Gefassineer deur engele

“Ons ‘almal’ het engele wat ons lei en beskerm . . . As ons hulle nie hinder nie en soos kinders is, met algehele vertroue en liefde en nederige dankbaarheid, sal hulle hulle seëninge oorvloedig oor ons uitstort. Hulle speel met ons. Hulle pas ons op. Hulle genees ons, raak ons aan, vertroos ons met onsigbare, liefdevolle hande, en hulle probeer ons altyd gee wat ons wil hê.”—Uit die boek “Angel Letters”.

JY MOET erken dat hierdie gewilde beskouing van engele baie aantreklik is. Volgens die beskouing van “die nuwe geestelikheid”, soos party dit noem, het elkeen van ons ten minste een engel, ’n engel wie se plig dit is om ons te vertroos en teen gevaar te beskerm. Jou engel is glo magtig sowel as liefdevol. Hy vereis nie gehoorsaamheid of aanbidding nie, en hy sal jou nooit veroordeel of teregwys nie. Hy is altyd aan jou sy, gedurig besorg oor jou welstand en gretig om al jou wense te vervul. Baie glo vandag vas dat hierdie dinge waar is.

Om aan engele te glo, is natuurlik niks nuuts nie. Hulle speel al sedert antieke tye ’n belangrike rol in mense se godsdiensopvattings. Dit word deur kunswerke weerspieël. Voorstellings van gerubs, ’n soort engel, het die eertydse Joodse tabernakel en tempel versier. Engele verfraai kerke en katedrale regdeur die Christelike wêreld. Museums is vol skilderye en beelde van engele.

Engele se gewildheid

In onlangse tye het engele uiters gewild geraak in sommige lande. Rolprente stel engele dikwels as mense voor wat gesterf het en na die aarde toe terugkeer om goeie dade te verrig. In een rolprent help engele ’n bofbalspan wat verloor. In ’n ander een help ’n beskermengel ’n tienerseun om die moord op sy meisie te wreek. Die tema van ’n engelehelper word ook in ’n gewilde Amerikaanse televisieprogram gebruik.

Daar is baie liedjies oor engele. Gedurende onlangse dekades het 1 uit elke 10 gewilde liedjies in die Verenigde State na ’n engel verwys. Teen die middelnegentigerjare het meer as 120 “engeleboetieks” in Amerika oopgemaak. Hierdie winkels verkoop beeldjies van engele sowel as hangertjies en skryfbehoeftes—selfs ratels vir babas met engeltjies daarop. Seminare en nuusbriewe leer mense na bewering hoe om met hierdie hemelse wesens in verbinding te tree. Tydskrifte, koerante en geselsprogramme vertel verhale van mense se ontmoetings met engele.

Honderde boeke

Dan is daar die boeke. In een groot boekwinkel in die stad New York word 500 verskillende boeke oor engele, veral beskermengele, te koop aangebied. Sulke boeke beloof om hulle lesers te wys hoe om met beskermengele in verbinding te tree, hulle name te leer ken, met hulle te praat en hulle hulp te vra. Hierdie boeke bevat baie verslae van engele wat verskyn het wanneer mense in nood verkeer het en hulle uit die pad van aankomende voertuie gered het, dodelike siektes genees het, diegene met kwellinge vertroos het en soldate op die slagveld beskerm het. Sulke engele help mense “sonder om enige teken van berou, bekering of getrouheid aan leerstellings te vereis”. Maar dit gebeur selde dat sulke hedendaagse “ontmoetings” mense beweeg om veranderinge in hulle lewe aan te bring. Diegene wat sê dat hulle sulke ondervindinge gehad het, hou gewoonlik niks meer as ’n aangename gevoel oor nie.

In ’n eeu van spanning en krisisse lyk dit dalk of hierdie verslae ongelooflike goeie nuus is. Maar kan ons dit glo? Maak dit saak?

[Lokteks op bladsy 4]

Baie meen dat hulle persoonlike ontmoetings met engele gehad het