Van ons lesers

Landmyne Ek is ontroer deur die voorbladartikels “Landmyne—Wat kan gedoen word?” (8 Mei 2000). Dit is verskriklik dat soveel onskuldige burgers elke jaar as gevolg van landmyne sterf.

E. U., Finland

Ek het skaam gevoel toe ek van hierdie wrede toestelle gelees het wat mense gebruik om hulle medemens kwaad aan te doen. God het alle rede om tussenbeide te tree en goddeloosheid van ons aarde af te verwyder.

G. S., Brasilië

Hierdie reeks was ’n mylpaal en het die publiek bewus gemaak van ’n vername kwessie. Die voorblad het mense se aandag getrek.

R. H., Verenigde State

Mediese behandeling sonder bloed Die artikel “Jy gaan sterf!” (8 Mei 2000) het my aan my pa se ondervinding laat terugdink. Jare gelede het hy beroerte gehad terwyl hy ’n motor bestuur het. Sy motor het omgeslaan, en toe hy sy bewussyn herwin, het die dokter vir hom gesê dat hy ’n bloedoortapping moet kry. Toe my pa weier, het die dokter gesê: “As jy nie hierdie bloedoortapping aanvaar nie, sal jy sterf.” My pa het steeds geweier. Die volgende dag het die dokter by sy kamer ingekom en gevra: “Hoe gaan dit?” My pa het gesê: “Ek lewe!” My pa lewe nog steeds en dien Jehovah tot die beste van sy vermoë.

T. M., Verenigde State

Ek het ’n seldsame bloedkanker, en toe dit gediagnoseer is, het die dokter vir my gesê dat ek binne ses maande gaan sterf as ek nie onmiddellik bloedoortappings begin kry nie. Dit was in 1991. Ek het ’n dokter gekry wat my oortuiging aangaande bloed gerespekteer het, en ek het ’n persoonlike besluit geneem om onder sy toesig weeklikse eritropoiëtieninspuitings te kry, wat help om my bloedtelling te laat styg.

E. G., Verenigde State

Ek het Leanne Karlinsky se verhaal gelees, en as ’n dokter was ek ontsteld oor die onmenslikheid van diegene wat haar ná die operasie verwaarloos het [omdat sy bloedoortappings geweier het]. Ek kan nie glo dat mense so bevooroordeeld kan wees nie!

C. C., Verenigde State

Stry teen wanhoop Aangesien ek aan depressie ly, het ek die artikel “Die Bybelse beskouing: Hoe om wanhoop die hoof te bied” (8 Mei 2000) dadelik gelees toe ek dit gekry het. Soos julle gesê het, is dit baie bemoedigend om met iemand te praat wat met begrip sal luister. Ek wil graag my waardering uitspreek vir julle uitstekende artikels.

A. D., Litaue

Laktoseonverdraagsaamheid My vrou het haar dokter besoek omdat sy ernstige simptome ondervind het. Die dokter het gesê dat sy dalk laktoseonverdraagsaam is. Ek het nog nooit daarvan gehoor nie, daarom is ons dankbaar vir die artikel “Ly jy aan laktoseonverdraagsaamheid?” (8 Mei 2000). Hierdie uitstekende inligting kon nie op ’n beter tyd gekom het nie.

E. P., Verenigde State

Brasilië Die artikel “Die Pantanal—’n fassinerende gebied” (8 September 1999) het die begeerte by my gewek om hierdie deel van Jehovah se skepping self te sien. Ek en my suster het dus beplan om Brasilië te besoek, en ons het die artikel “Die dramatiese geskiedenis van ’n ‘land van kontraste’” (8 Mei 2000) gekry twee weke voordat ons daar sou aankom. Dit was ’n uitstekende gids wat ons gehelp het om die beste plekke te besoek.

E. V., Engeland

Voëls en gevangenes Ek het die vreugde ondervind om verskeie voëls groot te maak—en om hulle weer in die natuur vry te laat. Die artikel “Wat kan ’n gevangene by ’n voël leer?” (8 Mei 2000) het my herinner aan hoe selfs ’n klein skepping van Jehovah ons so baie kan leer.

E. D., Verenigde State