. As molestering plaasvind, sal sy dit dalk nie heeltemal so maklik agterkom en positief optree nie. In so ’n geval betaal die kinders ’n vreeslike prys.

Molestering kan dus van die een geslag na die ander oorgedra word. Daar is natuurlik baie mense wat nie hulle pynlike verlede wil bespreek nie en blykbaar in goeie beheer is van hulle lewe, en dit is prysenswaardig. Maar vir baie is die pyn dieper, en hulle moet ’n doelbewuste poging aanwend—en, indien nodig, professionele hulp inroep—om sulke ernstige wonde uit hulle kinderjare te genees. Hulle doel is nie om hulle aan selfbejammering oor te gee nie. Hulle wil hierdie siek, skadelike kringloop van kindermolestering verbreek wat hulle gesin beïnvloed.—Sien die Ontwaak! van 8 Oktober 1991, bladsye 3 tot 11.

Die beëindiging van molestering

Indien die voorgaande inligting behoorlik toegepas word, kan dit baie help om die kanse op kindermolestering in jou huis te verminder. Maar onthou dat molesteerders in die geheim werk, hulle maak misbruik van vertroue, en hulle gebruik volwasse taktiek op onskuldige kinders. Dit lyk dus noodwendig asof sommige van hulle ongestraf bly vir hulle afskuwelike misdade.

Maar wees verseker dat God sien wat hulle doen (Job 34:22). Tensy hulle berou het en verander, sal hy nie hulle verdorwe dade vergeet nie. Hy sal dit op sy bestemde tyd aan die lig bring. (Vergelyk Mattheüs 10:26.) En hy sal geregtigheid laat geskied. Jehovah God beloof ’n tyd wanneer al sulke verraderlike mense “uit die land weggeruk” sal word en slegs die ootmoediges en sagmoediges wat God en hulle medemens liefhet, sal toegelaat word om te bly bestaan (Spreuke 2:22; Psalm 37:10, 11, 29; 2 Petrus 2:9-12). Ons het daardie wonderlike hoop van ’n nuwe wêreld danksy die losprysofferande van Jesus Christus (1 Timotheüs 2:6). Dan, en slegs dan, sal molestering vir ewig beëindig word.

Intussen moet ons alles in ons vermoë doen om ons kinders te beskerm. Hulle is baie kosbaar! Die meeste ouers sal hulle eie veiligheid geredelik in gevaar stel om hulle kindertjies te beskerm. (Vergelyk Johannes 15:13.) As ons nie ons kinders beskerm nie, kan die gevolge verskriklik wees. As ons hulle wel beskerm, gee ons hulle ’n wonderlike gawe—kinderjare wat vol onskuld en sonder rampspoed is. Hulle kan net soos die psalmis voel wat geskryf het: “Ek sal tot [Jehovah] sê: My toevlug en my bergvesting, my God op wie ek vertrou.”—Psalm 91:2.

[Voetnote]

[Venster op bladsy 11]

Een slagoffer van jare se bloedskande het gesê: “Molestering maak kinders dood, dit maak hulle vertroue, hulle reg op onskuld dood. Dis waarom kinders beskerm moet word. Want nou moet ek my hele lewe oor begin. Waarom toelaat dat meer kinders dit moet doen?”

Ja, waarom?

[Venster op bladsy 11]

Luister na die kinders!

IN BRITS-COLUMBIË, Kanada, het ’n onlangse studie die beroepe van 30 kindermolesteerders ondersoek. Die resultate was ysingwekkend. Die 30 persone het, tussen hulle, 2099 kinders gemolesteer. Ruim die helfte van hulle het posisies van vertroue beklee—as onderwysers, geestelikes, administrateurs en kindersorgbeamptes. Een molesteerder, ’n 50-jarige tandarts, het bykans 500 kinders oor ’n tydperk van 26 jaar gemolesteer.

Maar The Globe and Mail van Toronto sê: “In 80 persent van die gevalle het een of meer sektore van die gemeenskap (met inbegrip van die oortreder se vriende of kollegas, die slagoffers se gesin, ander kinders, sommige slagoffers) die molestering ontken of geringgeag.” Die volgende stelling is dus nie verbasend nie: “Die verslag dui daarop dat ontkenning en ongeloof molestering laat voortduur.”

Sommige van die slagoffers het die molesteerders gerapporteer. Maar volgens The Globe and Mail sê die verslag dat “ouers van jong slagoffers onwillig was om te glo wat hulle kinders hulle vertel het”. Onlangs het ’n regeringsamptenaar in Duitsland eweneens ’n verslag aangehaal wat sê dat kinders wat slagoffers van seksuele misbruik is volwassenes tot sewe maal moet nader voordat hulle geglo word.

[Venster op bladsy 12]

“Kry nou hulp”

“AS JY ’n man is en seksueel by kinders betrokke is, sê jy dalk vir jouself: ‘Sy hou daarvan’, of ‘Hy het daarvoor gevra’ of ‘Ek leer haar oor seks’. Jy bedrieg jouself. Ware mans is nie seksueel by kinders betrokke nie. Jy moet daarmee ophou as jy enigsins werklik vir daardie kind omgee. Kry nou hulp.”—’n Voorgestelde kennisgewing van ’n openbare diens, wat in die boek By Silence Betrayed aangehaal is.

[Prent op bladsy 13]

Kinders het innige, liefdevolle aandag in oorvloed nodig