Peste—’n Teken van die einde?

DUI die peste van ons dag aan dat die einde van die wêreld op hande is? Voordat ons hierdie vraag beantwoord, laat ons eers kyk wat bedoel word met die uitdrukking “die einde van die wêreld”.

Baie mense glo die einde van die wêreld beteken dat God die aarde en al die lewe daarop sal vernietig. God se Woord sê egter dat hy die aarde “geformeer [het] om bewoon te word” (Jesaja 45:18). Sy voorneme is om die planeet met gesonde, gelukkige mense te vul wat gretig is om volgens sy regverdige standaarde te lewe. Die einde van die wêreld beteken dus nie die einde van die aarde en al sy bewoners nie. Dit beteken eerder die einde van die huidige stelsel en van diegene daarin wat weier om God se wil te doen.

Die apostel Petrus het dit getoon toe hy geskryf het: “Die wêreld [van Noag se dag is] vernietig toe dit met water oorstroom is.” Toe die wêreld in Noag se tyd vernietig is, was dit die goddeloses wat vergaan het. Die aarde het bly staan en so ook die regverdige Noag en sy gesin. Soos Petrus vervolgens sê, sal God weer in die toekoms optree om die “vernietiging van die goddelose mense” teweeg te bring.—2 Petrus 3:6, 7.

Ander Bybeltekste steun deurgaans hierdie beskouing. Spreuke 2:21, 22 sê byvoorbeeld: “Die opregtes sal die land bewoon, en die regskapenes daarin oorbly, maar die goddelose sal uit die land uitgeroei, en die ontroues sal daaruit weggeruk word.”—Sien ook Psalm 37:9-11.

Peste en die einde van die wêreld

Maar wanneer gaan dit gebeur? Vier van Jesus se dissipels het hom daardie vraag gevra. Hulle het gevra: “Wat sal die teken van u teenwoordigheid en van die voleinding van die stelsel van dinge wees [of, soos sommige Bybelvertalings sê, “die einde van die wêreld”]?” Jesus het geantwoord: “Nasie sal teen nasie opstaan en koninkryk teen koninkryk, en daar sal voedseltekorte en aardbewings op die een plek na die ander wees” (Matteus 24:3, 7). In die parallelle verslag in Lukas 21:10, 11 het Jesus bygevoeg: “Daar sal . . . op die een plek na die ander peste [wees] . . . , en daar sal vreesaanjaende gesigte wees, en groot tekens van die hemel af.”

Let daarop dat Jesus nie gesê het dat slegs peste sou toon dat die einde naby is nie. Nee, hy het ook groot oorloë, aardbewings en voedselskaarstes genoem. In sy uitvoerige profesieë in Matteus 24 en 25, Markus 13 en Lukas 21 het Jesus baie ander dinge voorspel wat sou plaasvind. Dit sou alles saam moes plaasvind voordat God sou optree om ’n einde aan goddeloosheid op aarde te bring. Daar is sterk getuienis dat ons nou in daardie tyd lewe.

Die komende Paradys

Die mensdom sal nie in die toekoms deur peste of deur God uitgewis word nie. Jehovah God beloof om hierdie aarde in ’n paradys te omskep (Lukas 23:43). Hy sal onder andere die siektes verwyder wat die mensdom teister.

Ons word hiervan verseker wanneer ons die bediening ondersoek van Jesus Christus, wat sy Vader se eienskappe volmaak weerspieël het. Deur die krag wat Jesus van sy hemelse Vader gekry het, het hy diegene genees wat kreupel, vermink, blind of stom was (Matteus 15:30, 31). Hy het ook diegene genees wat melaatsheid gehad het (Lukas 17:12-14). Hy het ’n vrou wat aan bloedvloeiing gely het, ’n man met ’n verdorde hand en ’n man met watersug genees (Markus 3:3-5; 5:25-29; Lukas 14:2-4). Hy het “epilepsielyers en verlamdes” hulle gesondheid teruggegee (Matteus 4:24). By drie geleenthede het hy selfs die dooies opgewek!—Lukas 7:11-15; 8:49-56; Johannes 11:38-44.

Hierdie wonderdadige genesings bevestig God se belofte dat daar in die toekoms wat hy sal bewerkstellig “geen inwoner sal [wees wat] sê: Ek is siek nie” (Jesaja 33:24). Nooit weer sal peste mense hulle gesondheid of lewe ontneem nie. Hoe dankbaar kan ons tog wees dat ons liefdevolle Skepper die vermoë sowel as die wil het om siekte heeltemal en vir ewig uit te wis!—Openbaring 21:3, 4.

[Prente op bladsy 9]

Jesus het krag van God gekry om die siekes te genees

[Prent op bladsy 10]

In die komende aardse Paradys sal Jehovah siekte uitwis