Jongmense vra . . .

Sal God my vriend bly?

KONING DAWID was ’n man wat ’n vriendskap met God geniet het. Maar op een tydstip het hy gesê: “Die benoudhede van my hart is wyd uitgestrek.” Dawid het nie net gely omdat ander hom sleg behandel het nie, maar ook weens sy eie foute. Hy het begin voel dat selfs God hom verwerp het, en hy het gebid: “Wend U tot my en wees my genadig, want ek is eensaam en ellendig.”—Psalm 25:11, 16-19.

Dalk voel jy ook benoud. Jy is moontlik by die huis of by die skool in ’n baie onaangename situasie wat eenvoudig oorweldigend is. Aan die ander kant kan jy ernstige gesondheidsprobleme hê of ontmoedig wees weens die een of ander swakheid waarmee jy te kampe het. Wat die geval ook al is, jy hoef nie alleen te ly nie; God bied sy vriendskap en ondersteuning ruimhartig aan.a As jy reeds begin het om ’n verhouding met hom op te bou, sal dit jou bemoedig om te weet dat hy nie sy vriende in die steek laat wanneer hulle ’n moeilike tyd deurmaak nie. Wanneer probleme jou teister, kan dit nietemin vir jou voel of God ver weg is. Dit kan selfs vir jou voel asof hy jou glad nie help nie. Maar is dit werklik die geval?

“’n Doring in die vlees”

Lees asseblief eers 2 Korintiërs 12:7-10. Daar vertel die apostel Paulus hoe hy gely het aan iets wat hy “’n doring in die vlees” genoem het. Die “doring” was waarskynlik die een of ander soort fisiese gebrek, dalk iets wat met sy sig te doen gehad het. Wat dit ook al was, dit het hom emosioneel bly ‘neerslaan’. Ondanks drie ernstige versoeke dat God die “doring” van hom moet verwyder, het dit by hom gebly.

Het Jehovah Paulus se gebede geïgnoreer? Glad nie! God het vir hom gesê: “My onverdiende goedhartigheid is voldoende vir jou; want my krag word tot volmaaktheid gebring in swakheid.” Hoewel Jehovah besluit het om nie daardie “doring” uit te trek nie, het hy Paulus nie verlaat nie. Deur middel van God se onverdiende goedhartigheid het Paulus ’n hegte vriendskap met hom geniet. Dit was “voldoende” om Paulus te help om met sy gebrek saam te leef. Terwyl Paulus geworstel het om dit te doen, sou hy ook God se ondersteunende krag op ’n nuwe en persoonlike manier ervaar.

Hulp om probleme die hoof te bied

Soos Paulus, kan jy die een of ander soort “doring”, of probleem, hê wat jou steek en pessimisme en ontmoediging kan veroorsaak. Soos in Paulus se geval, laat God dalk toe dat die probleem voortduur. Dit beteken nie dat hy nie meer jou Vriend is nie. God het vir die apostel Paulus gesê: “My krag word tot volmaaktheid gebring in swakheid.” As jy op God se krag staatmaak en nie op jou eie nie, kan jy volhard. Jy kan selfs vind dat jy met die hulp van God se gees dinge kan bereik wat jy nooit gedink het moontlik is nie. Paulus het gesê: “Ek [skep] behae in swakhede . . . Want wanneer ek swak is, dan is ek kragtig.”

Dít was waar vir ’n jong vrou met die naam Robinb. Op die ouderdom van 14 het sy haar sig weens gloukoom verloor. Daardie selfde jaar het haar moeder skielik gesterf. “Ek het nou net Jehovah gehad”, sê Robin aangaande die tyd toe sy hierdie pynlike “dorings” begin hanteer het. “Ek het geweet dat ek naby hom moes bly as ek dit wou deurstaan.” Dit is presies wat Robin gedoen het, en uiteindelik het sy as ’n voltydse evangeliedienaar gedien. Sy sê: “Ek het Jehovah in alles gevra om my te help. Hy het dit werklik gedoen.”

Baie jongmense het gevind dat beproewinge hulle in werklikheid help om nader aan God te kom. Neem byvoorbeeld jong Jeff. Sy pa het hulle verlaat, en Jeff se ma moes na die sewe kinders omsien. “Ek het ’n vaderfiguur baie gemis”, erken Jeff, wat destyds maar net 12 was. “Ek wou so graag hê dat iemand die leemte moes vul wat ek elke dag gevoel het.” Wat het Jeff gedoen? “Ek het tot Jehovah gebid om my te help om daardie leemte te vul.” Jeff het in ooreenstemming met sy gebede opgetree en in geestelike bedrywighede verdiep geraak. Mettertyd kon hy Jehovah se hand van ondersteuning voel—wat deur sy versterkende heilige gees en deur die Christengemeente voorsien is. (Vergelyk Psalm 27:10.) Nou op 27-jarige ouderdom dink Jeff terug: “Daar was niemand by wie ek geborge kon voel nie; daarom het ek baie na aan Jehovah gekom.” Hy noem daardie hegte verhouding “’n kosbare seën wat uit hierdie beproewing voortgekom het”.

Hoe om God se hulp te verkry

Jou hemelse Vriend sal jou op soortgelyke wyse deur jou probleme help. Maar wat moet jy doen? Wel, alle vriendskap het kommunikasie nodig om te gedy. Gebed is ons manier om met God te kommunikeer. Daardeur laat ons hom weet dat ons sy hulp nodig het. Gebed beteken egter nie veel as dit koud of meganies is nie. Soos die jongmense wat hierbo gemeld word, moet jy jou ‘hart uitstort’ voor God! (Psalm 62:9). Jy moet dalk selfs smekinge tot hom rig (Filippense 4:6). Smekinge is gebede wat baie vurig en ernstig is.

Veronderstel jy het ’n probleem om jou gedagtes te beheers of jy sukkel om met ’n slegte gewoonte te breek. Smeek Jehovah! Smeek hom gedurende tye van versoeking om jou te help. Dit is dalk nie altyd maklik nie. “Wanneer ek ’n sterk begeerte kry om iets verkeerds te doen, dwing ek myself om te bid”, het Gary erken. “Soms dink ek: ‘Hoe kan ek Jehovah nader?’ Maar ek vra hom in elk geval om hulp. Hy gee my die krag wat ek nodig het om te volhard.” Selfs al is dit aanvanklik moeilik, moet jy aanhou om jou hart voor God uit te stort.

Maar sê nou dit lyk of jou gebede nie verhoor word nie? Lora het byvoorbeeld gesukkel om die slegte gewoonte van masturbasie te oorkom. “Ek het eerlik met Jehovah oor die probleem gepraat”, verduidelik sy, “maar dit het net nie gelyk asof ek kon ophou nie.” Soms laat God ons toe om te toon hoe ernstig ons oor ons versoeke is. (Vergelyk Psalm 88:14, 15.) Ons moet gevolglik volhard in gebed! (Matteus 7:7; Romeine 12:12). Dit is presies wat Lora gedoen het. Terselfdertyd het sy begin om wenke toe te pas wat in materiaal oor die onderwerp in publikasies van die Wagtoringgenootskap verskyn het.c Sy het mettertyd resultate begin sien. Sy onthou: “Elke keer as ek ’n versoeking met welslae weerstaan het, het ek Jehovah gedank, want ek het geweet dat hy met my is.” Jy kan weliswaar terugslae hê terwyl jy sukkel om jou probleem te bowe te kom. Maar solank jy daarteen stry en nie opsetlik voor jou swakhede swig nie, sal jou “ywerige inspanning” God behaag en sal hy jou Vriend bly.—2 Petrus 1:5.

Werk saam met God

Nog ’n manier om van God se hulp gebruik te maak, is om sy uitnodiging aan te neem om een van sy “medewerkers” te wees (1 Korintiërs 3:9). Dit sluit in dat ons ’n deelname daaraan het om ander van God te help leer (Matteus 28:19, 20). Wanneer jy benoud of mismoedig voel, is die gedagte om aan enige soort werk deel te neem dalk nie so aangenaam nie. Maar as jy “volop het om in die werk van die Here te doen”, kan dit jou werklik help (1 Korintiërs 15:58). Jy sal ten minste jou gedagtes van jou eie probleme afwend. (Vergelyk Spreuke 18:1.) Robin, wat vroeër aangehaal is, sê van die moeilike tye wat sy deurgemaak het: “Wat my aan die gang gehou het, was my werk vir Jehovah!”

As jy saam met God werk, kan dit jou ook help om enige knaende gevoelens dat God jou verlaat het te oorkom. Word twee mense nie dikwels hegter vriende wanneer hulle as ’n span saamwerk om ’n gemeenskaplike doelwit te bereik nie? Terwyl jy aan die predikingswerk deelneem, moet jy voortdurend uitdagings die hoof bied. Jy vind dat jy jou tot God wend om hulp. En namate God jou arbeid seën, word sy vriendskap al hoe werkliker. Jy begin besef hoeveel vertroue God in jou as ’n medewerker stel. Dit kan werklik jou selfvertroue opbou.

Carol was byvoorbeeld baie onseker van haarself. Haar ma het selfmoord gepleeg, en haar beledigende pa het haar voortdurend sleggesê. Maar op die ouderdom van 17 het sy een van Jehovah se Getuies geword en aan die predikingswerk begin deelneem. Nou ná tien jaar as ’n voltydse evangeliedienaar, sê sy: “Hierdie werk het my ontsettend baie gehelp, want ek het gesien hoe Jehovah my seën. Ek sê vir myself: ‘As God my liefhet, is ek iets werd.’ Om deur Jehovah gebruik te word om sy naam te verkondig, het my veiliger laat voel.”

“Smaak en sien dat die HERE goed is”

“[God het] my uit al my vrees gered”, het koning Dawid geskryf ná ’n noue ontkoming uit ’n lewensgevaarlike situasie (Psalm 34:1, 5, 7; 1 Samuel 21:10-12). Dawid kon dus uit ondervinding sê: “Smaak en sien dat die HERE goed is; welgeluksalig is die man wat by Hom skuil!”—Psalm 34:9.

Hoewel jou lewe dalk nooit soos Dawid s’n in gevaar sal wees nie, sal jy beslis soms druk en spanning ervaar. Wanneer ‘benoudhede in jou hart wyd uitstrek’, moet jy God om hulp smeek (Psalm 25:17). Moenie bang wees dat God sy vriendskap van jou sal wegneem nie. Terwyl jy geduldig volhard en persoonlik Jehovah se ondersteuning en sorg ervaar, sal jy self “smaak en sien dat die HERE goed is”. En hy sal vir ewig jou Vriend bly.—Jakobus 4:8.

[Voetnote]

[Prent op bladsy 19]

Laat God sy vriende in die steek in tye van teenspoed?