Hulle beskerm skape teen prêriewolwe

PRÊRIEWOLWE is ’n groot bedreiging vir die lewensonderhoud van skaapboere in die westelike deel van die Verenigde State. In 1996 alleen het regeringsjagters meer as 82 000 prêriewolwe doodgemaak, en sedert 1990 is meer as 600 000 doodgemaak. Maar sommige skaapboere het ’n ander manier ontdek om hulle troppe te beskerm. Hulle het llamas uit Suid-Amerika ingevoer.

Die llama en die kameel behoort tot dieselfde familie. Trouens, vroeër vanjaar is ’n kameelbul volgens berig met ’n llamamerrie gekruis, en die kleintjie lyk soos sy pa. Die llama kan ongeveer 100 kilogram weeg en is gemiddeld 120 sentimeter hoog by die skouer. Hy het lang hare wat gewoonlik wit is, maar wat ook bruin of swart kan wees. Maar wat vir skaapboere van groter belang is, is dat die llama van skape hou en prêriewolwe verwilder.

“Hy skop hulle en swaai sy kop”, verduidelik skaapboer Becky Weed. “Prêriewolwe het in vier jaar nie een van ons skape gevang nie.” Maar Weed erken dat die llama nie die volmaakte oplossing is nie, en sê: “Daar was ’n beer onder die skape en ons het vier verloor.”

’n Groep omgewingsgesinde skaapboere het die Boere-wolkoöperasie gestig. Dit is ’n maatskappy wat wol verkoop wat as “roofdiervriendelik” bemark word, dit wil sê wol van skaapboere wat niedodelike maniere gebruik om roofdiere onder beheer te hou. Buiten llamas word waghonde en donkies ook gebruik om die skape te beskerm.

Die Boere-wolkoöperasie het kontrakte aangegaan met mense om by die huis breidrag te maak. Hierdie wol is baie duur, en die truie, hoede, komberse en ander artikels wat daarvan gemaak word, kos ook meer. Sal mense ekstra betaal vir hierdie artikels? “Mense betaal meer as ek vir hulle sê van watter soort plaas dit kom”, het ’n winkeleienaar van Chatham, New York, verduidelik. “Mense hou daarvan, want daar is ’n verhaal agter die trui.”