Van ons lesers

Vriendskap Ek wil julle opreg bedank vir die artikel “Jongmense vra . . . Waarom kan ek nie vriende behou nie?” (22 Mei 1996). Julle sal nie weet hoeveel hierdie artikel my gehelp het nie. Dit het my gewys dat ’n mens blywende vriendskappe kán hê, ten spyte van struikelblokke. Soms verloor ons vriende omdat ons uitstel om misverstande op te klaar. Hierdie artikel het my gehelp om teen my swakhede in hierdie opsig te stry.

A. M. P., Brasilië

Die artikel het net op die regte tyd gekom. Drie maande gelede het my kosbare vriendskap met ’n ander meisie begin verflou; ons het die punt bereik waar ons nie meer met mekaar gepraat het nie. Toe ons die artikel ontvang het, het ek en my vriendin dit albei gelees en besef dat ons dwaas opgetree het. Ons het dinge uitgepraat en ’n hele reeks misverstande opgeklaar. Nou is ons weer van nuuts af goeie vriende.

N. T., Italië

Vulkaanramp Ek onthou die nuusberigte oor die uitbarsting van berg Pinatubo in 1991. Maar ek het daarvan vergeet totdat ek die artikel “Lahars—die nadraai van berg Pinatubo” (22 Mei 1996) gelees het. Ek het nog nooit vantevore van lahars gehoor nie, en die artikel het my gefassineer. Die moed en behulpsaamheid wat die Garcia-gesin aan die dag gelê het, hoewel hulle in die pad van ’n lahar was, was uitstekend.

S. F., Kanada

Die artikel het my diep geraak. Dit was hartroerend om die ondervindinge te lees van Christenbroers wat hulle ywer vir geestelike dinge behou het, selfs al het hulle hulle in onaangename omstandighede bevind. Dit het my aangemoedig om nie toe te laat dat klein dingetjies my van die Christelike vergaderinge weghou of my verhinder om aan die predikingswerk deel te neem nie. Dankie vir die artikel!

S. D., Italië

Ek en my man het nog nooit van lahars gehoor nie, maar nou weet ons hoe ernstig en gevaarlik hulle is. Ons wil hê dat ons broers in die Filippyne moet weet dat ons vir hulle bid en ook vir diegene wat hulp aan hulle kon verleen.

C. A. B., Guatemala

Groenflits Ek het pas die artikel gelees “Het jy al ooit ’n groenflits gesien?” (22 Mei 1996). Terwyl ek ’n paar jaar gelede in die wildernis van Alaska gevlieg het, was ek verbaas om ’n blougroen flits te sien wat net ’n breukdeel van ’n sekonde geduur het. Ek het tot nog toe nie ’n artikel gevind wat hierdie verskynsel verduidelik het nie. Soms het ek gedink dat dit iets was wat ek my net verbeel het!

G. C., Alaska

Paniekaanvalle Ek wil my waardering uitspreek vir die artikel “Hoe om paniekaanvalle die hoof te bied” (8 Junie 1996). Ek het ses jaar lank sulke aanvalle gehad. Nadat ek ’n jaar lank as ’n pionier (voltydse evangeliedienaar) gedien het, moes ek ophou omdat ek nie die krag gehad het om die aanvalle die hoof te bied nie. Dit het my baie seergemaak toe intieme vriende dit nie verstaan het nie, aangesien ek gesond gelyk het. Dit is moeilik om te beskryf hoe verheug ek was om hierdie artikel te lees.

O. S., Oekraïne

Ek dien al agt jaar as ’n voltydse bedienaar. Maar ek ervaar reeds jare lank ’n gevoel van nutteloosheid en het my baie daaroor bekommer. Toe ek hierdie artikel gelees het wat simptome soortgelyk aan myne beskryf, het ek die raad daarin onmiddellik begin toepas. Daardie gevoel het begin afneem, en my hart is kalmer.

K. M., Thailand

Ek het mediese behandeling vir paniekaanvalle ontvang en dit het my gehelp. Maar ek is in die stilligheid geteister deur die vraag: ‘Is ek geestelik swak of lui?’ Toe ek hierdie artikel lees, is ’n ontsaglike las van my skouers afgelig.

P. P., Finland