Hoe om ’n sukses te maak van ’n romantiese verhouding

1-2. Hoe voel party oor romantiese verhoudings?

OM IN ’n romantiese verhouding te wees, kan ’n lekker, opwindende tyd wees. As jy op die oomblik in ’n romantiese verhouding is, wil jy sekerlik hê dat dit goed moet verloop. En vir baie paartjies is dit die geval. Tsion,a ’n suster van Etiopië, sê: “Een van die gelukkigste tye van my lewe was toe ek en my man uitgegaan het. Ons het ernstige gesprekke gehad, en ons het ook gelag. Ek was bly toe ek besef dat ek iemand gevind het wat ek liefhet en wat my liefhet.”

² Maar Alessio, ’n broer van Nederland, sê: “Ek het dit geniet om my vrou te leer ken toe ons uitgegaan het, maar ons romantiese verhouding het ook uitdagings gehad.” In hierdie artikel sal ons ’n paar potensiële uitdagings bespreek, en ’n paar Bybelbeginsels wat paartjies kan help om ’n sukses te maak van hulle romantiese verhouding. Ons sal ook bespreek hoe ander in die gemeente paartjies wat in ’n romantiese verhouding is, kan ondersteun.

DIE DOEL VAN ’N ROMANTIESE VERHOUDING

3. Wat is die doel van ’n romantiese verhouding? (Spreuke 20:25)

³ Al kan ’n romantiese verhouding lekker wees, is dit ook ’n ernstige stap wat tot die huwelik kan lei. Op hulle troudag maak ’n paartjie ’n belofte voor Jehovah om mekaar lief te hê en te respekteer vir so lank as wat hulle albei lewe. Voordat ons enige belofte maak, moet ons baie mooi oor die saak dink. (Lees Spreuke 20:25.) Dit is beslis waar wanneer dit kom by die huweliksbelofte. ’n Romantiese verhouding stel ’n paartjie in staat om mekaar te leer ken en om ’n goeie besluit te maak. Partykeer is daardie besluit om te trou; partykeer is daardie besluit om die romantiese verhouding te beëindig. As ’n paartjie opbreek, beteken dit nie dat hulle verhouding misluk het nie. Die verhouding het eerder sy doel gedien – dit het hulle gehelp om ’n goeie besluit te maak.

4. Hoekom moet ons die regte beskouing van romantiese verhoudings hê?

⁴ Hoekom is dit belangrik om die regte beskouing van romantiese verhoudings te hê? Wanneer ongetroudes die regte beskouing het, sal hulle nie met iemand uitgaan as hulle reeds weet dat hulle nie met daardie persoon sal trou nie. Maar ongetroudes is nie die enigstes wat die regte beskouing moet hê nie. Ons almal moet dit ontwikkel. Byvoorbeeld, party dink dat ’n paartjie moet trou as hulle in ’n verhouding is. Hoe affekteer hierdie gesindheid ongetroude Christene? Melissa, ’n ongetroude suster in die Verenigde State, sê: “Daar is baie druk op Getuies wat in ’n verhouding is. As gevolg daarvan wil party paartjies nie ’n verhouding beëindig nie, al werk dit nie. Ander ongetroudes vermy verhoudings heeltemal. Die druk kan oorweldigend wees.”

LEER MEKAAR GOED KEN

5-6. Wat moet ’n paartjie omtrent mekaar uitvind terwyl hulle uitgaan? (1 Petrus 3:​4, vtn.)

⁵ As jy in ’n verhouding is, wat sal jou help besluit of julle gaan trou of nie? Leer mekaar goed ken. Jy het heel moontlik party dinge omtrent die ander persoon geleer voordat julle begin uitgaan het. Maar nou het jy die geleentheid om “die geheime persoon van die hart” te leer ken. (Lees 1 Petrus 3:​4, vtn.) Dit sluit in dat jy meer omtrent jou potensiële maat se geestelikheid, persoonlikheid en denkwyse moet leer. Met verloop van tyd sal jy vrae moet kan beantwoord soos: ‘Sal hierdie persoon ’n goeie huweliksmaat vir my wees?’ (Spr. 31:​26, 27, 30; Ef. 5:33; 1 Tim. 5:8). ‘Kan ons mekaar se emosionele behoeftes vervul? Kan ons met mekaar se tekortkominge saamleef?’ (Rom. 3:23).b Terwyl julle mekaar leer ken, onthou dat die belangrikste ding nie is hoe eenders julle is nie, maar of julle albei by mekaar se verskille kan aanpas.

⁶ Watter ander dinge moet jy omtrent die ander persoon uitvind terwyl julle uitgaan? Voordat jy te emosioneel betrokke raak, sal jy dalk party belangrike dinge wil bespreek, soos die ander persoon se doelwitte. Maar wat van persoonlike dinge soos gesondheidsprobleme, finansiële probleme of traumatiese ondervindinge van die verlede? Dis nie nodig om alle onderwerpe aan die begin van die verhouding te bespreek nie. (Vergelyk Johannes 16:12.) As jy voel dat dit te vroeg is om party vrae wat baie persoonlik is, te beantwoord, sê vir die ander persoon. Maar met verloop van tyd sal jou potensiële maat hierdie inligting moet weet om ’n gebalanseerde besluit te maak. So jy sal die een of ander tyd openlik oor hierdie dinge moet praat.

7. Hoe kan ’n paartjie wat in ’n verhouding is, mekaar leer ken? (Sien ook die venster “Langafstandverhoudings”.) (Sien ook prente.)

⁷ Hoe kan jy uitvind wie die ander persoon werklik is? Een van die beste maniere is om openlik en eerlik te praat, om vrae te vra en regtig te luister (Spr. 20:5; Jak. 1:19). Julle kan dalk kies om dinge saam te doen wat vir julle ’n geleentheid sal gee om te praat, soos om saam te eet, om saam in openbare plekke te gaan stap en om saam velddiens te doen. Julle kan ook mekaar leer ken wanneer julle tyd met vriende en familie spandeer. En beplan aktiwiteite wat vir jou sal wys hoe die ander persoon in verskillende omstandighede en met verskillende mense optree. Kyk wat Aschwin, van Nederland, probeer doen het. Hy sê die volgende omtrent sy verhouding met Alicia: “Ons het na aktiwiteite gesoek wat ons sou help om mekaar te leer ken. Dit was dikwels eenvoudige dinge, soos om saam kos te maak of om ander takies saam te doen. Gedurende sulke aktiwiteite het ons mekaar se sterk punte en swakhede gesien.”

8. Hoe kan dit ’n paartjie wat in ’n verhouding is, help as hulle saam studeer?

⁸ Julle kan ook mekaar leer ken deur geestelike onderwerpe saam te studeer. As julle trou, sal julle tyd moet maak vir gesinsaanbidding, sodat God ’n baie belangrike deel van julle huwelik is (Pred. 4:12). So hoekom maak julle nie nou, terwyl julle uitgaan, tyd om saam te studeer nie? ’n Paartjie wat in ’n verhouding is, is natuurlik nog nie ’n gesin nie, en die broer is nog nie die suster se hoof nie. Maar deur gereeld saam te studeer, kan julle omtrent mekaar se geestelikheid leer. Max en Laysa, ’n paartjie van die Verenigde State, het nog ’n voordeel gesien. Hy sê: “Ons het vroeg in ons verhouding publikasies begin studeer wat gegaan het oor romantiese verhoudings, die huwelik en die gesinslewe. Daardie publikasies het ons die geleentheid gegee om oor baie belangrike dinge te praat wat nie vanself sou opkom nie.”

ANDER DINGE OM AAN TE DINK

9. Aan watter dinge moet ’n paartjie dink wanneer hulle besluit vir wie om van hulle verhouding te vertel?

⁹ Vir wie moet julle van julle verhouding vertel? Dit is iets wat julle as ’n paartjie moet besluit. Aan die begin van julle verhouding besluit julle dalk om vir net ’n paar mense te vertel (Spr. 17:27). Deur dit te doen, vermy julle dalk onnodige druk en vrae. Maar as julle niemand vertel nie sal julle julleself dalk afsonder omdat julle bang is dat ander sal uitvind. Dit kan gevaarlik wees. So dit sal wys wees om ten minste vir dié te vertel wat goeie raad en praktiese hulp kan voorsien (Spr. 15:22). Byvoorbeeld, julle kan vir sekere familielede, volwasse vriende of Christenouermanne vertel.

10. Wat kan ’n paartjie doen om hulle verhouding eerbaar te hou? (Spreuke 22:3)

¹⁰ Hoe kan julle julle verhouding eerbaar hou? Terwyl julle gevoelens sterker word, sal julle natuurlik meer aangetrokke tot mekaar voel. Wat kan julle help om julleself sedelik rein te hou? (1 Kor. 6:18). Vermy dit om onsedelike gesprekke te hê, om alleen saam te wees en om te veel te drink (Ef. 5:3). Hierdie dinge kan julle seksuele begeertes sterker maak en dit baie moeilik maak om te doen wat reg is. Hoekom bespreek julle nie gereeld watter stappe julle kan neem om julle verhouding eerbaar te hou nie? (Lees Spreuke 22:3.) Kyk wat Dawit en Almaz van Etiopië gehelp het. Hulle sê: “Ons het tyd saam op plekke spandeer waar daar baie mense was of saam met ander vriende. Ons was nooit alleen in ’n kar of ’n huis nie. Deur dit te doen, het ons situasies vermy wat ons in die versoeking kon bring.”

11. Aan watter dinge moet ’n paartjie dink wanneer hulle besluite maak oor hoe hulle hulle liefde op fisiese maniere gaan wys?

¹¹ Moet ’n paartjie hulle liefde op fisiese maniere wys? Party van hierdie maniere is dalk gepas soos julle verhouding vorder. Maar as julle seksuele begeertes sterk word, sal dit baie moeilik wees om ’n wyse besluit oor die ander persoon te maak (Hoogl. 1:2; 2:6). En wanneer julle julle liefde op fisiese maniere wys, kan dit maklik wees om julle selfbeheersing te verloor en om iets te doen wat Jehovah ongelukkig maak (Spr. 6:27). Daarom moet julle vroeg in julle verhouding bespreek watter perke julle sal stel, in ooreenstemming met Bybelbeginsels (1 Tess. 4:​3-7).c As ’n paartjie, vra julle af: ‘Hoe sal mense waar ons bly, voel as ons ons liefde op fisiese maniere wys? Kan dit seksuele begeertes in een van ons laat ontstaan?’

12. Waarvan moet ’n paartjie bewus wees wanneer hulle probleme en verskille het terwyl hulle uitgaan?

¹² Hoe kan julle probleme en verskille hanteer? Wat as julle van tyd tot tyd nie saamstem nie? Sal dit wys dat julle verhouding nie werk nie? Nie noodwendig nie; alle paartjies stem partykeer nie saam oor dinge nie. ’n Sterk huwelik bestaan uit twee mense wat kan saamwerk om hulle verskille te oorkom. So hoe julle probleme nou oplos, sal dalk wys of julle huwelik suksesvol sal wees. As ’n paartjie, vra julle af: ‘Kan ons dinge op ’n kalm en respekvolle manier bespreek? Erken ons maklik ons tekortkominge en probeer ons verbeter? Is ons vinnig om toe te gee, verskoning te vra en te vergewe?’ (Ef. 4:​31, 32). Maar as julle heeltyd verskil of stry terwyl julle uitgaan, sal die situasie heel moontlik nie verbeter nadat julle getroud is nie. As jy besef dat die ander persoon nie die regte persoon vir jou is nie sal dit die beste besluit vir julle albei wees as jy die verhouding beëindig.d

13. Watter faktore kan ’n paartjie wat in ’n verhouding is, help besluit hoe lank hulle moet uitgaan?

¹³ Hoe lank moet julle uitgaan? Oorhaastige besluite lei dikwels tot negatiewe gevolge (Spr. 21:5). So julle moet lank genoeg uitgaan sodat jy die ander persoon goed kan leer ken. Maar julle moenie langer uitgaan as wat nodig is nie. Die Bybel sê ook: “’n Uitgestelde verwagting maak die hart siek” (Spr. 13:12). En soos die verhouding vorder, sal dit dalk moeiliker word om seksuele versoeking te weerstaan (1 Kor. 7:9). Eerder as om te fokus op hoe lank julle al uitgaan, kan jy jou afvra: ‘Wat moet ek nog omtrent die ander persoon uitvind sodat ek ’n besluit kan maak?’

HOE KAN ANDER ’N PAARTJIE WAT IN ’N VERHOUDING IS, ONDERSTEUN?

14. Op watter praktiese maniere kan ander ’n paartjie wat in ’n verhouding is, ondersteun? (Sien ook prent.)

¹⁴ As ons ’n paartjie wat in ’n verhouding is, ken, hoe kan ons hulle help? Ons kan hulle oornooi vir ’n maaltyd, vir gesinsaanbidding of vir ontspanning (Rom. 12:13). Onder daardie omstandighede kan hulle mekaar dalk selfs beter leer ken. Het hulle ’n chaperone nodig, hulp met vervoer of ’n plek waar hulle privaat kan praat? As dit die geval is, kan ons aanbied om te help? (Gal. 6:10). Alicia, wat vroeër genoem is, vertel wat sy en Aschwin waardeer het. Sy sê: “Ons was baie bly toe party broers en susters gesê het dat ons hulle kan besoek as ons ’n plek nodig het om saam te wees sonder dat ons afgesonderd is.” As jy gevra word om ’n chaperone te wees, hoekom sien jy dit nie as ’n voorreg nie? Maak seker dat jy nie die paartjie heeltemal alleen los nie, maar wees ook bewus van wanneer hulle tyd nodig het om privaat te praat. – Fil. 2:4.

15. Wat kan vriende nog doen om ’n paartjie wat in ’n verhouding is, te help? (Spreuke 12:18)

¹⁵ Ons kan ook paartjies wat in ’n verhouding is, ondersteun deur wat ons sê of nie sê nie. Partykeer sal ons dalk onsself moet beheer. (Lees Spreuke 12:18.) Byvoorbeeld, ons is dalk gretig om vir ander te sê dat ’n paartjie begin uitgaan het, maar die paartjie wil dalk self vir ander vertel. Ons moenie skinder oor ’n paartjie wat in ’n verhouding is of hulle kritiseer oor persoonlike sake nie (Spr. 20:19; Rom. 14:10; 1 Tess. 4:11). En ons moenie dinge sê of vrae vra wat ’n paartjie onder druk laat voel om te trou nie. ’n Suster met die naam Elise en haar man sê: “Ons het ongemaklik gevoel wanneer ander ons oor ons trouplanne gevra het toe ons dit self nog nie eens bespreek het nie.”

16. Hoe moet ons reageer as ’n paartjie hulle verhouding beëindig?

¹⁶ Wat as ’n paartjie besluit om die verhouding te beëindig? Ons moet dit vermy om persoonlike vrae te vra of om kant te kies (1 Pet. 4:15). ’n Suster met die naam Lea sê: “Ek het gehoor dat ander onder mekaar gepraat het oor hoekom ek en ’n broer opgebreek het. Ek was regtig seergemaak.” As ’n paartjie besluit om die verhouding te beëindig, moet ons nie aanneem dat hulle ’n slegte besluit gemaak het nie. Gewoonlik beteken dit eenvoudig dat die verhouding sy doel bereik het – dit het die paartjie gehelp om ’n goeie besluit te maak. Maar daardie besluit het dalk nog steeds vir hulle emosionele pyn veroorsaak en dalk veroorsaak dat hulle alleen voel. So ons kan na maniere soek om hulle te ondersteun. – Spr. 17:17.

17. Wat moet paartjies wat in ’n verhouding is, aanhou doen?

¹⁷ Soos ons gesien het, kan verhoudings sy uitdagings hê, maar dit kan ook lekker wees. Jessica sê: “Om eerlik te wees, dit was baie werk om in ’n verhouding te wees. Maar dit was 100 persent die tyd en energie werd.” As julle ’n paartjie is wat in ’n verhouding is, hou aan om daaraan te werk om mekaar goed te leer ken. As julle dit doen, sal julle ’n sukses kan maak van julle verhouding – een wat julle albei sal help om ’n wyse besluit te maak.