Jongmense vra . . .

Waarom trou almal behalwe ek?

“Ek wens ek het op troue gestaan. Dan sou ek gelukkig wees.”—Cheryl.a

DIT is net natuurlik om getroud te wil wees. God het die man en die vrou ’n natuurlike aangetrokkenheid tot die ander geslag gegee. En hy het die huwelik as ’n permanente verbintenis tussen ’n man en ’n vrou ingestel.—Genesis 1:27, 28; 2:21-24.

Dit is dus te verstane dat jy ietwat mismoedig of selfs uitgesluit kan voel as jy nog nie getroud is nie—veral as baie van jou maats reeds in die huwelik getree het. Welmenende vriende kan tot die druk bydra. “Ek is 24 jaar oud en ongetroud en ek gaan nie op die oomblik met iemand uit nie”, sê Tina. “Dit lyk of al die ander so besorg is oor die feit dat ek nie getroud is nie dat ek ’n kompleks daaroor kry. Hulle laat my soos ’n oujongnooi voel of dat daar iets met my skort.”

Vir party mense kan die ongetroude lewe soos ’n muur begin lyk, ’n onoorkomelike hindernis wat tussen hulle en geluk staan. Met elke jaar wat verbygaan, kan dit voel of nog ’n laag stene bo-op daardie muur gelê word. ’n Jongmens kan begin voel dat hy of sy nie aantreklik of begeerlik is nie. ’n Jong vrou in Italië met die naam Rosanna sê: “Ek voel dikwels alleen en nutteloos; dit lyk of ek geen kans staan om te trou nie.” Jong mans kan soortgelyke gevoelens hê. Frank het byvoorbeeld begin voel dat al sy vriende interessanter en meer gesofistikeerd geword het nadat hulle getroud is. Hy het begin wonder of die huwelik dieselfde vir hom sou doen.

Voel jy ook so? Wonder jy soms, as jy ongetroud is, of daar iets met jou skort en of jy miskien gedoem is om vir ewig ongetroud te wees?

Die huwelik—mite versus feit

Laat ons eerstens die algemene beskouing ondersoek dat die huwelik outomaties die weg tot geluk baan. Die huwelik kan weliswaar tot ’n mens se geluk bydra en doen dit ook dikwels. Maar om getroud te wees, maak jou nie noodwendig gelukkig nie. Selfs die beste huwelike het ’n mate van ‘verdrukking in die vlees’ tot gevolg (1 Korintiërs 7:28). ’n Mens vind huweliksgeluk slegs deur voortdurende selfopoffering en harde werk. Dit is interessant dat die grootste mens wat nog geleef het, Jesus Christus, ongetroud was. Sou enigiemand sê dat hy ongelukkig was? Beslis nie! Sy vreugde het daaruit gespruit dat hy die wil van Jehovah gedoen het.—Johannes 4:34.

Nog ’n mite is dat die huwelik ’n waarborg is dat jy nie eensaam sal wees nie. Dit is nie! Een getroude Christenman het gekla: “My vrou het my nog nooit in haar vertroue geneem of ’n betekenisvolle gesprek met my gevoer nie!” Party Christenvrouens het eweneens gekla dat hulle mans nie kommunikeer nie of dat hulle blykbaar meer in hulle werk of vriende belangstel as in hulle. Ongelukkig is dit baie algemeen om getroud maar eensaam te wees.

Dan is daar diegene wat die huwelik sien as ’n manier om van gesinsprobleme af weg te kom. Een jong getroude vrou sê: “Ek dink my ouers moes my ’n kans gegee het om groot te word. Maar hulle het my nie toegelaat om ’n kêrel te hê of om uit te gaan nie . . . As my ouers my ’n kans gegee het, dink ek nie ek sou op 16 getrou het nie. Maar ek wou hulle wys dat ek volwasse is.”

Jy voel miskien dat die lewe by die huis te beperkend is. Maar die huwelik bring verantwoordelikhede mee wat ’n mens se persoonlike vryheid grootliks kan beperk. Dink wat dit behels om te werk, rekeninge te betaal, herstelwerk aan die huis en motor te doen, te kook, huis skoon te maak, klere te was en miskien selfs kinders groot te maak! (Spreuke 31:10-31; Efesiërs 6:4; 1 Timoteus 5:8). Baie jongmense word oorweldig wanneer hulle voor hierdie grootmensverantwoordelikhede te staan kom.

Party glo ook dat die huwelik die sleutel tot gewildheid is. Maar daar is geen waarborg dat ander jou geselskap—of dié van jou huweliksmaat—sal opsoek bloot omdat jy getroud is nie. Mense sal van jou hou as jy goedhartig, vrygewig en onselfsugtig is, hetsy jy getroud of ongetroud is (Spreuke 11:25). En al maak die feit dat hulle ’n paartjie is dit effens makliker om by getroude vriende in te pas, moet ’n man en vrou onthou dat hulle “een vlees” is (Genesis 2:24). Die hoofsaak moet vir hulle wees hoe hulle met mekaar oor die weg kom—nie met hulle vriende nie.

Gereed vir die huwelik?

Al sien jy die redelikheid van hierdie punte in, kan jy natuurlik steeds soms mismoedig voel. ’n Ou spreuk het dit soos volg gestel: “’n Uitgestelde hoop maak die hart siek” (Spreuke 13:12). Die jong Tony was byvoorbeeld feitlik desperaat omdat hy ongetroud was. Hy het begin voel dat hy bereid is om met enigiemand te trou. ’n Jong meisie, Sandra, het eweneens mismoedig geraak elke keer wanneer sy van ’n ontluikende romanse gehoor het; sy het gewonder wanneer haar beurt sou kom.

Voordat jy toelaat dat jy in wanhoop verval, moet jy jou afvra: ‘Is ek werklik gereed vir die huwelik?’ Om die waarheid te sê, as jy ’n tienderjarige is, sal die antwoord heel moontlik ’n uitdruklike ‘nee!’ wees. In die Verenigde State misluk die meeste tienerhuwelike binne vyf jaar.b Party jongmense kan natuurlik buitengewoon volwasse vir hulle ouderdom wees en kan hulle huwelik laat slaag. Maar dit beteken nie noodwendig dat jy moet trou nie. Het jy werklik daaroor gedink of jy bereid is om die verantwoordelikhede van die huwelik te aanvaar?

’n Eerlike selfondersoek kan baie onthul. Byvoorbeeld, hoe volwasse en verantwoordelik is jy? Kan jy geld spaar, of spandeer jy dit sodra jy dit kry? Betaal jy jou rekeninge betyds? Is jy in staat om ’n betrekking te behou of om ’n huishouding te behartig? Kom jy goed oor die weg met ander, soos met jou kollegas en ouers, of is daar voortdurend onenigheid tussen julle? Indien wel, sal jy dit moontlik baie moeilik vind om met ’n huweliksmaat oor die weg te kom.

As jy nog ’n tiener is, sal jy heel moontlik uitvind dat jy nog ’n paar jaar se ondervinding nodig het om die volwassenheid en stabiliteit te verkry wat nodig is om ’n goeie man of ’n goeie vrou te wees. As jy van hierdie feit bewus is, kan dit jou help om jou verwagtinge aan te pas en die huwelik as ’n moontlikheid vir die toekoms te sien. Dit kan help dat jy in ’n groter mate ‘in jou hart vasstaan’ wanneer dit by jou ongetroude staat kom, ten minste vir die oomblik.—1 Korintiërs 7:37.

Behoorlike voorbereiding

Maar sê nou jy meen dat jy verby “die bloei van die jeug” is en gereed is om te trou? Dit kan ontmoedigend wees as daar min moontlike huweliksmaats is of as jy verwerp word elke keer wanneer jy belangstelling in iemand toon. Maar beteken dit noodwendig dat niemand met jou sal wil trou nie? Glad nie. Koning Salomo kon nie die liefde wen van ’n jong meisie op wie hy verlief geraak het nie—en hy was een van die rykste en wysste mense wat nog geleef het! Die probleem? Die meisie het eenvoudig nie romantiese gevoelens vir hom in haar hart gehad nie (Hooglied 2:7). Miskien het jy ook nog nie iemand ontmoet wat waarlik die geskikte maat vir jou is nie.

Voel jy dat jy eenvoudig te onaansienlik is vir iemand om aangetrokke tot jou te voel? ’n Mooi uiterlike het weliswaar voordele, maar dit is nie alles nie. Is daar nie, wanneer jy dink aan die getroude paartjies wat jy ken, onder hulle mense van alle lengtes, vorms en grade van aantreklikheid nie? Buitendien sal iemand wat waarlik godvresend is hoofsaaklik besorg wees oor hoe jy in “die geheime persoon van die hart” is.—1 Petrus 3:4.

Jy moet natuurlik beslis nie jou fisiese voorkoms verwaarloos nie; dit is net redelik om op jou beste te probeer lyk. Slordige kleredrag en persoonsversorging kan ander die verkeerde indruk van jou laat kry.c Swak kommunikasievermoëns en gebreke in jou persoonlikheid kan ook veroorsaak dat ander nog voor hulle jou leer ken nie van jou hou nie. ’n Volwasse vriend of ’n ouer kan vir jou sê as ’n paar veranderings op hierdie gebiede nodig is. Die waarheid maak dalk seer, maar as jy dit aanvaar, kan dit jou miskien help om veranderings aan te bring en sodoende aantrekliker vir ander te wees.—Spreuke 27:6.

Maar dit is nie die feit dat jy getroud is of nie wat uiteindelik jou waarde as ’n mens bepaal nie. Wat werklik van waarde is, is hoe God jou beskou, en hy “sien die hart aan” (1 Samuel 16:7). Jy moet jou dus daarop toelê om Jehovah se goedkeuring te verkry en nie om te trou nie. Probeer om nie toe te laat dat laasgenoemde jou gedagtes en gesprekke oorheers nie. Monitor jou assosiasie, keuse van musiek en vermaak versigtig.

Die begeerte om getroud te wees, sal weliswaar dalk nie weggaan nie, maar moenie bekommerd wees nie. Wees geduldig (Prediker 7:8, NAV). In plaas van jou ongetroude staat as ’n straf te beskou, kan jy ten volle gebruik maak van die vryheid wat die ongetroude lewe bied en die geleenthede wat dit jou gee om God te dien sonder om afgelei te word (1 Korintiërs 7:33-35, 38). Jy sal moontlik die een of ander tyd die geleentheid kry om te trou—miskien selfs gouer as wat jy dink.

[Voetnote]

[Prent op bladsy 26]

Dit is maklik om uitgesluit te voel as jou maats trou