’n Merkwaardige verandering ten goede
“In 1900 het die wêreld op die drumpel van een van die ongelooflikste tydperke van verandering in die mensegeskiedenis gestaan. ’n Ou bestel was besig om plek te maak vir ’n nuwe.”—The Times Atlas of the 20th Century.
VROEG in die 20ste eeu “het die wêreld ’n era van buitengewone onstuimigheid en geweld ingegaan”, sê die bogenoemde atlas. Hierdie eeu het meer oorloë gesien as enige ander, en meer as 100 miljoen mense het hulle lewe verloor.
In hierdie era het oorloë die lewe van meer burgerlikes geëis as ooit tevore. In die Eerste Wêreldoorlog was 15 persent van die oorlogslagoffers burgerlikes. Maar in die Tweede Wêreldoorlog is daar in party lande meer burgerlikes dood as soldate. Van die miljoene wat sedertdien in oorloë doodgemaak is, was die meeste burgerlikes. Al hierdie geweld was ’n vervulling van die Bybelprofesie oor die ruiter op “’n vuurkleurige perd”, aan wie “dit gegee [is] om vrede van die aarde weg te neem”.—Openbaring 6:3, 4; Matteus 24:3-7.
’n Verandering van waardes
Die 20ste eeu het die profesie in 2 Timoteus 3:1-5 vervul, wat sê: “In die laaste dae [sal daar] kritieke tye . . . wees wat moeilik is om deur te kom. Want mense sal liefhebbers van hulleself wees, liefhebbers van geld, aanmatigend, hoogmoedig, lasteraars, ongehoorsaam aan ouers, ondankbaar, dislojaal, sonder natuurlike geneentheid, nie bereid tot enige ooreenkoms nie, kwaadsprekers, sonder selfbeheersing, wreedaardig, sonder liefde vir goedheid, verraaiers, eiesinnig, opgeblase van trots, liefhebbers van genot eerder as liefhebbers van God, wat ’n vorm van godvrugtige toegewydheid het maar die krag daarvan verloën.”
Onvolmaakte mense het daardie karaktertrekke nog altyd in sekere mate geopenbaar. Gedurende die 20ste eeu het sulke gesindhede vererger en algemener geword. Mense wat hulle so gedra het, is voorheen as antisosiaal—of eenvoudig goddeloos—beskou. Nou beskou selfs mense “wat ’n vorm van godvrugtige toegewydheid het” sulke gedrag as normaal.
Daar was ’n tyd toe dit vir godsdienstige mense ondenkbaar was dat paartjies saamlewe sonder om getroud te wees. Buite-egtelike swangerskappe, sowel as homoseksualiteit, is as ’n skande beskou. Vir die meeste mense was aborsie en egskeiding buite die kwessie. Oneerlike sakepraktyke was laakbaar. Maar vandag, soos een bron sê, “is alles toelaatbaar”. Waarom? Om maar een ding te noem, “dit dien die selfsugtige belange van diegene wat nie wil hê dat ander vir hulle moet voorskryf wat om nie te doen nie”.
Die feit dat hoë etiese standaarde in hierdie eeu verwerp is, het daartoe gelei dat prioriteite verander het. The Times Atlas of the 20th Century verduidelik: “In 1900 het nasies en individue nog hulle waarde in niegeldelike terme bereken. . . . Teen die einde van die eeu het nasies hulle sukses amper heeltemal in ekonomiese terme gemeet. . . . Soortgelyke veranderinge het plaasgevind in mense se beskouing van rykdom.” Vandag moedig wydverspreide dobbelary ’n liefde vir geld aan, terwyl die radio, televisie, rolprente en video’s die begeerte na materiële dinge aanmoedig. Selfs spelprogramme op televisie en advertensiekompetisies dra die boodskap oor dat geld, indien dit nie alles is nie, ten minste amper alles is.
Naby maar tog so ver
Aan die begin van die 20ste eeu het die meeste mense op die platteland gewoon. Na bewering sal meer as die helfte van die bevolking vroeg in die 21ste eeu in stede woon. Die boek 5000 Days to Save the Planet sê: “Die taak om ’n ordentlike lewenstandaard vir hedendaagse stedelinge, om nie eers te praat van toekomstige geslagte nie, te voorsien, hou blykbaar onoorkomelike probleme in.” Die VN-tydskrif World Health het gesê: “Die aantal mense wat in stede woon, neem skerp toe. . . . Honderdmiljoene . . . lewe nou in ongesonde toestande wat selfs hulle lewe in gevaar stel.”
Hoe ironies is dit tog dat mense al hoe nader aan mekaar woon in stede, maar ook al hoe verder van mekaar af wegbeweeg! Hoewel die televisie, die telefoon en die Internet sowel as Internetinkopies nuttig is, lei dit tot minder persoonlike kontak. Die Duitse koerant Berliner Zeitung sê gevolglik: “Die 20ste eeu is nie net die eeu van oorbevolking nie. Dit is ook die eeu van eensaamheid.”
Dit lei tot tragedies soos die een in Hamburg, Duitsland, waar ’n man se lyk vyf jaar ná sy dood in sy woonstel gevind is! “Niemand het hom gemis nie, nie sy familie, die bure of die owerheid nie”, het Der Spiegel gesê en bygevoeg: “Vir baie burgers simboliseer dit die ontstellende omvang van die alledaagse naamloosheid en die gebrek aan sosiale kontak van die groot stad.”
Die wetenskap en tegnologie dra nie alleen die skuld vir sulke jammerlike toestande nie. Dit is hoofsaaklik mense se skuld. Hierdie eeu het meer mense as ooit tevore voortgebring wat ‘liefhebbers van hulleself is, liefhebbers van geld, ondankbaar, sonder natuurlike geneentheid, nie bereid tot enige ooreenkoms nie, sonder liefde vir goedheid, liefhebbers van genot eerder as liefhebbers van God’.—2 Timoteus 3:1-5.
1914, ’n betekenisvolle jaar
Volgens Winston Churchill “was die begin van die twintigste eeu soos ’n helder en kalm sonsopkoms”. Baie het gedink dat dit ’n era van ongeëwenaarde vrede en voorspoed sou bring. Maar in 1905 het die Watch Tower van 1 September gewaarsku: “Kort voor lank sal daar meer oorlog wees”, en dit het ook gesê dat ’n “groot ommekeer” in 1914 sou begin.
Trouens, hierdie publikasie het reeds in 1879 getoon dat 1914 ’n betekenisvolle jaar sou wees. In latere jare het dit gesê dat Bybelprofesieë in die boek Daniël die aandag op daardie jaar vestig as die tyd toe God se Koninkryk in die hemel opgerig is (Matteus 6:10). Hoewel 1914 nie die tyd was vir die Koninkryk om algehele beheer oor aangeleenthede op die aarde oor te neem nie, was dit die tyd daarvoor om te begin heers.
’n Bybelprofesie het voorspel: “In die dae van dié konings [wat in ons tyd bestaan] sal die God van die hemel ’n koninkryk [in die hemel] verwek wat in ewigheid nie vernietig sal word nie” (Daniël 2:44). Daardie Koninkryk, met Christus as Koning, het godvresende mense hier op die aarde begin insamel wat onderdane daarvan wou wees.—Jesaja 2:2-4; Matteus 24:14; Openbaring 7:9-15.
Wat toe in die hemel gebeur het, het saamgeval met die begin van “die laaste dae” in 1914, die begin van ’n tydperk wat sou eindig met die vernietiging van die huidige stelsel van dinge. Jesus het voorspel dat die begin van hierdie tydperk gekenmerk sou word deur wêreldoorloë, voedseltekorte, siekte-epidemies, verwoestende aardbewings en ’n toename in wetteloosheid, asook dat mense se liefde vir God en hulle medemens sou verkoel. Al hierdie dinge, het hy gesê, sou die “begin van weë van benoudheid” kenmerk.—Matteus 24:3-12.
Binnekort ’n heeltemal nuwe wêreld
Ons is nou in die 85ste jaar sedert die begin van “die laaste dae”, en ons is vinnig besig om die einde van hierdie huidige onbevredigende stelsel van dinge te nader. Binnekort sal God se Koninkryk, onder Christus, “al daardie koninkryke [wat nou bestaan] verbrysel en daar ’n einde aan maak, maar self sal dit vir ewig bestaan”.—Daniël 2:44; 2 Petrus 3:10-13.
Ja, God sal goddeloosheid van die aarde af verwyder en regverdiggesinde mense in ’n heeltemal nuwe wêreld inbring. “Die opregtes sal die land bewoon, en die regskapenes daarin oorbly, maar die goddelose sal uit die land uitgeroei, en die ontroues sal daaruit weggeruk word.”—Spreuke 2:21, 22.
Wat ’n vreugdevolle boodskap—beslis ’n boodskap wat verdien om wyd en syd verkondig te word! God se Koninkryk gaan binnekort die probleme oplos wat net vererger is deur die 20ste eeu: oorlog, armoede, siekte, ongeregtigheid, haat, onverdraagsaamheid, werkloosheid, misdaad, hartseer, die dood.—Sien Psalm 37:10, 11; 46:9, 10; 72:12-14, 16; Jesaja 2:4; 11:3-5; 25:6, 8; 33:24; 65:21-23; Johannes 5:28, 29; Openbaring 21:3, 4.
Klink die vooruitsig om vir ewig in ’n regverdige wêreld van onbeskryflike geluk te lewe vir jou aanloklik? Vra Jehovah se Getuies vir meer inligting. Hulle sal jou in jou eie Bybel wys dat die kritieke jare van verandering wat die 20ste eeu gekenmerk het binnekort tot ’n einde gaan kom en dat jy daarná oneindige seëninge kan geniet!
[Prent op bladsy 10]
Binnekort ’n heeltemal nuwe wêreld