Die wêreld se grootste kasjoeboom

DEUR ONTWAAK!-MEDEWERKER IN BRASILIË

DIE wêreld se grootste? Volgens Guinness O Livro dos Recordes 1994 is dit heel moontlik die grootste. Die kasjoeboom wat hier getoon word, word naby die kus van Rio Grande do Norte aangetref en is beslis die grootste in Brasilië. Trouens, hierdie enkele boom beslaan tans ’n oppervlakte gelykstaande aan dié van ’n groot stadsblok—die oppervlakte van 70 gemiddelde kasjoebome!

Die kasjoe is ’n immergroen boom wat gewoonlik in grootte wissel van ’n klein struik tot ’n boom wat sowat 20 meter hoog is. Die blommetjies van die kasjoeboom vorm ’n skerp teenstelling met sy groot, leeragtige blare. Sy eetbare saad is die heerlike kasjoeneut, wat lyk asof dit teen ’n peervormige vrug, wat die kasjoe-appel genoem word, vasgedruk is. Dit is eienaardig dat die kasjoeboom aan die giftige klimopplant verwant is, en diegene wat daarmee werk, moet versigtig wees. Die neut word deur twee doppe omhul, en tussen hierdie doppe is daar ’n olie wat blasies op die vel kan veroorsaak. Gelukkig verwyder die braaiproses die neut se giftige eienskappe.

Vreemd genoeg, dit lyk of die niervormige neut aan die buitekant van die vrug groei, asof die Skepper die neut vergeet het en dit toe agterna vasgeplak het. Die kasjoe-appel is die vrugsteel van die neut. Dit is waarom sommige sê dat die neut die eintlike vrug van die boom is. In elk geval, dink net: die volgende keer wat jy kasjoeneute eet, eet jy moontlik die vrug van die wêreld se grootste kasjoeboom!