’n Lewe van blywende veiligheid
AS JY koors het, neem jy dalk ’n pil om die hoofpyn te verlig en gebruik jy dalk ’n yssak om jou af te koel. Maar hoewel die pil en die yssak die simptome draaglik maak, behandel dit nie die oorsaak van jou koors nie. En as jy ’n ernstige gesondheidsprobleem het, het jy die behandeling van ’n ervare geneesheer nodig.
Die mensdom ly aan ’n hardnekkige koors weens onveiligheid. Ons tref tereg korttermynmaatreëls om die onaangename simptome te verlig, maar net iemand wat ’n volledige diagnose van ons situasie kan maak, kan dit genees. En niemand ken die mensdom beter as ons Skepper, Jehovah God, nie. Hy weet dat die lewe onveilig is as gevolg van probleme wat oor ons gebring is.
’n Veilige begin bederf
God se Woord verduidelik dat Jehovah die eerste mensepaar volmaak geskep het en hulle in ’n veilige omgewing gesit het. Hulle het geen angs ervaar nie. God se voorneme was dat mense vir ewig in ’n paradys moes woon, in volkome veiligheid. Die mensdom se eerste omgewing het “allerhande bome . . . , begeerlik om te sien en goed om van te eet”, ingesluit. Let daarop dat daar na hulle fisiese behoeftes omgesien is; daar is ook na hulle emosionele behoeftes omgesien, aangesien die omgewing beskryf is as “begeerlik om te sien”. Dit het ongetwyfeld beteken dat die eerste paar in ’n omgewing geplaas is waarin hulle verseker was van ’n bestendige, probleemvrye lewe.—Genesis 2:9.
Adam en Eva het God se liefdevolle soewereine heerskappy verwerp en sodoende gevoelens van twyfel, vrees, skande, skuld en onveiligheid in hulle lewe ingebring. Nadat Adam God verwerp het, het hy erken dat hy ‘bang was’. Die eerste mense het hulle bedek en hulle verberg vir hulle liefdevolle Skepper, met wie hulle tot op dié stadium ’n hegte en heilsame verhouding gehad het.—Genesis 3:1-5, 8-10, vgl. NW.
Jehovah se oorspronklike voorneme het nie verander nie. Die Bybel sê dat ons Skepper ’n liefdevolle God is, wat gehoorsame mense binnekort in staat sal stel om die aarde ’n paradys te maak en om vir ewig in veiligheid te lewe. Deur die profeet Jesaja is dié belofte gegee: “Ek skep nuwe hemele en ’n nuwe aarde, . . . wees julle bly en juig vir ewig” (Jesaja 65:17, 18). Die apostel Petrus het aangaande hierdie nuwe hemele en nuwe aarde gesê: “In hulle sal regverdigheid woon.”—2 Petrus 3:13.
Hoe gaan dit teweeggebring word? Deur ’n regering wat Jehovah tot stand gebring het. Dít is die Koninkryk waarvoor Jesus Christus gesê het sy volgelinge moet bid: “Ons Vader in die hemele, laat u naam geheilig word. Laat u koninkryk kom. Laat u wil geskied, soos in die hemel, so ook op die aarde.”—Matteus 6:9, 10.
Die Koninkryk van God sal menseregerings vervang en God se voorneme regoor die wêreld op ’n liefdevolle wyse volbring (Daniël 2:44). Die twyfel, vrees, skande, skuldgevoel en onveiligheid wat die mensdom sedert die dae van Adam geteister het, sal verdwyn. Volgens die Bybel is hierdie Koninkryk op hande. Selfs nou, in ons onseker wêreld, kan diegene wat na God se Koninkryk uitsien ’n mate van veiligheid geniet.
Stel geestelike dinge eerste
Dawid was ’n kneg van God wat geweet het hoe dit voel om bang te wees en in nood te verkeer. En tog het Dawid die woorde in Psalm 4:9, NW geskryf: “Ek wil in vrede gaan lê en meteens aan die slaap raak; want U, o HERE, alleen laat my in veiligheid woon.” (Ons kursiveer.) Jehovah het Dawid veilig laat voel, hoewel Dawid soms deur probleme omring was. Kan ons iets hieruit leer? Hoe kan ons ’n mate van veiligheid selfs in ’n onveilige wêreld verkry?
Beskou die Genesisverslag oor Adam en Eva. Wanneer het hulle onveilig begin voel? Die oomblik toe hulle hulle persoonlike verhouding met die Skepper verbreek het en geweier het om in ooreenstemming met sy voorneme vir die mensdom te lewe. As ons hierdie proses dus omkeer deur ’n hegte, persoonlike verhouding met Jehovah aan te knoop en in ooreenstemming met sy wil te probeer lewe, kan ons selfs nou ’n baie veiliger lewe geniet as wat andersins moontlik is.
As ons Jehovah deur ’n studie van die Bybel leer ken, help dit ons om die betekenis van die lewe te verstaan. Dan eers begryp ons wie ons is en waarom ons hier is. ’n Veilige lewe is moontlik as ons God liefhet, weet wat sy voorneme vir die mensdom is en verstaan waar ons inpas. ’n Man met die naam Paul het dit ’n hele paar jaar gelede uitgevind.
Paul is op een van die eilande naby die kus van Duitsland gebore en het daar grootgeword. As gevolg van wat sy ouers in die Tweede Wêreldoorlog ondervind het, het hulle as ’n gesin glad nie in godsdiens belanggestel nie. Paul sê van homself as ’n jong man: “Ek het in niks geglo nie en het niemand gerespekteer nie. Ek het my sorge in alkohol verdrink en twee of drie keer per week oormatig gedrink. Daar was geen sekuriteit in my lewe nie.”
Toe het Paul ’n bespreking met een van Jehovah se Getuies gehad. Paul het baie gestry, maar iets wat die Getuie gesê het, het hom laat dink. “Niks kom van niks nie.” Met ander woorde, alles wat ons om ons in die natuur sien, moet ’n Skepper hê.
“Ek het baie daaroor nagedink, en ek moes daarmee saamstem.” Paul het dus die Bybel saam met Jehovah se Getuies begin studeer en Jehovah leer ken. Hy erken: “Buiten my ouers was Jehovah die eerste persoon in my lewe wat ooit iets vir my gedoen het.” Paul is in 1977 as ’n Getuie gedoop en sê: “Nou weet ek wat die doel van die lewe werklik is. Ek geniet dit om in ooreenstemming met Jehovah se wil te lewe. Ek voel veilig, aangesien daar niks is wat met my of my gesin kan gebeur wat Jehovah nie in die toekoms kan regstel nie.”
Wat kan ons uit hierdie ondervinding leer? Paul het sy gevoel van onveiligheid—’n emosionele las—oorkom deur sy lewe om geestelike dinge te laat draai, nie om materiële rykdom nie. Hy het ’n sterk verhouding met die Skepper opgebou. Miljoene Getuies van Jehovah geniet so ’n verhouding. Dit gee hulle innerlike krag wat hulle help om selfopofferend te wees in hulle handelinge met ander. Jehovah se Getuies gebruik hulle eie tyd om mense by hulle huise te besoek en ander te help om hulle lewe veiliger te maak deur hulle lewe om geestelike dinge te laat draai. Maar die Getuies doen nie net die predikingswerk nie.
‘Vra julle God, Jehovah, om julle te help’
In Julie 1997 toe die Oderrivier groot gebiede in noordelike Europa oorstroom het, het Jehovah se Getuies in Duitsland gehoor van die benarde situasie van mense in die naburige Pole. Wat kon hulle doen? Individuele Getuies in en om Berlyn het wonderlike vrygewigheid getoon deur binne ’n paar dae ver oor die R586 000 te skenk.
Getuies met ondervinding in konstruksiewerk het ses uur per motor—op hulle eie onkoste—van Berlyn na die gebied om Wrocław, Pole, gereis. In een klein dorpie was baie huise erg beskadig. Die huis wat aan ’n Getuiegesin behoort het, het in meer as ses meter water gestaan. Die dogter was van plan om die volgende maand te trou en saam met haar man in die huis te woon. Wat kon gedoen word om die huis reg te maak en die gesin te help wat byna alles verloor het?
Toe die vloedwater begin sak het, het ’n buurman spottend gevra: “Waarom vra julle nie julle God, Jehovah, om julle te help, en kyk of hy sal nie?” Hoe verbaas was die buurman tog toe ’n hele paar motors uit Duitsland die volgende dag by die Getuiegesin se huis stilhou! ’n Groep vreemdelinge het uit die voertuie geklim en herstelwerk aan die huis begin doen. “Wie is hulle? Wie betaal vir die materiaal?” het die buurman gevra. Die Getuiegesin het verduidelik dat dit hulle geestelike broers is en dat hierdie besoekers vir die materiaal betaal. Inwoners van die dorp het met verwondering toegekyk terwyl die huis reggemaak word. Terloops, die troue het op die beplande datum plaasgevind.
Hierdie gesin het uitgevind dat dit nie net geestelike voordele inhou om ’n deel van die internasionale broederskap van Jehovah se Getuies te wees nie, maar dat dit ook ’n mate van veiligheid in ’n onveilige wêreld meebring. Hulle was nie die enigstes wat hierdie ondervinding gehad het nie. Regdeur die geteisterde gebied is huise en Koninkryksale van Jehovah se Getuies herstel. En bure wat nie Getuies is nie, is nie vergeet nie. Heelwat werk is ook aan hulle huise gedoen, wat baie waardeer is.
Geregtigheid, rus en veiligheid
Wanneer ’n hoë koors uiteindelik gebreek het en ons gesondheid weer normaal is, is ons inderdaad dankbaar teenoor die geneesheer wat ons gehelp het! Wanneer die koors van onveiligheid wat die mensdom omring vir ewig uit die weg geruim word—deur middel van God se Koninkryk—sal ons beslis dankbaar wees teenoor ons Skepper! Ja, hy is die een wat ons lewe in ware ‘geregtigheid, rus en veiligheid tot in ewigheid’ belowe. Wat ’n wonderlike vooruitsig tog!—Jesaja 32:17.
[Lokteks op bladsy 10]
Ons kan ’n emosionele las verlig deur ons lewe om geestelike dinge te laat draai, nie om materiële rykdom nie
[Prent op bladsy 8, 9]
God belowe ’n nuwe wêreld waar almal in blywende veiligheid sal lewe