Van ons lesers

Gestremde voltydse bedienaar Met die jare het baie artikels my hart geraak—maar die ondervinding van Gloria Williams, “’n Koeël het my lewe verander” (22 Oktober 1995), het my die diepste geraak. My probleme lyk so onbeduidend in vergelyking met hare! Dankie dat julle ons sulke ryk geestelike voedsel en aanmoediging gee.

E. L., Kanada

Hierdie ondervinding het my daaraan herinner dat ons, ongeag die omstandighede waarin ons ons bevind en hoe erg dit ook al is, tot Jehovah kan bid en om hulp kan vra. Ek belewe op die oomblik ’n moeilike tyd by die skool, en dit ontmoedig my. Maar hierdie artikel was vir my ’n groot aanmoediging.

M. S., Japan

Terwyl ek Gloria Williams se verhaal gelees het, het ek trane in my oë gehad. Dit het my aangemoedig om voort te gaan om my bes in die velddiens te doen, ten spyte daarvan dat ek in ’n godsdienstig verdeelde huis woon.

F. C., Italië

Die artikel het my aangemoedig om te bly volhard in my doel om die predikingswerk voltyds te doen. As Gloria Williams dit kan doen, waarom kan ek dan nie—aangesien ek geen liggaamsgebrek het nie?

I. O. A., Nigerië

Hout Ek is 11 jaar oud en ek het dit werklik geniet om die artikel “Waarom met hout bou?” (22 Oktober 1995) te lees. Dit het my Jehovah se krag en vermoë help waardeer. Dit het my ook nader aan hom en sy Seun, Jesus Christus, laat kom omdat ek besef hoe slim en wys hulle altwee is.

A. B., Verenigde State

Waarom nog ongetroud? Baie dankie vir die artikel “Jongmense vra . . . Waarom trou almal behalwe ek?” (22 Oktober 1995). Trou is skielik hoogmode in hierdie omgewing en talle trou terwyl hulle nog baie jonk is. Party is bekommerd oor my omdat ek 18 jaar oud is en nie ’n kêrel het nie. Die artikel het presies op die regte tyd gekom om my ’n gebalanseerde beskouing te help behou.

S. Z., Duitsland

Omdat ek 19 en ongetroud is, wonder ek dikwels wat ek dan so verkeerd doen dat niemand nog in my belanggestel het nie. Sommige ongelowiges het al belanggestel, maar dit is nie die soort aandag wat ek wil hê nie. Die artikel het my help besef dat geduld nodig is en dat dit van die allergrootste belang is om Jehovah te behaag.

J. G., Verenigde State

As ’n ongetroude man van 38 het ek gevind dat ek my die vraag afvra wat in die titel van die artikel gestel word. Aangesien ongetroude Christensusters my al telkemale afgewys het, ken ek die pyn weens “’n uitgestelde hoop” maar alte goed (Spreuke 13:12). Dit is baie gerusstellend om te weet dat Jehovah die gevoelens van ongetroude Christene in hierdie situasie as gegrond beskou en dat hy ons getroue volharding waardeer.

D. T., Verenigde State

Grootste Kunstenaar Nadat ek die reeks “Op soek na die grootste Kunstenaar” (8 November 1995) gelees het, wil ek graag my waardering uitspreek. Ek het al te veel natuurprogramme op televisie gesien wat nie die erkenning aan die Grootse Ontwerper gee nie. Ontwaak! gee egter altyd die erkenning aan ons luisterryke God, Jehovah.

E. Z., Verenigde State

Wat ’n wonderlike nuwe manier om Jehovah te beskou! Die gehalte van sy kuns asook sy ongeëwenaarde getal kunswerke is inderdaad uitsonderlik. Ek wil ook graag ’n ‘mooi so!’ byvoeg vir die talle talentvolle kunstenaars wat die Ontwaak! so aantreklik maak om mense tot Jehovah God aan te trek.

M. Q., Verenigde State