Van ons lesers

Waarom woede beheers? Dankie vir die artikel “Waarom moet jy jou woede beheers?” (8 Junie 1997). Ek kom uit ’n groot gesin, en gedurende my kinderjare het ek heelwat bakleiery in ons huis gesien. My ouers het geskei, en sedertdien het ek soms vlae van toorn gehad. Ek het dag en nag tot Jehovah gebid en hom gevra om my met hierdie probleem te help. Wat ’n verrassing was dit tog om hierdie artikel te lees, wat blykbaar net vir my bedoel is! Ek dink gedurigdeur aan die teksverwysings—byvoorbeeld Efesiërs 4:26 wat sê: “Laat die son nie ondergaan terwyl julle in ’n ergerlike gemoedstemming is nie.” Ek en my man het dit toegepas. Danksy Jehovah en hierdie artikel kon ek my probleem oorkom.

A. R. S., Verenigde State

Hoe om paniekaanvalle die hoof te bied Ek moet Jehovah opreg bedank vir die artikel “Hoe om paniekaanvalle die hoof te bied” (8 Junie 1996). My suster het onlangs ’n senu-ineenstorting gehad. Ons het nie geweet wat met haar fout is nie, aangesien geen dokter haar toestand kon diagnoseer nie. Sy het uiteindelik in die hospitaal beland, en daar is vasgestel dat sy ’n senu-ineenstorting gehad het en paniekaanvalle kry. Die artikel het net op die regte tyd gekom en ons laat voel dat Jehovah vir ons omgee. My suster het gesit en huil terwyl sy dit gelees het, want sy het toe waarlik geweet dat Jehovah presies verstaan wat sy deurmaak. Die woorde van die suster wat in die artikel aangehaal is, waar sy sê dat sy herhaaldelik gesien het dat Jehovah waarlik ’n bron van krag en vertroosting is, toon hoe wonderlik ons God Jehovah werklik is.

A. E. W., Suid-Afrika

“In die ore van ’n klein kindjie” Hierdie artikel (8 Junie 1997) het my diep geraak. Ek ontmoet dikwels kinders in die veldbediening. Ek sien hulle nie oor die hoof of onderskat hulle nie en praat altyd met hulle oor die Paradys. Baie dankie dat julle hierdie ondervinding gepubliseer het, want dit het my aangemoedig om op hierdie manier voort te gaan. Wie weet wie se ore dalk die volgende “ore van ’n klein kindjie” sal wees?

M. O. U., Nigerië

Hierdie artikel het my werklik diep getref! Toe ek by die deel “Ek leer Bybelwaarheid” kom en lees hoe geskok Louise was toe sy Psalm 37:9 sien wat sê dat mense die aarde sal besit—en dit boonop in haar King James-vertaling!—het ek baie trane gestort. Dankie vir hierdie lewensverhale, en gaan asseblief voort om dit gereeld in die Ontwaak! te druk.

P. C., Engeland

Van ons lesers Ek waardeer al die tydskrifte wat ons ontvang. Ek het veral die kommentare van lesers in die Ontwaak! van 8 Junie 1997 oor uitsetting geniet. Ek was uitgesit en is toe die volgende jaar herstel. Te veel mense dink dat hierdie optrede te streng is. Maar dit is werklik nie te streng nie. Die dissipline wat ek ontvang het, was moeilik om te aanvaar, maar beslis nie te streng nie. Ek weet dat die ouer manne my net probeer help het. Dit was omdat ek hulle hulp verwerp het dat ek uitgesit is. Toe ek eers uitgesit is, het ek besef hoe eensaam die lewe sonder Jehovah is. Daar was ’n groot leemte in my lewe wat nie gevul kon word totdat ek my lewenswyse verander het en na Jehovah toe teruggekeer het nie. Die feit dat ek uitgesit was, het my nederig gemaak en dit vir my duidelik gemaak dat ek Jehovah en sy organisasie nodig het.

A. C., Kanada

Ontwaak! Jammer dat ek vergeet het om die intekening op julle uitstekende tydskrif die Ontwaak! te hernieu. Dit is ’n leersame, opvoedkundige en feitelike tydskrif met besielende en insiggewende onderwerpe. Ek wil graag al die ouer nommers hê wat ek nie ontvang het nie. Ek wil nie eers een oorslaan nie. Dankie dat julle geduldig help om onkunde te bestry.

N. S., Sri Lanka