Van Ons Lesers
Vroue van Indië Ek het die artikel “Vroue van Indië—Beweeg in die 21ste eeu in” (22 Julie 1995) waardeer. Indië het my nog altyd gefassineer, aangesien dit ’n kultuur het wat baie van my eie verskil. Julle artikel het getoon dat ware bevryding vir Indiese vroue slegs onder God se Koninkryk sal kom. Ek sien uit na die tyd wanneer alle vrouens opreg bemin en waardeer sal word deur die mans vir wie hulle respek het.
W. S., Brits-Columbië
Deur gesin verwerp Ek is 14 jaar oud, en ek skryf om julle te bedank vir die artikel “Die gesin wat my waarlik liefgehad het” (22 Julie 1995). Dit het my geloof werklik versterk. Udom Udoh is ’n goeie voorbeeld vir alle jongmense. Hy het werklik getoon dat ’n mens op ’n jeugdige leeftyd vir die waarheid kan opkom.
A. M., Verenigde State
Ek het, soos Udom, teenstand ondervind nadat ek begin het om God se Woord te bestudeer. Ek is ook gesê om die huis te verlaat. Ná baie woordelikse en fisiese vervolging het ek die huis verlaat. ’n Ouer man en sy vrou het goedgunstiglik vir my gesorg. Julle artikel het my waarlik versterk. Watter vreugde verskaf dit tog om deel van hierdie unieke wêreldwye gesin te wees!
L. J., Verenigde State
Word ’n vriend van God Baie dankie vir die artikel “Jongmense vra . . . Kan ek werklik ’n vriend van God wees?” (22 Julie 1995). Dit het my laat huil. Ek is 13 jaar oud en het dinge gedoen wat baie sleg is. Ander het my probeer aanmoedig, maar dit was nog steeds vir my moeilik om tot Jehovah te bid. Ek het gedink dat hy as gevolg van al my foute nie meer vir my lief is nie. Hierdie artikel het vir my gewys dat God vergewe en dat ek tot hom kan bid.
J. D., Duitsland
Soos Doris, wat in die artikel aangehaal is, het ek onwaardig gevoel om ’n vriend van God te wees. Ek dank Jehovah dat hy hierdie hulp aan my voorsien het. Dit het my help verstaan dat hy gewillig is om my te vergewe en my Vriend te wees as ek berou het oor my slegte dade. Ek hoop dat julle nooit sal ophou om hierdie artikels vir jongmense te druk nie.
B. M. A., Spanje
Menopouse Ons bestuur ’n farmaseutiese maatskappy wat in ginekologiese geneesmiddels spesialiseer. Ons het die artikel oor menopouse met die titel “’n Beter begrip word verkry” (22 Februarie 1995) baie interessant gevind, en ons is bly dat julle die onderwerp bespreek het. Maar die venster “Wat van estrogeenvervangingsterapie?” sê dat ‘die byvoeging van progesteroon by die hormoonvervangingsbehandeling die voordelige uitwerking van estrogeen op hartsiekte teëwerk’. Dit is nie altyd waar nie, veral nie met natuurlike progestiene nie.
Dr. T. W. en J. K., Duitsland
Dankie dat julle ons op hoogte gebring het. Hoewel ouer bronne aangedui het dat progestiene dalk die vlakke van HDL, of “goeie” cholesterol, kan verlaag en sodoende die risiko van hartsiektes vergroot, dui nuwer navorsing op die teendeel. ’n Onlangse studie in “JAMA” se nommer van 18 Januarie 1995 beweer dat “estrogeen op sy eie of in kombinasie met ’n progestien [die vlakke van “goeie” cholesterol] verbeter”. Meer navorsing sal ongetwyfeld gedoen moet word voor al die langtermynuitwerkings van hormoonbehandelings ten volle verstaan sal word.—RED.
Evolusie Ek het so pas die reeks “Die teorie wat die wêreld geskud het—Wat het dit opgelewer?” (8 Augustus 1995) gelees. My reaksie? Ek is meer as net beïndruk. Ek is oorweldig! Die artikel is so kleurvol geskryf, so volledig. Elke aanhaling het op goeie navorsing gedui. Dit was veral insiggewend om te sien wat die uitwerking van die evolusieteorie op die mens se verstand is. Ek het dit nooit besef nie! Daar is ’n gebrek aan kwaliteitsleesstof in die wêreld, maar julle het in daardie behoefte voorsien.
R. H., Verenigde State