Wanneer woorde wapens word

“Daar is een wat onverskillig woorde uitspreek soos swaardsteke.”—SPREUKE 12:18.

“DIT het binne weke ná die troue begin”, sê Elaine.a “Onvriendelike opmerkings, neerhalende aanmerkings en pogings om my te verneder. Ek was nie teen my man opgewasse nie. Sy flink verstand en vinnige tong kon alles wat ek gesê het, verdraai en verwring.”

Elaine is deur haar hele huwelikslewe aan ’n subtiele soort aanval blootgestel wat geen merke laat nie en min meegevoel uitlok. Ongelukkig het haar situasie nie met verloop van tyd verbeter nie. “Ons is nou al meer as 12 jaar getroud”, sê sy. “Daar gaan nie ’n dag verby dat hy nie krities en sarkasties teenoor my is en growwe skeltaal gebruik nie.”

Die Bybel oordryf nie wanneer dit sê dat die tong “’n onbedwingbare skadelike ding, vol dodelike gif” kan wees nie. (Jakobus 3:8; vergelyk Psalm 140:4.) Dit is veral in die huwelik die geval. “Wie ook al gesê het ‘stokke en klippe kan my bene breek, maar woorde kan my nooit seermaak nie’, was heeltemal verkeerd”, sê ’n vrou met die naam Lisa.—Spreuke 15:4.

Mans kan ook die teiken van uitskellery wees. “Weet jy hoe dit voel om saam met ’n vrou te leef wat jou heeltyd ’n leuenaar, ’n onnosel idioot of iets ergers noem?” vra Mike, wie se huwelik van vier jaar met Tracy op ’n egskeiding afstuur. “Ek kan die dinge wat sy vir my sê nie in beskaafde geselskap herhaal nie. Dis waarom ek nie met haar kan praat nie en waarom ek so laat by die werk bly. Dis baie veiliger as om huis toe te kom.”—Spreuke 27:15.

Die apostel Paulus het Christene tereg vermaan: “Laat . . . geskreeu en smadende taal van julle af weggeneem word” (Efesiërs 4:31). Maar wat is “smadende taal”? Paulus onderskei dit van “geskreeu” (Grieks, krau·geʹ), wat bloot verheffing van die stem beteken. “Smadende taal” (Grieks, bla·sphe·miʹa) verwys meer na die inhoud van die boodskap. As dit tiranniek, kwaadwillig, vernederend of beledigend is, dan is dit smadende taal—hetsy dit geskreeu of gefluister word.

Die wonde van woorde

’n Patroon van skeltaal kan ’n huwelik verswak, net soos golwe van die see soliede rots kan laat verweer. “Hoe hewiger dit is en hoe langer dit voortduur”, skryf dr. Daniel Goleman, “hoe groter is die gevaar. . . . Herhaalde kritiek en minagting of afkeer is gevaartekens omdat dit toon dat ’n man of vrou hulle huweliksmaat stilswyend veroordeel het.” Namate toegeneentheid afneem, is man en vrou later, soos een boek dit stel, “wettig getroud, maar nie wat emosies betref nie”. Na verloop van tyd sal hulle dalk glad nie meer getroud wees nie.

Skeltaal kan egter op meer as die huwelik self ’n uitwerking hê. ’n Bybelspreuk sê: “By verdriet van die hart is die gees neerslagtig” (Spreuke 15:13). Die spanning wat deur ’n voortdurende stortvloed van kwetsende woorde veroorsaak word, kan ’n mens se gesondheid erg aantas. ’n Studie wat deur die Universiteit van Washington (VSA) gedoen is, het byvoorbeeld aan die lig gebring dat ’n vrou wat voortdurend uitgeskel word vatbaarder kan wees vir verkoues, blaasprobleme, gisinfeksies en maagkwale.

Baie vrouens wat uitgeskel sowel as fisies mishandel word, sê dat woorde seerder kan maak as vuiste. “Die kneusplekke as gevolg van sy klappe het uiteindelik gesond geword en weggegaan”, sê Beverly, “maar ek sal nooit ooit die verskriklike dinge vergeet wat hy gesê het oor hoe ek lyk, hoe ek kook, hoe ek die kinders versorg nie.” Julia voel dieselfde. “Ek weet dit klink gek”, sê sy, “maar ek verkies dat hy my slaan en klaarkry as dat hy my ure lank verstandelik treiter.”

Maar waarom sal party mense die een aanval en beledig wat hulle gesê het dat hulle liefhet? Die volgende artikel bespreek hierdie vraag.

[Voetnoot]

[Lokteks op bladsy 4]

“Ek verkies dat hy my slaan en klaarkry as dat hy my ure lank verstandelik treiter”

[Lokteks op bladsy 4]

“Weet jy hoe dit voel om saam met ’n vrou te leef wat jou heeltyd ’n leuenaar, ’n onnosel idioot of iets ergers noem?”