Die Bybelse beskouing
Wat is God se heilige gees?
“En toe die hele volk gedoop is, is ook Jesus gedoop, en terwyl hy gebid het, is die hemel geopen en het die heilige gees in liggaamlike gedaante soos ’n duif op hom neergedaal, en ’n stem het uit die hemel gekom: ‘Jy is my Seun, die geliefde; ek het jou goedgekeur.’”—Lukas 3:21, 22.
IN ’N toespraak voor ’n groep filosowe in eertydse Griekeland het die apostel Paulus God die “Here van hemel en aarde” genoem. Dit is hierdie God, het Paulus gesê, wat “die wêreld en alles daarin gemaak het” en wat “aan almal lewe en asem en alles gee” (Handelinge 17:24-28). Hoe doen God dit alles? Dit is deur middel van sy heilige gees, of werkende krag.
Die Bybel verduidelik ook dat God ’n ‘oorvloed van dinamiese energie het en sterk is in krag’ (Jesaja 40:26, NW). Ja, God het die ganse heelal geskep, wat sy dinamiese energie en krag openbaar.
Krag in werking
Dit sou nie heeltemal korrek wees om te sê dat die heilige gees God se krag is nie. Dit is omdat krag latent, oftewel onaktief teenwoordig, in iemand of iets kan wees, soos die krag van ’n battery wat gelaai is, maar nie gebruik word nie. Die Skrif stel God se gees egter voor as iets wat in beweging is, amper soos die elektriese stroom wat uit ’n battery vloei wanneer dit gebruik word (Genesis 1:2). God se heilige gees is dus die energie wat hy uitstuur, sy werkende krag.
Die Bybel sê soms dat die heilige gees ’n sekere taak uitvoer of op ’n ander plek as God is (Matteus 28:19, 20; Lukas 3:21, 22; Handelinge 8:39; 13:4; 15:28, 29). Party mense wat sulke tekste lees, neem aan dat die heilige gees ’n eie identiteit apart van God het. Waarom word hierdie taal in die Skrif gebruik? Is die heilige gees ’n wese wat afsonderlik van God bestaan?
Die almagtige God bestaan op ’n vlak wat ver verhewe bo sy fisiese skepping is. Hy is ’n gees, onsigbaar vir ons beperkte sinne (Johannes 4:24). Die Bybel sê dat Jehovah God in die hemel woon en dat hy vanuit die hemel die mensdom aanskou (Psalm 33:13, 14). Dit is te verstane. Die Skepper móét groter wees as die elemente waarmee hy werk. Hy bestuur, manipuleer, vorm en beheer hulle.—Genesis 1:1.
Vanuit God se onsigbare woning kan hy dinge enige tyd en op enige plek laat gebeur. Hy hoef dus nie op die plek te wees waar sy werkende krag werksaam is nie. Hy kan sy gees stuur om ’n taak uit te voer (Psalm 104:30). Mense van vandag wat huishoudelike toestelle beheer deur middel van draadlose afstandbeheer verstaan dit maklik. Ons erken vandag die krag van onsigbare dinge soos elektrisiteit of infrarooi golwe. Net so kan God met sy onsigbare heilige krag, of gees, enigiets uitvoer wat hy hom ook al voorneem, sonder dat hy hom van een plek na ’n ander hoef te verplaas.—Jesaja 55:11.
In Bybeltye was hierdie begrip miskien moeilik om te verstaan. Deur van die heilige gees as ’n aparte krag te praat, het dit lesers ongetwyfeld gehelp om te verstaan hoe God sy krag uitoefen, al is hy nie persoonlik teenwoordig op die plek waar dit werksaam is nie. Wanneer die Bybel sê dat die heilige gees dit of dat gedoen het, sê dit in werklikheid dat God self sy krag op mense of dinge uitgeoefen het om sy wil uit te voer.
Die verskillende werksaamhede van die heilige gees
Jehovah het heilige gees gebruik in die skepping van alle lewende en lewelose dinge (Psalm 33:6). God het dit ook gebruik om ’n gewelddadige en onberouvolle mensegeslag deur middel van ’n vloed te vernietig (Genesis 6:1-22). Dit was hierdie selfde werkende krag wat God gebruik het om die kosbare lewe van sy Seun na die baarmoeder van die Joodse maagd Maria oor te plaas.—Lukas 1:35.
Soms het die gees manne aangevuur om die waarheid met vrymoedigheid en onverskrokkenheid voor vyande te spreek—dikwels ondanks lewensgevaar (Miga 3:8). En daar is baie gevalle in die Bybel, veral met betrekking tot profesieë, waar manne en vroue deur middel van hierdie krag spesiale insig of begrip gegee is. Aangesien geen mens akkuraat kan voorspel wat die toekoms inhou nie, is dit ’n uitsonderlike werking van die gees.—2 Petrus 1:20, 21.
Die gees kan ook wonderdadige kragte aan individue gee. Deur middel van hierdie krag kon Jesus byvoorbeeld natuurkragte beheer, siektes genees en selfs die dooies opwek (Lukas 4:18-21; 8:22-26, 49-56; 9:11). Die gees is gebruik om die vroeë Christene te organiseer en te versterk om as getuies van God oor die ganse aarde te dien.—Handelinge 1:8; 2:1-47; Romeine 15:18, 19; 1 Korintiërs 12:4-11.
God se krag word ten behoewe van ons aangewend
Is dit vir God se aardse knegte van vandag moontlik om hierdie onbeperkte energiebron te benut? Ja! God gee sy heilige gees aan sy volk om hulle te help om sy wil te verstaan en uit te voer. Hy gee sy gees aan diegene wat dit opreg in gebed van hom vra, wat die regte hartsgesindheid het en wat aan sy vereistes voldoen (1 Korintiërs 2:10-16). Daardie gees kan onvolmaakte mense toerus met “krag wat bo die normale is” sodat hulle God ondanks struikelblokke getrou kan dien. Dit is dus ongetwyfeld die begeerte van alle godvresende mense om God se gees te ontvang en te behou.—2 Korintiërs 4:7; Lukas 11:13; Handelinge 15:8; Efesiërs 4:30.
God gaan binnekort hierdie dinamiese krag gebruik om ’n einde te maak aan die onregverdigheid en lyding in hierdie goddelose wêreld en sodoende sy groot naam heilig. Heilige gees sal die hele wêreld ten goede beïnvloed, en die vrugte daarvan sal vir almal duidelik wees om te sien, tot verheerliking van die Bron daarvan.—Galasiërs 5:22, 23; Openbaring 21:3, 4.