Wanneer ’n gesondheidskrisis jou tref

“Dit het vir my gevoel asof ek met ’n hamer geslaan is.”—John, nadat hy uitgevind het dat hy ’n aftakelende siekte het.

“Ek was bang.”—Beth, toe sy die erns van haar gesondheidskrisis besef.

OM UIT te vind dat jy ’n chroniese en aftakelende siekte het of dat beserings van ’n ongeluk jou permanent gestremd sal laat, is een van die lewe se pynlikste ondervindinge. Hetsy jy in ’n stil spreekkamer van jou siekte vertel word of in ’n besige ongevalle-afdeling uitvind dat jy gestremd is, jy vind dit waarskynlik moeilik om te glo wat met jou gebeur. Daar is min dinge in die lewe wat jou voorberei om die kragtige emosies te verwerk wat oor jou kom wanneer jy deur ’n verpletterende gesondheidskrisis getref word.

Ontwaak! het met ’n aantal persone in verskillende lande gepraat wat al baie jare lank suksesvol met aftakelende siektes saamleef om inligting in te samel wat nuttig kan wees vir diegene wat onlangs ernstige gesondheidsprobleme begin ondervind het. Hulle is gevra om vrae soos die volgende te beantwoord: Watter emosies het jy ervaar? Wat het jou gehelp om die krisis die hoof te bied en weer jou balans te vind? Watter stappe het jy geneem om weer ’n mate van beheer oor jou lewe te kry? Die eerstehandse inligting wat tydens hierdie onderhoude ingesamel is sowel as bevindings van navorsers wat die gevolge van slepende siektes bestudeer, word bespreek ter wille van diegene wat op die oomblik ’n gesondheidskrisis ondervind.a

[Voetnoot]