Het jy “’n doring in die vlees”?
1 Ons wil baie graag ons opdrag om die goeie nuus te verkondig so goed as moontlik uitvoer. Maar baie van ons dierbare broers en susters vind dit moeilik om ’n volle deelname daaraan te hê omdat siekte of liggaamsgebreke hulle kniehalter, wat dit vir hulle moeilik maak om soveel te doen as wat hulle graag sou wou doen. Dit kan vir hulle ’n uitdaging wees om gevoelens van ontmoediging die hoof te bied, veral as hulle sien hoe aktief ander om hulle in die bediening is.—1 Kor. 9:16.
2 ’n Voorbeeld om na te volg: Die apostel Paulus moes “’n doring in die vlees” verduur. Hy het Jehovah drie keer dringend versoek om die pynlike struikelblok te verwyder, wat hy beskryf het as “’n engel van Satan” wat hom bly slaan. Ten spyte daarvan het Paulus nogtans volhard en met sy bediening voortgegaan. Hy het nie homself bejammer of ’n chroniese klaer geword nie. Hy het sy bes gedoen. Die rede waarom hy suksesvol met hierdie probleem kon saamleef, was hierdie versekering van God: “My onverdiende goedhartigheid is voldoende vir jou; want my krag word tot volmaaktheid gebring in swakheid.” Paulus se swakheid het ’n bron van krag geword toe hy geleer het om sy situasie te aanvaar en op Jehovah en sy heilige gees te vertrou om te volhard.—2 Kor. 12:7-10.
3 Hoe jy kan volhard: Beperk swak gesondheid jou diens aan God? Indien wel, moet jy Paulus se uitkyk navolg. Al kan jou siekte of liggaamsgebrek nie in hierdie stelsel van dinge permanent genees word nie, kan jy jou volle vertroue in Jehovah stel, wat jou behoeftes verstaan en “die krag wat bo die normale is”, sal voorsien (2 Kor. 4:7). Maak gebruik van die hulp wat in die gemeente vir jou beskikbaar is, en moenie jou afskei nie (Spr. 18:1). As dit vir jou moeilik is om aan die deur-tot-deur-werk deel te neem, moet jy praktiese maniere soek om informele of telefoongetuieniswerk te doen.
4 Hoewel ’n doring in die vlees jou kan beperk in wat jy in die bediening kan doen, hoef jy nie uitgesluit te voel nie. Soos Paulus, kan jy ook “deeglik van die goeie nuus van die onverdiende goedhartigheid van God . . . getuig” en doen wat jou krag en omstandighede jou toelaat (Hand. 20:24). Terwyl jy jou inspan om jou bediening uit te voer, moet jy onthou dat dit vir Jehovah welbehaaglik is.—Heb. 6:10.