Vrouebendes—’n Onrusbarende Tendens
“GENADELOOS, opvlieënd en wreed” is die woorde wat die koerant The Globe and Mail gebruik het om meisiesbendes in Kanadese hoërskole te beskryf. ’n Toenemende aantal meisies wat moeg daarvoor is om deel van mansbendes te wees, wil hulle onafhanklikheid bewys. ’n Polisiespeurder van Toronto, wat in jeugbendes spesialiseer, het gemeld dat meisies “uiters gewelddadig optree”. Hulle is gretig om “wapens en ‘uiterste’ geweld te gebruik” en is “dikwels wreder en aggressiewer as hulle manlike eweknieë”, het dr. Fred Mathews in die Globe gesê. Waarom? Volgens een konstabel is ’n gewilde idee onder wettelose jeugdiges dat meisies “se kanse groter is om minder tyd in die tronk deur te bring as hulle gevang word”. ’n Polisiewoordvoerder het vir die Globe gesê dat “meisies van net 11 jaar betrokke is by kleiner misdade sowel as by dwelm- en vuurwapenverkope in hoërskole”.
Dr. Mathews, ’n sielkundige en kenner op die gebied van hierdie geweld, het oor ’n tydperk van tien jaar onderhoude gevoer met lede van vrouebendes en gevind dat hulle “woedend en opstandig is, grotendeels vanweë mishandeling in hulle gesin of vanweë ’n disfunksionele gesin”. Wat trek sulke jongmense tot bendes aan? Bendes gee hulle “’n gevoel van gemeensaamheid en veiligheid”, sê ’n voormalige lid. Maar toe die koerant ’n onderhoud met haar gevoer het, het sy erken dat sy twee keer selfmoord probeer pleeg het om van die bende af weg te kom en het sy bygevoeg: “Baie van daardie sogenaamde sterftes in die voorstede as gevolg van ongelukke en selfmoord is niks anders as moorde wat deur bendes gepleeg word nie. Wanneer jy in die bende is, het jy beskerming teen ander bendes. Die probleem is dat jy nie beskerming teen die lede van jou eie bende het nie.”
’n Besorgde hoërskoolonderwyser het gesê: “Die gewelddadige meisies waarmee ons te doen het, is heeltemal onvoorspelbaar. Wanneer hulle woedend is, weet jy nie waar hulle gaan toeslaan nie. En as jy ’n onderwyser is, maak dit jou baie benoud.” Aangaande “die laaste dae” het die Bybel voorspel dat tye ‘moeilik sal wees om deur te kom’, want mense, met inbegrip van jeugdiges, sal “sonder selfbeheersing, wreedaardig” wees.—2 Timoteus 3:1-5.