Wie was Jesus Christus?

Hierdie tyd van die jaar is daar in baie lande regoor die wêreld Kersfeesvieringe. Honderdmiljoene mense glo dat Jesus Christus op 25 Desember sowat 2000 jaar gelede gebore is. In skilderye en beeldhouwerk is daar verskillende voorstellings van hom as ’n baba in ’n krip. Maar hy het natuurlik ’n man geword en 33 1/2 jaar op die aarde gelewe.

HET jy al ooit gewonder hoe Jesus gelyk het toe hy ’n volwassene was? Wat was sy velkleur? Was hy sterk gebou en aantreklik of was hy swak en het hy ietwat siek gelyk, soos hy deur verskeie kunstenaars deur die eeue heen uitgebeeld is? Was hy glad geskeer of het hy ’n baard gehad? Het hy lang hare gehad?

Het Jesus ook ’n aura van heiligheid gehad, soos ’n soort stralekrans om sy kop soos sekere kunstenaars hom voorgestel het? Of was die werklikheid anders—dat hy nie sulke onderskeidende kenmerke gehad het nie maar onopsigtelik in ’n skare was?

Sekulêre geskiedkundiges en kunstenaars het deur die eeue heen teenstrydige idees oor die voorkoms van Jesus gehad. Daarbenewens het Bybelskrywers wat in die eerste eeu gelewe en met hom geassosieer het in ooggetuieverslae betroubare inligting oor hom verskaf.

Maar die volgende vrae is baie belangriker as om te weet hoe hy gelyk het: Wie was Jesus Christus werklik? Watter rol speel hy in God se voorneme? Het hy daardie rol vervul? Wie is hy vandag, en waar is hy? Het hy ’n posisie wat so belangrik is dat dit die hele mensdom sal beïnvloed, selfs baie wat reeds gesterf het?

Kom ons ondersoek eerstens die getuienis aangaande Jesus se voorkoms. Hoe het hy gelyk?