Van ons lesers

Verander ons ons weer? Ek is 17 jaar oud en is besig om my eindeksamen te skryf. Een van die vakke waaroor ek eksamen geskryf het, is aardrykskunde, en die reeks “Verander ons ons weer?” (22 Mei 1998) het my baie met my voorbereiding gehelp. Ná die eksamen het my klasmaats my gevra waar ek hierdie inligting oor die weer gekry het, en die helfte van hulle het eksemplare gevra.

A. G., Switserland

Ek was aangenaam verras deur die ontleding van die kweekhuiseffek in hierdie nommer van die Ontwaak! Ek is ’n geesdriftige ekoloog en ’n Christen. Jehovah se Getuies word nie altyd gunstig deur die pers beoordeel nie. Maar dit is die moeite werd om oor die inhoud van julle tydskrif na te dink. Ekologie en geloof het ’n laagtepunt bereik. Uiteindelik is daar godsdienstige mense wat in God se skepping belangstel!

M. C., Frankryk

Ek is 14 jaar oud en wil julle vir die artikels bedank. Ek het nooit juis oor die weer gedink nie, maar ek het nou vir die eerste keer ernstig nagedink oor wat ons dalk aan ons planeet doen. Hierdie artikels behoort baie mense wakker te skud, want wie wil nou ons omgewing vernietig? Ons behoort nie ’n geskenk van God sommer net so weg te gooi nie.

S. Q., Duitsland

Ek was bly om iets oor die klimaat te lees in ’n tydskrif wat deur mense as ’n godsdienstige tydskrif beskou word. Dit wys net hoeveel Ontwaak! vir mense omgee—nie net in godsdienstige sin nie, maar ook in fisiese sin. Alhoewel ons dit as vanselfsprekend aanvaar, beïnvloed die weer werklik ons lewe.

M. F. M., Duitsland

Versorging van vingernaels Dit is verbasend dat ek byna 52 jaar lank, met die uitsondering van twee kort tydperke, my naels gebyt het. Nadat ek die artikel “Jou vingernaels—Versorg jy hulle?” in die Ontwaak! van 22 Mei 1998 gelees het, het ek daarmee opgehou. Waarom? Omdat Jehovah God hulle Ontwerper is en wil hê dat ons hulle, soos alle ander dinge, moet versorg. Dankie dat julle dinge op so ’n liefdevolle wyse onder ons aandag bring.

D. H., Engeland

Aangesien ek na die huis sowel as die tuin omsien en ook my gestremde skoonma versorg, kan julle julle voorstel dat ek meer het om te doen as om net my hande te versorg. Ek is nou al ’n geruime tyd besorg oor my naels, want hulle breek en skeur in. Die artikel het dus net op die regte tyd gekom.

W. B., Duitsland

Van kleins af het ek my naels gebyt en was dus skaam oor hulle ongelyke vorm. Terwyl ek die artikel gelees het, het ek groter waardering gekry vir die feit dat ons naels ’n wonderlike deel van ons menseliggaam is. Dit het my aangemoedig om die gewoonte te probeer afleer.

K. J., Japan

Rolmodel Toe ek die deel in die Ontwaak! van 22 Mei 1998 gelees het met die titel “Jongmense vra . . . Wie moet my rolmodel wees?”, het ek nagedink oor die manier waarop artikels soos dié my lewe verryk het. Ná die verbrokkeling van ons gesin was ek natuurlik eerste aangetrokke tot vriende van my eie ouderdom. Maar toe het ek ernstig begin dink oor mense wat die positiefste invloed op my lewe gehad het—die ouer Christensusters. Nou verkies ek om verhoudings soos dié van Paulus en Timoteus of Rut en Naomi op te bou. My beste vriendin is ’n suster wat ongeveer 50 jaar oud is en my geleer het van vreugde, liefde, medelye, goedhartigheid en vrygewigheid. Ons span saam—ons woon nou saam en ons planne vorder goed om die voltydse bediening te betree. Dankie vir julle goeie leiding en riglyne.

C. F., Verenigde State