Vigs—Watter hoop vir die toekoms?
BEHALWE dat daar nie middels is om HIV-besmetting te genees of te voorkom nie, is daar ander faktore wat keer dat die siekte beperk word. Een van hierdie faktore is die feit dat baie mense, wat nie bereid is om hulle lewenswyse te verander nie, bereid is om hulle aan besmetting bloot te stel. In die Verenigde State het die besmettingsyfer byvoorbeeld bestendig gebly, ten spyte van ’n afname in die aantal mense wat ten volle ontwikkelde vigs het. Die rede, volgens die Associated Press, is dat “baie mense nie ag slaan op waarskuwings oor voorkoming nie”.
In die wêreld se ontwikkelende nasies, na bewering die tuiste van ongeveer 93 persent van diegene wat met HIV besmet is, is daar bykomende probleme wat die bekamping van die siekte betref. Baie van hierdie lande is te arm om selfs basiese gesondheidsorg te verskaf. Selfs al was die nuwe middels in daardie lande beskikbaar—en dit is meestal nie—sou ’n jaar se behandeling meer kos as wat baie mense in ’n leeftyd verdien!
Maar kom ons veronderstel dat ’n nuwe, goedkoop geneesmiddel ontwikkel word wat die siekte wel sou genees. Sal so ’n geneesmiddel almal bereik wat dit nodig het? Waarskynlik nie. Volgens die Verenigde Nasies-kinderfonds sterf ongeveer viermiljoen kinders elke jaar aan vyf siektes wat deur goedkoop, bestaande entstowwe voorkom kan word.
Wat van besmette mense wat in lande woon waar hulle nie medisyne vir behandeling kan bekom nie? Ruth Mota van die Internasionale Gesondheidsprogramme in Santa Cruz, Kalifornië, het gehelp om HIV-voorkoming en -versorgingsprogramme in tientalle ontwikkelende lande te organiseer. Sy sê: “Uit my ondervinding is ’n positiewe gesindheid net so belangrik soos toegang tot medikasie. Ek ken mense wat al 10 tot 15 jaar lank met HIV lewe en nog nooit medikasie ontvang het nie. Medikasie is voordelig, maar genesing behels baie meer as om chemikalieë in jou liggaam te sit. Dit behels gesindheid, maatskaplike ondersteuning, geestelikheid en voeding.”
Daar sal ’n oplossing wees
Is daar enige rede om te glo dat vigs eendag oorwin sal word? Ja, daar is. Die beste hoop word gevind in die woorde van wat baie die Onse Vader (Paternoster) noem. In daardie gebed, wat in die Bybelboek Matteus opgeteken staan, smeek ons dat God se wil op die aarde gedoen moet word soos dit in die hemel gedoen word (Matteus 6:9, 10). Dit is nie God se wil dat mense vir ewig deur siekte geteister word nie. God sal daardie gebed verhoor. Wanneer hy dit doen, sal hy nie net ’n einde aan vigs maak nie, maar ook aan alle ander siektes wat die mensdom teister. Dan ‘sal geen inwoner sê: Ek is siek nie’.—Jesaja 33:24.
Intussen is voorkoming die beste strategie. Vir baie siektes is daar twee opsies: Jy kan dit óf voorkom óf dit moontlik genees. Met HIV is daar nie so ’n keuse nie. Dit kan voorkom word, maar op die oomblik kan dit nie genees word nie. Waarom kanse waag wat jou lewe in gevaar stel? Voorkoming is beslis beter as geen genesing nie.
[Lokteks op bladsy 9]
“Genesing behels baie meer as om chemikalieë in jou liggaam te sit. Dit behels gesindheid, maatskaplike ondersteuning, geestelikheid en voeding.”—Ruth Mota
[Venster/Prent op bladsy 9]
“Die gemeente was wonderlik”
Die apostel Paulus het mede-Christene aangespoor: “Laat ons . . . aan almal goed doen, maar veral aan dié wat in die geloof aan ons verwant is” (Galasiërs 6:10). Karen, wat in die eerste artikel gemeld is, se moeder vertel wat die reaksie van die plaaslike gemeente van Jehovah se Getuies was toe hulle uitgevind het dat Karen en Bill HIV het. Sy sê: “Die gemeente was wonderlik. Toe Bill longontsteking gekry het, was Karen self siek, en sy het gesukkel om na hom en die kinders om te sien. Die broers het hulle huis skoongemaak, hulle motor herstel en hulle wasgoed gewas. Hulle het hulle gehelp om na regsake om te sien en om na ’n ander huis te trek. Hulle het vir die gesin kos gekoop en gekook. Die broers het hulle werklik emosioneel, geestelik en materieel bygestaan.”
[Prent op bladsy 8]
Getrouheid in die huwelik kan HIV-besmetting voorkom