Evolusie is nie ’n feit nie
Meningsopnames toon dat baie Amerikaners glo dat die eerste mense direk deur God geskep is en dat hulle nie deur ’n evolusieproses uit primitiewe lewensvorme ontstaan het nie. Maar waarom bevorder soveel wetenskaponderwysers in Amerika verstandelose, toevallige evolusie as ’n feit? Een rede is dat “Darwinistiese fundamentaliste . . . die wetenskapdepartemente in baie universiteite beheer”, sê Phillip E. Johnson, ’n professor in die regte aan die Universiteit van Kalifornië in Berkeley.
Johnson sê: “In sommige gevalle is professors in biologie verbied om vir studente te sê dat daar wel redes bestaan om die bewering te betwyfel dat verstandelose stoflike prosesse die wonders van biologie kon skep en wel geskep het.”
Die wetenskaplike en ingenieur Murphy O’Dean merk op: “Pleks van ’n teorie te verwerp wat nie feitelik is nie, is die ‘evolusionêre wetenskap’ geneig om oortuigend te verklaar dat ‘evolusie waar moet wees’.” Teenstrydige bewyse en die gebrek aan bewyse word geïgnoreer of weggeredeneer.
Waarom? Michael Behe, ’n molekulêre bioloog, sê in Darwin’s Black Box: “Baie mense, waaronder talle belangrike en gesiene wetenskaplikes, wil eenvoudig nie aanvaar dat daar enigiets meer as net die natuur bestaan nie. Hulle wil nie hê dat ’n bonatuurlike wese die natuur moet beïnvloed nie.” Maar ware wetenskap ignoreer nie teenstrydige getuienis ten einde voorkeuropvattings te bevorder nie. Alle wetenskaplikes glo ook nie aan evolusie nie.
Die Brasiliaanse tydskrif Veja het Carlo Rubbia, wenner van die Nobelprys vir Fisika, gevra: “Glo jy aan God?” Hoewel hy nie die bestaan van ’n persoonlike God erken het nie, het hy wel gesê: “Hoe meer jy die natuur waarneem, hoe meer verstaan jy dat alle dinge ongelooflik georganiseerd is. Dit is ’n intelligensie wat so groot is dat ek bloot deur die waarneming van natuurverskynsels tot die gevolgtrekking gekom het dat ’n Skepper bestaan.”
Sy opmerkings herinner ons aan die apostel Paulus se woorde oor God: “Sy onsigbare eienskappe word van die wêreld se skepping af duidelik gesien, omdat hulle waargeneem word in die dinge wat gemaak is, ja, sy ewige krag en Godheid.”—Romeine 1:20.