“Droewige vooruitsigte vir geestesgesondheid”

“Ondanks indrukwekkende mediese vooruitgang op baie gebiede van gesondheidsorg”, sê ’n artikel in Synergy, ’n nuusbrief van die Kanadese Genootskap vir Internasionale Gesondheid, “het ons op ’n wêreldwye skaal droewige vooruitsigte vir geestesgesondheid”.

Een verslag het getoon dat 1 uit 4 mense regoor die wêreld aan geestes-, emosionele of gedragsteurnisse ly. ’n Ander studie het getoon dat 1 uit 3 pasiënte wat ’n gesondheidswerker raadpleeg, dit doen omdat hy aan depressie ly of spanningsprobleme het. En hierdie syfers, sê navorsers, is besig om te styg.

Waarom? ’n Studie wat deur Harvard-universiteit se Departement van Maatskaplike Geneeskunde gedoen is, sê dat siektes soos kliniese depressie, skisofrenie en demensie vermenigvuldig omdat “meer mense tot die risiko-ouderdom lewe”. Maar die feit dat mense langer lewe, is nie die enigste rede nie. Dit is ook te wyte aan ekonomiese probleme, asook die verhoogde spanningsvlakke weens die moderne lewenswyse.

Hoe kan hierdie droewige prentjie verander word? Al is daar baie aspekte van gesondheidsorg, sê deskundiges, moet geestesgesondheid voorkeur kry omdat dit “een van die laaste onnagevorste gebiede verteenwoordig waarop die menslike toestand verbeter kan word”.