Die Bybel se beskouing

Is die heilige gees ’n persoon?

WAT is God se heilige gees? In die openingswoorde van die Bybel sê dit dat die heilige gees—wat ook vertaal word as “God se werkende krag”—“heen en weer oor die oppervlak van die waters beweeg” (Genesis 1:2). Die verslag oor Jesus se doop dui aan dat God in “die hemele” is, maar dit sê dat die heilige gees ‘soos ’n duif neergedaal’ en op Jesus gekom het (Matteus 3:16, 17). Verder het Jesus van die heilige gees as ’n “helper” gepraat.—Johannes 14:16.

Hierdie en ander Bybelverse het party tot die gevolgtrekking laat kom dat die heilige gees ’n persoon is, net soos God, Jesus en die engele individuele geespersone is. Trouens, party van die invloedrykste godsdienste van die Christendom sê al eeue lank dat die heilige gees ’n persoonlikheid het. Ondanks hierdie lank gevestigde leerstelling is baie kerklidmate nog steeds verwar, en sommige verskil selfs hieroor met hulle godsdiensleiers. Volgens ’n onlangse opname glo 61 persent van dié met wie ’n onderhoud gevoer is byvoorbeeld dat God se gees “’n simbool van God se teenwoordigheid of krag is, maar nie ’n lewende wese is nie”. Maar wat sê die Bybel?

Wat die Bybel sê

Die enigste gevolgtrekking wat ’n eerlike Bybelleser kan maak, is dat die heilige gees, in teenstelling met die amptelike beskrywings deur die kerk, nie ’n persoon is nie. Beskou die volgende Bybelverslae.

1. Toe Maria, die moeder van Jesus, haar niggie Elisabet besoek het, sê die Bybel dat die ongebore kind in Elisabet se baarmoeder gespring het, “en Elisabet is met heilige gees vervul” (Lukas 1:41). Is dit redelik om te dink dat een persoon met ’n ander persoon “vervul” sou word?

2. Toe Johannes die Doper met sy dissipels gepraat het oor Jesus as die een wat hom sou opvolg, het Johannes gesê: “Ek doop julle wel met water . . . , maar die een wat ná my kom, is sterker as ek, wie se sandale ek nie werd is om uit te trek nie. Hy sal julle met heilige gees . . . doop” (Matteus 3:11). Johannes kon beswaarlik na die heilige gees as ’n persoon verwys het toe hy gesê het dat mense daarmee gedoop sou word.

3. Terwyl die apostel Petrus ’n Romeinse leëroffisier en sy gesin besoek het, het hy gesê dat God Jesus “met heilige gees en krag” gesalf het (Handelinge 10:38). Kort daarna het “die heilige gees op [die leëroffisier se huisgesin] geval”. Die verslag sê dat baie verbaas was “omdat die heilige gees as vrye gawe ook op mense van die nasies uitgestort is” (Handelinge 10:44, 45). Weer eens is die woorde wat gebruik word, in stryd met die idee dat die heilige gees ’n persoon is.

In God se Woord is dit nie ongewoon dat iets wat nie ’n persoon is nie, verpersoonlik word. Dit sluit wysheid, onderskeidingsvermoë, sonde, die dood en onverdiende goedhartigheid in (Spreuke 8:1–9:6; Romeine 5:14, 17, 21; 6:12). Jesus self het gesê dat “die wysheid . . . deur al sy kinders [oftewel goeie resultate] geregverdig” word (Lukas 7:35). Wysheid is natuurlik nie ’n persoon met letterlike kinders nie! So ook is die heilige gees nie ’n persoon bloot omdat dit soms verpersoonlik word nie.

Wat is die heilige gees?

In die Bybel word God se heilige gees as God se krag in werking geïdentifiseer. ’n Akkurate vertaling van die Bybel se Hebreeuse teks verwys dus na God se gees as “God se werkende krag” (Genesis 1:2). Hierdie konsep word deur die hele Bybel ondersteun.—Miga 3:8; Lukas 1:35; Handelinge 10:38.

In teenstelling met wat algemeen geglo word, is God nie oral op dieselfde tyd teenwoordig nie. Hy woon eerder in die geesteryk, in ’n “vaste woonplek” (1 Konings 8:39; 2 Kronieke 6:39). Die Skrif verwys ook na ’n spesifieke plek waar God woon en waar sy “troon” is (1 Konings 22:19; Jesaja 6:1; Daniël 7:9; Openbaring 4:1-3). Maar vanuit sy “vaste woonplek” kan hy sy werkende krag gebruik om enige plek in die geesteryk sowel as die fisiese heelal te bereik.—Psalm 139:7.

In 1879 het die Bybelgeleerde Charles L. Ives God se vermoë om sy krag vanuit ’n vaste plek uit te oefen, goed toegelig. Hy het geskryf: “Ons sê byvoorbeeld: ‘Maak oop die hortjies, en laat die son in.’ Ons bedoel nie die son self nie, maar die sonstrale, dit wat deur die son uitgestraal word.” Net so hoef God nie te gaan na waar hy sy werkende krag wil gebruik nie. Hy gebruik eenvoudig sy heilige gees, wat selfs die uithoeke van die skepping kan bereik. As jy verstaan wat die heilige gees werklik is—God se magtige werkende krag—kan dit jou die vertroue gee dat Jehovah sy beloftes sál vervul.

HET JY AL GEWONDER?

◼ Leer die Bybel dat die heilige gees ’n persoon is?—Handelinge 10:44, 45.

◼ Wat is die heilige gees?—Genesis 1:2.

◼ Hoe ver reik God se heilige gees?—Psalm 139:7.