Van ons lesers

Slaap Dankie vir die artikel “Waarom jou liggaam slaap nodig het” (8 Junie 1995). Ek moet sê dat dit my oë geopen het. As mediese student verloor ek baie waardevolle slaapure omdat ek nie met my studeerwerk wil agterraak nie. Ek het al aan sommige van die gevolge gely wat in die artikel genoem word. Ek sal beter slaappatrone probeer ontwikkel.

L. H., Trinidad

Grootouers Ek het trane van vreugde gestort toe ek die reeks “Waardeer jy grootouers?” (8 Julie 1995) gelees het. Ek het ’n moeilike tyd met my skoonouers beleef; daarom het julle artikel net op die regte tyd gekom. Dit het my laat besef dat ek hulle nie met die gepaste eerbied behandel het wat hulle verdien nie. Ek het die nodige veranderinge begin maak, en nou is ons almal gelukkiger.

A. T., Kanada

Toe ons my vader in ’n verpleeginrigting moes plaas, het ons ons voorgeneem om hom drie keer per week te besoek. Ons kom daardie belofte al twee jaar lank na. Alledaagse nuusbrokkies van die huis af beteken vir hom baie! Dit verg vasbeslotenheid om hiermee vol te hou, maar die kleinkinders sowel as die grootouers vind daarby baat.

P. L., Verenigde State

As Katoliek was ek beïndruk deur die feit dat die artikels nie om leerstellings of godsdiens gedraai het nie, maar onpartydig was. Julle het ’n belangrike saak wat feitlik geïgnoreer word openhartig bespreek.

A. B., Costa Rica

Gesinstragedie Ek het die artikel “Dankie dat Ma my huis toe gebring het” (8 Julie 1995) met trane in my oë gelees. Ek het ook my man in 1982 in ’n ongeluk verloor. Ek is vermink en het ses kinders en ’n moeder gehad om na om te sien. Toe ek die artikel lees, was dit asof ek my eie verhaal lees. Jehovah gee ons die moed om voort te gaan.

C. R., Verenigde State

Hierdie verhaal het werklik my hart geraak. Ek is 16 jaar oud en ek het nog altyd gewonder hoe ek die mas sou opkom as sulke probleme sou ontstaan. Todd se ondervinding het my help besef dat Jehovah ons altyd bystaan solank ons op hom vertrou.

N. F., Dominica

Die verhaal is so goed vertel dat ek amper gehuil het. Die beproewinge wat die Boddy-gesin moes deurmaak, het die dingetjies wat my ontmoedig so onbeduidend laat lyk. Hoewel ons situasies verskil, het dit my gehelp om te volhard toe ek sien hoe Jehovah hulle onderskraag het.

V. S., Filippyne

My man van 33 jaar, ’n getroue Getuie wat al baie jare lank as ’n ouer man dien, het Pick se siekte—’n langdurige, hartverskeurende siekte wat mettertyd vir die lyer en sy gesin groot lyding veroorsaak. Mev. Boddy se krag ten spyte van die feit dat sy haar man verloor het sowel as die jare wat sy onselfsugtig en toegewyd vir haar seun gesorg het, het my diep beïndruk. Mag Jehovah haar en haar seuns seën.

E. N., Verenigde State

Slegte asem Ek moet julle bedank vir julle leersame artikel “Wat kan jy aan ’n slegte asem doen?” (8 Julie 1995). Ek het daardie probleem gehad! Dit is waar dat ’n slegte asem jou neerslagtig laat voel. Ek het die tandarts twee keer besoek, maar die reuk was steeds daar. Ek het die wenke in die artikel gevolg, en hulle werk. Hou asseblief aan om mense regoor die aarde te help.

R. O. I., Nigerië

Costa Rica Die artikel “Costa Rica—klein landjie, groot verskeidenheid” (8 Julie 1995) het net ’n paar dae voor my reis gekom; ek het dit saamgeneem om daar te gebruik. Dit is inderdaad ’n wonderlike en opwindende land! Oral waar ons gegaan het, het die mense geglimlag en vir ons gewaai. Dink net aan die nuwe wêreld wanneer almal oral waar jy gaan net so vriendelik sal wees!

T. N., Verenigde State