Jongmense vra . . .

Hoe kan ek iemand wat ver woon die hof maak?

“Ek het kort tevore ’n groep afgevaardigdes wat ’n internasionale byeenkoms van Jehovah se Getuies bygewoon het na hulle hotel vergesel. Ek het op die punt gestaan om huis toe te gaan, maar toe het ’n ander groep daar verbygeloop. Ek het toe gestop om te gesels en het vir Odette ontmoet. Later daardie week het ons mekaar toevallig weer gesien. Ons het besluit om vir mekaar te skryf, en nadat ons mekaar ’n paar jaar per brief leer ken het, het ons mekaar die hof begin maak.”—Tony.

DIE wêreld het kleiner geword. In die laaste dekades het goedkoop lugvervoer, ’n aardwye telefoonnetwerk, vinnige posdiens en die Internet nuwe moontlikhede op die gebied van romanse geskep. En die idee om iemand oor honderde of selfs duisende kilometers die hof te maak, lyk dalk om meer as een rede aanloklik—veral as huweliksvooruitsigte in jou omgewing beperk lyk.

Vir sommige paartjies was dit ’n seën om iemand die hof te maak wat ver van hulle af gewoon het. “Ons is al 16 jaar lank gelukkig getroud”, sê Tony. Sommige redeneer dalk selfs dat so ’n verhouding die voordeel het dat dit paartjies toelaat om mekaar te leer ken sonder die oorweldigende fisieke aantrekkingskrag. Maar ongeag watter voordele dit ook al het, ’n romanse tussen mense wat ver van mekaar af woon, bied ’n paar unieke uitdagings.

Leer mekaar ken

Dit is die beste om soveel moontlik te weet oor die persoon met wie jy dink jy wil trou. Maar soos ’n man met die naam Frank uit persoonlike ondervinding sê: “Dit is nie maklik om die werklike persoon, ‘die geheime persoon van die hart’, te leer ken nie” (1 Petrus 3:4). Doug, ’n ander Christen wat iemand die hof gemaak het wat ver van hom af gewoon het, erken: “As ek nou daaraan terugdink, besef ek dat ons mekaar nie baie goed geken het nie.”

Is dit werklik moontlik om iemand te leer ken wat honderde of duisende kilometers van jou af is? Ja, maar dit kan buitengewone inspanning verg. “Ons het nie geld gehad vir telefoonoproepe nie, daarom het ons een keer per week vir mekaar geskryf”, sê Doug. Maar Joanne en Frank het gedink dat dit nie genoeg is om vir mekaar te skryf nie. “Ons het aan die begin vir mekaar geskryf en die telefoon probeer”, sê Joanne. “Toe het Frank vir my ’n klein bandopnemertjie gestuur. Ons het elke week ’n nuwe kasset opgeneem.”

Eerlikheid, die enigste manier

Watter vorm van kommunikasie julle ook al gebruik, dit is belangrik om eerlik te wees. “As jy leuens vertel, sal dit agterna aan die lig kom en die verhouding beïnvloed”, sê ’n Christenvrou met die naam Ester. “Wees eerlik met mekaar. Wees eerlik met jouself. As daar iets is waaroor julle nie saamstem nie, moet julle dit nie ignoreer nie. Bespreek dit.” Die apostel Paulus gee goeie raad: ‘Spreek die waarheid, elkeen van julle met sy naaste.’—Efesiërs 4:25; vergelyk Hebreërs 13:18.

Wat is ’n paar van die sake wat julle beslis moet bespreek? Alle paartjies wat mekaar die hof maak, moet onderwerpe soos doelwitte, kinders, geldsake en gesondheid bespreek. Maar daar is sake wat dalk spesifieke aandag sal verg. Een—of albei—van julle sal byvoorbeeld dalk moet verhuis as julle trou. Is jy verstandelik sowel as emosioneel gesproke bereid en in ’n posisie om dit te doen? Hoe weet jy dit? Het jy al voorheen verhuis of was jy al lank van jou gesin af weg? Joanne se toekomstige man wou hê dat hulle as vrywillige werkers moet dien by die hoofkwartier van die Wagtoringgenootskap, die uitgewers van hierdie tydskrif. “Hy het my gevra of ek in ’n klein kamertjie en met min geld kon leef”, sê Joanne. “Ons het dit deeglik bespreek.”

Is jy bereid om by ’n ander kultuur aan te pas as jy iemand van ’n ander land die hof maak? “Waardeer julle alreeds elke dag aspekte van mekaar se kultuur?” vra Frank. “Praat vroeg in julle verhouding oor hierdie belangrike sake. Hoe gouer julle uitvind, hoe beter—voordat julle emosioneel of finansieel gesproke te veel daarin belê het.” Ja, dit is anders om van dag tot dag volgens ’n ander kultuur te leef as om ’n paar dae lank ’n toeris te wees. Sal jy ’n ander taal moet leer? Sal jy jou by groot verskille in lewensomstandighede kan aanpas? Kan dit aan die ander kant wees dat dit die kultuur is wat jou betower en dalk nie soseer die persoon nie? Sulke betowering sal waarskynlik mettertyd verbygaan. Maar ’n huwelik voeg twee mense permanent onder een juk saam.—Matteus 19:6.

Tony verduidelik: “’n Meisie wat ek ken uit ’n ander deel van die wêreld het met iemand van die Karibiese Eilande getrou. Maar dit was vir haar moeilik om aan die eilandlewe gewoond te raak. Dit was altyd warm, en sy het siek geword. Die kos was anders, en sy het haar familie gemis. Hulle het derhalwe in haar tuisland probeer woon. Maar hy het gevoel dat die lewenstyl daar te materialisties was, en hy het die hegte verhoudings onder gesinslede en bure gemis waaraan hy gewoond was. Hulle is nou uitmekaar; hy woon in sy tuisland, en sy in hare. Hulle twee kinders mis die liefde en aandag van albei ouers.”

Om met iemand te trou wat ver weg woon, wat moontlik ’n ander kultuur het, bied ander uitdagings. Is jy voorbereid op die ekstra uitgawes van reiskoste en kommunikasie? Lydia sê: “Phil het altyd gespot dat ons moes trou omdat sy telefoonrekeninge so hoog was, maar nou moet ons vir my oproepe na my ma betaal!” Sê nou julle het kinders? Party word groot sonder dat hulle veel van hulle eie familielede weet, en weens taalverskille kan hulle nie eens met hulle oor die telefoon praat nie! Dit is nie te sê dat sulke probleme onoorkomelik is nie. Maar ’n mens moet die koste daarvan bereken om in so ’n huwelik te tree.—Vergelyk Lukas 14:28.

Watter soort persoon is hy (of sy) werklik?

Hoe kan jy vasstel of jou vriend werklik openhartig en eerlik is? “Elke goeie boom [bring] goeie vrugte voort”, sê Matteus 7:17. Wat toon sy werke dus? Kom sy dade ooreen met wat hy sê? Verleen sy verlede geloofwaardigheid aan die doelwitte wat hy sê hy vir die toekoms het? “Die eerste dinge wat ons oor mekaar uitgevind het, was ons geestelike doelwitte”, verduidelik Ester. “Hy het al agt jaar lank as ’n voltydse evangeliedienaar gedien, en dit het my die vertroue gegee dat hy eerlik was oor sy begeerte om daarmee voort te gaan.”

Maar sê nou die persoon wat jy die hof maak, klink ontwykend. Moenie die saak ignoreer en net op die beste hoop nie. Stel dieper ondersoek in! Vra WAAROM? ’n Spreuk sê: “Die raad in die hart van ’n man mag diep waters wees, ’n man van verstand sal dit tog uitskep” (Spreuke 20:5). “Die eenvoudige glo elke woord, maar die skrandere let op sy voetstappe”, waarsku ’n ander spreuk.—Spreuke 14:15.

Van aangesig tot aangesig

’n Mens kan tog ook maar net soveel per brief of telefoon oor iemand uitvind. Dit is interessant dat die apostel Johannes ’n paar briewe aan sy Christenbroers geskryf het. Hoewel hierdie briewe baie gehelp het om die liefdeband tussen hulle te versterk, het Johannes gesê: “Hoewel ek baie het om aan julle te skryf, wil ek dit nie met papier en ink doen nie, maar ek hoop om na julle toe te kom en van aangesig tot aangesig met julle te praat” (2 Johannes 12). Dit is eweneens die heel beste om tyd saam met die persoon self deur te bring. Dit sal dalk selfs prakties wees as een van julle tydelik verhuis sodat julle nader aan mekaar kan wees. Dit sal ook die een wat verhuis die geleentheid gee om die klimaat en lewensomstandighede te ondervind van wat moontlik sy of haar nuwe tuiste sal word.

Hoe kan julle julle tyd saam ten beste benut? Doen dinge wat julle eienskappe aan mekaar sal openbaar. Bestudeer God se Woord saam. Luister hoe die ander een hom by gemeentelike vergaderinge en in die bediening uitdruk. Doen alledaagse huishoudelike werkies saam, soos om skoon te maak en inkopies te doen. Dit kan baie insiggewend wees as jy sien hoe die ander persoon onder die druk van ’n besige rooster optree.a

Jy moet ook tyd saam met jou potensiële skoonouers deurbring. Probeer ’n goeie verhouding met hulle opbou. Hulle sal per slot van sake jou familie word as julle twee trou. Ken jy hulle? Kom julle oor die weg met mekaar? Joanne gee die volgende raad: “As dit enigsins moontlik is, sal dit goed wees as albei gesinne mekaar kan ontmoet.” Tony sê verder: “Jou vriend sal jou dieselfde behandel as wat hy sy eie gesin behandel.”

Hetsy jy iemand die hof maak wat by jou is en of jy dit per telefoon en brief doen, jy moet nie oorhaastige besluite neem nie (Spreuke 21:5). As dit duidelik word dat ’n huwelik tussen julle twee eenvoudig nie sal werk nie, dan sal dit wys wees om die beëindiging van julle verhouding te bespreek (Spreuke 22:3). Aan die ander kant is dit dalk net nodig om meer tyd toe te laat vir openhartige, eerlike kommunikasie.

Dit kan moeilik wees om iemand die hof te maak wat ver woon, maar dit kan ook lonend wees. Dit is nietemin ’n ernstige saak. Moenie haastig wees nie. Leer mekaar ken. As julle dan wel besluit om te trou, sal julle hofmakery ’n tyd wees waarvan julle aangename herinneringe sal hê, nie ’n tyd waaroor julle spyt sal wees nie.

[Voetnoot]

[Prent op bladsy 15]

Sorg dat julle onderwerpe soos doelwitte, kinders en geldsake vroeg in julle verhouding bespreek